Uuna wu li muudhigu osha yela kutya oho kala wa tegelela kuume koye kopothingo a ninge po sha, opo e ku kwathele. Ihe ngele tashi ya puKalunga, aantu yamwe ohaya ti kutya ke shi kuume kawo, oshoka oyu uvite kutya ihe ya kwathele sha. Uushili owo kutya Kalunga okwa ninga nale iinima oyindji mbyoka ye tu etela uuwanawa. Ihe masiku ota ka kutha po omaupyakadhi agehe nokumona iihuna akuhe hoka ku li po kunena. Mbela ota ka ninga po shike monakuyiwa?

Kalunga ota ka hulitha po uukolokoshi awuhe mokuhanagula po ngoka he wu etitha. Ombiimbeli oya popya ngoka he wu etitha sho ya ti: “Uuyuni auhe ou li mepangelo lyomuhindadhi.” (1 Johannes 5:19) ‘Omuhindadhi’ oye ngoka Jesus e mu ithana a ti: “Omupangeli guuyuni mbuka,” ano Satana Ondiyapoli. (Johannes 12:31) Satana oye omweetithi gwoonkalo dhiyemateka kombanda yevi, oshoka oye ta nwetha mo uuyuni awuhe. Mbela Kalunga ote ke mu ningila shike?

Masiku Jehova Kalunga ota ka longitha Omwana, Jesus Kristus, “a hanagule po neso lye mwene omuhindadhi, ngoka he eta eso.” (Aahebeli 2:14; 1 Johannes 3:8) Ombiimbeli otayi ulike nokuli kutya Omuhindadhi oku shi shi kutya “oku na ko ashike okathimbo okafupi kowala” a hanagulwe po. (Ehololo 12:12) Kalunga ota ka hulitha po uukolokoshi awuhe nota ka hanagula po aakolokoshi ayehe. — Episalomi 37:9; Omayeletumbulo 2:22.

Konima ngele Omushiti gwetu a hulitha po uukolokoshi awuhe, ota ka gwanitha po elalakano lye li na ko nasha naantu, opo ya ka kale nomwenyo sigo aluhe moparadisa kombanda yevi. Oshike twa tegelela shi ka kale moparadisa?

Ombili negameno sigo aluhe. “Aayifupipiki otaa ka thigulula evi notaa ka mona uulinawa nombili.” — Episalomi 37:11.

Iikulya ya gwana noyi na uukolele. “Moshilongo namu kale eloolo lyiilya; kiikulundundu naku kale omapya.” — Episalomi 72:16.

Omagumbo omawanawa niilonga iiwanawa. ‘Otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene. Aahogololwa yandje otaya ka nyanyukilwa iilonga yiikaha yawo yene.’ — Jesaja 65:21, 22.

Mbela ino hala oku ka mona oonkalo ndhoka kombanda yevi? Moparadisa oonkalo osho tadhi ka kala ngawo esiku kehe.

Kunena aantu ayehe ohaya ehama nohaya si, ihe monakuyiwa hasho tashi ka kala ngawo. Masiku Kalunga ota ka gwanitha po iinima ayihe iiwanawa mbyoka ya ningithwa tayi wapa kekuliloyambo lyaJesus. Kalunga ote ke yi gwanitha po, opo “shaa ngoka te mu itaale, kaa kane, ihe a kale e na omwenyo gwaaluhe.” (Johannes 3:16) Oshizemo otashi ka kala shini?

Uuwehame otawu ka hula po. “Kape na nando ogumwe muSion ta ka tya: ‘Otandi ehama.’ Omayonagulo gawo agehe otaga ka dhimwa po.” — Jesaja 33:24.

Eso otali ka hula po. “Omuwa Omupangeliawike ota ka hanagula po eso sigo aluhe. Ota ka theta po omahodhi momeho gaayehe.” — Jesaja 25:8.

Aantu otaya ka kala nomwenyo sigo aluhe. “Omwenyo gwaaluhe ogwo omagano gesilohenda lyaKalunga muukumwe naJesus Kristus, Omuwa gwetu.” — Aaroma 6:23.

Mboka ya sa otaya ka yumudhwa. “Kalunga ota ka yumudha aantu ayehe kuusi, naawanawa naawinayi.” (Iilonga 24:15) Mboka ya sa otaya yumudhwa, opo ya ka mone uuwanawa mekuliloyambo ndyoka Kalunga a gandja.

 Iinima ayihe mbyoka Kalunga ote ke yi gwanitha po ngiini?

Kalunga ota ka gwanitha po elalakano lye li na ko nasha naantu nonevi okupitila mepangelo lye lyomegulu. Omupangeli gwalyo oJesus Kristus. (Episalomi 110:1, 2) Jesus okwa li a longo aalanduli ye ya galikane kombinga yepangelo nenge yuukwaniilwa mboka, sho a ti: “Tate yetu, ngu u li megulu, . . . Oshilongo shoye nashi ye.” — Mateus 6:9, 10.

Oshilongo nenge Uukwaniilwa waKalunga otawu ka pangela evi alihe. Otawu ka hulitha po okulila nokumona iihuna akuhe hoka ku li ko. Uukwaniilwa mbuka owo epangelo dhingi ndyoka aantu taya ka kala ye na. Nomolwaashono Jesus a li a longo nuudhiginini, opo a uvithe “elaka etoye lyOshilongo” sho a li kombanda yevi. Okwa li wo a lombwele aalongwa ye ya ninge sha faathana. — Mateus 4:23; 24:14.

Jehova Kalunga oku hole aantu noonkondo, nomolwaashono u uvaneke oku ya ningila iinima ayihe mbika iiwanawa. Mbela shika itashi ku ningitha wu kale wa hala oku mu tseya nokuhedha popepyeelela naye? Ngele owa tokola wu shi ninge, uuwanawa wuni to ka mona? Oshitopolwa tashi landula otashi gandja eyamukulo.