No walay problemam, seguradon ilaloan mo ya tulongan ka na kaarom. Kanian wala ray mangibabaga ya agtayo kaaro so Dios ta agto tayo kuno tutulongan. Pero diad tua, dakdakel lay ginawa na Dios parad sikatayo, tan wala ni ray gawaen to pian solusyonan so amin ya problema tan kairapan ya dadalanen tayo natan. Anto ni ray gawaen na Dios?

Panampoten na Dios so amin ya kaugsan diad pangekal tod lapuan na satan. Oniay ibabaga na Biblia ya lapuan na kaugsan: “Say interon mundo et walad pakayari na samay mauges.” (1 Juan 5:19) Satan ya “mauges” et anggapoy arum noag samay tinawag nen Jesus ya “manuley na sayan mundo,” si Satanas a Diablo. (Juan 12:31) Say manunan sengegan na mauge-uges ya kipapasen diad dalin et lapud iimpluensyaan nen Satanas iray totoo. Antoy gawaen na Dios?

Agmanbayag et onkiwas lay Jehova a Dios panamegley na Anak to, si Jesu-Kristo, pian “napaandi to imay walaay pakayarin mamatey, salanti, say Diablo.” (Hebreo 2:14; 1 Juan 3:8) Diad tua, ibabaga na Biblia ya amta na Diablo ya “antikey lay panaon to” antis ya naderal. (Apocalipsis 12:12) Deralen met na Dios so amin ya manggagaway kaugsan.—Salmo 37:9; Proverbio 2:22.

No anggapo lay mauges diad dalin, onkiwas so Manamalsa pian sumpalen so gagala to parad totoo tan ed dalin manlapu lad gapoy gapo. Anto ray tatalaranan tayo?

Permanentin kareenan tan seguridad. “Saray mauyamo et tawiren day dalin, tan manliket iran maong ed agnaparaan a kareenan.”—Salmo 37:11.

Dakdakel so masustansian naakan. “Dakdakel so anien ya ilik diad dalin; say toktok na kapalandeyan et napanopano.”—Salmo 72:16.

Marakep iran ayaman tan makapaliket ya trabaho. “Mangipaalagey ira na kaabungan tan manayam ira ditan, tan mantanem ira na kaubasan tan kanen day bunga to. . . . Sigpot a panliketan na saray pinilik so kimey na saray lima ra.”—Isaias 65:21, 22.

Kasin labalabay mo lan nagawa iratan? Agmanbayag et ontan lay bilay na amin kada agew.

Amin a totoo natan et mansasakit tan ompatey lanlamang, balet aliwa lan ontan so nagawad arapen. Magano lan iter na Dios so gunggona na dondon bagat nen Jesus pian “kada sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.” (Juan 3:16) Antoy resulta?

Anggapo lay mansakit. “Anggapoy manaayam ditan a mangibagay: ‘Mansasakit ak.’ Naperdona lay kasalanan na saray totoon manaayam ed satan a dalin.”—Isaias 33:24.

Agla ompatey iray totoo. “Akmonen to so patey ya anggad angga, tan punasen na Soberanon Katawan a Jehova iray lua ed amin a kalupaan.”—Isaias 25:8.

Manbilay ya andi-anggaan iray totoo. “Say regalon iiter na Dios et say bilay ya andi-anggaan diad panamegley nen Kristo Jesus a Katawan tayo.”—Roma 6:23.

Nabilay lamet iray inatey. “Walay kioli na saray matunong tan saray agmatunong.” (Gawa 24:15) Anggan saray inatey la et minabang ed regalo na Dios ya dondon.

Panon ya sumpalen na Dios irayan amin?

Sumpalen na Dios so gagala to parad totoo tan ed dalin panamegley na sakey ya gobierno ed tawen, ya say pinili ton Manuley et si Kristo Jesus. (Salmo 110:1, 2) Atan imay gobierno odino panarian ya imbangat nen Jesus ed saray patumbok to ya ipikasi da: “Ama mi a walad tawen, . . . onsabi la komon so Panarian mo.”—Mateo 6:9, 10.

Uleyan na Panarian na Dios so interon dalin tan ekalen na satan so amin ya problema tan kairapan. Sayan Panarian so sankaabigan ya gobierno! Atan so rason no akin ya ginawa nen Jesus so anggaay nayarian ton ipulong so “maong a balita na Panarian” legan na ministeryo to diad dalin, tan ingganggan to ray disipulo to ya ontan met so gawaen da.—Mateo 4:23; 24:14.

Lapud baleg so panangaro nen Jehova a Dios ed saray totoon pinalsa to, impromisa ton gawaen to irayan amin parad sikara. Agta lapud satan et labay mon mas nakabat so Dios tan mikaaro ed sikato? Antoy epekto ed sika no ontan so gawaen mo? Ipaliwawa itan ed onsublay ya artikulo.