Wan du en Schwierichkjeiten wieescht, wurscht du secha nich twiewlen, daut een gooda Frint die halpen wudd. Eenje sajen oba, daut Gott nich een Frint es, wiels dee nich feelen, daut Gott waut deit toom an halpen. Oba rajcht jesajcht haft Gott aul väl fa ons jedonen. Un hee woat uk met aul de Trubbels un Lieden waut doonen, waut wie vondoag dän Dach haben. Waut woat Gott doonen?

Gott woat met daut een Enj moaken, von wua aulet schlajchte häakjemt. De Schreft wiest, von wua daut häakjemt, wiels dee sajcht, daut “de gaunze Welt vom beesen beharscht woat” (1. Johanes 5:19). Met dän “beesen” es dee jemeent, waut äwa “dise Welt Jewault eeft”, soo aus Jesus säd, aulsoo de Soton (Johanes 12:31). De Soton brinjt de Menschen bat doa, schlajchtet to doonen; doawäajen es daut soo schlemm enne Welt. Waut woat Gott doonen?

Jehova Gott woat boolt waut doonen toom derch sienen Sän Jesus Christus “dän beesen Fient krauftloos moaken” (Hebräa 2:14; 1. Johanes 3:8). De Schreft sajcht mau rajcht, daut de beesa Fient weet, daut hee “mau eene korte Tiet” haft, bat hee venicht woat (Openboarunk 12:12). Gott woat uk aul deejanje aufschaufen, waut schlajchtet veuasoaken (Psalm 37:9; Spricha 2:22).

Wan Gott aulet beese oppe Ieed oppjeriemt haft, dan woat hee sien Väanämen gaunz erfellen, daut volkomne Menschen eewich en een Paradies oppe Ieed läwen kjennen. To waut kjenn wie ons freien?

Fräd un Sechaheit, waut blift. “Oba de deemootje woaren daut Launt oawen, un sikj to de groote Fräd freien” (Psalm 37:11).

Äwajenuach jesundet Äten. “Un daut Sot, waut jie opp daut Launt jeseit haben, woat hee met Räajen wesren, soo daut jie goot to äten haben woaren, von daut waut jun Aka junt drajcht. Un jun Vee woat dan opp groote Weiden grosen gonen” (Jesaja 30:23).

Een scheenet Tus un Oabeit, waut tofräd moakt. “Dee woaren Hiesa buen un en dee wonen; see woaren Wiengoades aunplaunten un von de Frucht äten. . . . Waut miene jewälde buen, woaren see lang goot brucken kjennen” (Jesaja 65:21-22).

Wurscht du die soont wenschen? Soont woa wie boolt jieda Dach beläwen kjennen.

Jieda eena von ons kaun krank woaren ooda stoawen, oba daut woat sikj boolt opphieren. Gott woat boolt dän Nutzen von Jesus sien Opfa brucken, soo daut “aul dee, dee aun am jleewen, nich veloaren gonen, oba daut eewje Läwen haben” (Johanes 3:16). Waut woat doabie rutkomen?

Krankheiten woat daut nich mea jäwen. “Kjeena von june Menschen woat sajen: ‘Ekj sie nich jesunt’; de Menschen, dee doa sent, woaren äare Sinden vejäft sennen” (Jesaja 33:24).

De Doot woat de Menschen nich mea ploagen. “Gott de HAR woat opp emma dän Doot wajchnämen. Hee woat aulem en sien Volkj de Tronen wajchweschen” (Jesaja 25:8).

De Menschen woaren fa emma läwen. “Gott oba schenkjt daut eewje Läwen en Christus Jesus, onsen Harn” (Reema 6:23).

Dee, waut jestorwen sent, woaren wada oppstonen. “En de Tookunft [woaren] de jerajchte uk de ojjerajchte vom Doot oppstonen” (Aposteljeschicht 24:15). Dise woat daut Leesjelt togood komen, waut Gott jejäft haft.

Woo woat Gott aul dit erfellen?

Gott woat sien Väanämen fa de Ieed un de Menschheit derch eene himlische Rejierunk erfellen, wua Jesus Christus de Kjennich es (Psalm 110:1-2). Dit es dee Rejierunk ooda Kjennichrikj, om dee Jesus siene Nofolja lieed bäden. Hee säd: “Ons Voda em Himmel . . . lot dien Rikj komen” (Matäus 6:9-10).

Gott sien Kjennichrikj woat äwa de Ieed rejieren un woat aule Weedoag un Lieden wajchnämen. Dit Rikj es de baste Rejierunk, waut de Menschen jeemols kunnen haben. Doawäajen bemieejd Jesus sikj sea, “daut Evangelium vom Rikj” bekaunttomoaken, aus hee sienen Deenst oppe Ieed derchfieed, un hee säd, siene Jinja sullen dautselwje doonen (Matäus 4:23; 24:14).

Wäajen Jehova Gott de Menschen soo sea leeft, haft hee vesproaken, daut hee aul dit besondre fa an doonen woat. Brinjt die dit nich bat doa, am kjanen to lieren un noda to komen? Waut woascht du doabie haben, wan du daut deist? De näakjsta Artikjel moakt daut kloa.