Putyina ukahi nokulambela motyitateka tyimwe, tyipondola hamwe uhanda epanga liove likukuateseko. Vamwe vapopia okuti Huku hepanga-ko liavo mokonda vasoka okuti, Huku kekahi nokuvekuatesako. Mahi tyotyili Huku ketulingilile vala ovipuka ovinyingi, mahi tupu makamanako ovitateka aviho no nonkhumbi tuvasiwa nambo hono. Oityi Huku makalinga?

Siovaa Huku, makamanako ovivi aviho, tyina amanyimi-ko ondyivi-ndyivi yatyo. Ombimbiliya ipopia nawa ondyivi-ndyivi oyo etyi yati: “Ouye auho ukahi pomaoko ondingavivi.” (1 Suau 5:19) Sesusi waihana “Ondingavivi oyo” okuti o Satanasi Eliapu “Omutumini wouye uno.” (Suau 12:31) Mokonda Satanasi oe uhongiliya ovanthu okulinga ovivi, otyo mouye mueyulila ononkhumbi. Oityi Huku makalinga?

Apa katutu Huku makatuma omona wae Sesusi Kilisitu, opo “anyimeko Eliapu, lieta ononkhia.” (Ova Hebeleu 2:14; 1 Suau 3:8) Ombimbiliya ipopia okuti Eliapu lityii okuti, “lina omuvo uhehi” opo lihanyueko. (Eholololo 12:12) Tupu Huku makanyimako ovivi aviho navana vevilinga. — Salmo 37:9; Provérbios 2:22.

Tyina Huku amanyimiko ovivi aviho kombanda yohi, makafuisapo etyi ankho ahandela ouye ponthimbi. Okuti katuhande okukatala etyi Huku makalinga?

Ombembwa. “Ovahiliyi mavakapiñgana ohi, iya avakakala nombembwa onene.” — Salmo 37:11.

Okulia okunyingi. “Makukakala ovilia ovinyingi kombanda yohi. Alo umwe kononthongo-nthongo mbo nomphunda makukakala okulia okunyingi.” — Salmo 72:16.

Onondyuo mbukahi nawa novilinga vihambukiswa. “Mavakatunga onondyuo avakakala-mo, mavakatuika omiti avakalia ovinyango viavio. . . . mavakalinga ovilinga vieeta ehambu liotyotyili.” — Isaías 65:21, 22.

Okuti ove uhanda okutala ovipuka ovio aviho? Ovipuka ovio mavikakala viotyotyili.

Atuho hono tuvela iya tunkhia, mahi ovipuka ovio kamavitualako. Mokonda yofeto yotyilikutila tyeyovo tya Sesusi, apa katutu Huku makaavela ovanthu ovipuka oviwa. Ombimbiliya ipopia okuti, ‘kese omunthu ukala nekolelo mwe kamakahanyua-ko, mahi makakala nomuenyo uhapu.’ (Suau 3:16) Otyo matyikaeta-tyi?

Kamakukakala vali onombela. “Nawike kombanda yohi makati: ‘Ame navela.’ Ovanthu vakala kombanda yohi, mavakaevelwa ononkhali mbavo.” — Isaías 33:24.

Kakukakala vali ononkhia. ‘Huku makamanako ononkhia apeho, iya Ohamba Tatekulu Siovaa, makasekuna ononkhuka movipala aviho.’ — Isaías 25:8.

Ovanthu mavakala-ko apeho nomuenyo. “Otyiawa Huku aava, omuenyo uhapu menyina lya Kilisitu Sesusi Tatekulu yetu.” — Ova Loma 6:23.

Vana vanyima mavakakala vali nomuenyo. “Makukakala etutilo liovaviuki na vana vehevaviuki.” (Ovilinga 24:15) Mokonda Huku oe waava omona wae, mekevetutilisa avakala vali nomuenyo.

Oñgeni Huku meketyilinga?

Opo Huku alinge etyi ahandela ovanthu, wapaka-ko outumini iya Kilisitu Sesusi oe omutumini watyo. (Salmo 110:1, 2) Outumini oo, oo Sesusi alongesile ovalongwa vae. Wevelongesile okuti tyina velikuambela vena okupopia okuti: “Tate yetu keulu, . . . Ouhamba wove uye.” — Mateusi 6:9, 10.

Ouhamba wa Huku maukatumina ouye auho, aumaneko ononkhumbi ambuho. Ouhamba oo, outumini ukahi vali nawa tyipona omautumini aeho ekahiko hono! Otyo Sesusi eililile pano pohi, aivisa “onondaka onongwa Mbouhamba,” tupu alongesa ovalongwa vae navo vetyilinge. — Mateusi 4:23; 24:14.

Mokonda Siovaa Huku uhole unene ovanthu, wapopia okuti mekevelingila-ko ovipuka ovio oviwa. Okuti ovipuka ovio, kavikuavela ondundo umunoñgonoke vali nawa? Etyi moholovona okulinga matyikuetela-tyi? Onthele mailandulako maityipopi vali nawa.