Sapos iu insaed hard taem, bae iu hapi sapos wanfala gud fren duim samting for helpem iu. So samfala sei, from God no helpem olketa, God hem no fren bilong olketa. Bat tru samting nao, God duim finis staka samting for helpem iumi, and tu, bae hem finisim evri problem and hard taem wea iumi kasem distaem. Wanem nao God bae duim?

God bae finisim rut bilong evri nogud samting. Bible storyim rut bilong evri nogud samting hia taem hem sei: “Full world hem stap long paoa bilong Satan.” (1 John 5:19) Jesus sei “man wea rulim disfala world,” hem nao Satan. (John 12:31) Satan nao bihaenem evri nogud samting wea happen long earth. Hao nao bae God finisim Satan?

Klosap nao bae Jehovah God iusim Son bilong hem, Jesus Christ, for “finisim Devil, wea hem nao mekem pipol for dae.” (Hebrew 2:14; 1 John 3:8) Bible sei Satan tu savve “hem garem lelebet taem nomoa” bifor God finisim hem. (Revelation 12:12) God bae finisim tu evri pipol wea duim olketa nogud samting.—Sams 37:9; Provebs 2:22.

Bihaen God finisim evri nogud samting wea happen long earth, bae hem duim samting for mekem plan bilong hem for iumi olketa man and disfala earth for kamap tru. Wanem nao bae happen long datfala taem?

Garem peace and stap sef for olowe. “Olketa pipol wea i hambol, bae olketa onam lan wea [Jehovah] hemi bin promisim fo olketa. Nao bae olketa ya i hapi, bikos olketa stap gudfala.”—Sams 37:11.

Garem staka healthy kaikai. “Letem lan blong mifala hemi garem plande kaikai long hem, an bae olketa hil i fulap fogud long kaikai.”—Sams 72:16.

Garem gudfala haos and waka wea mekem man satisfae. “Bae olketa pipol save bildim olketa haos blong olketa, an olketa seleva nao bae i stap insaet. . . . An bae olketa save plantem olketa plantesin long grep, an olketa seleva tu bae i dringim waen long hem. . . . Olketa samting wea olketa seleva i wakahad long hem, bae olketa seleva tu save yusim an hapi long hem.”—Aesaea 65:21, 22.

Hao iu laek for lukim taem wea olketa samting hia hem happen? Klosap nao evriwan bae enjoyim kaen laef olsem.

Distaem evriwan savve sik and gogo olketa dae tu, bat klosap nao bae no eniwan sik and dae. God bae “mekem evriwan wea showimaot faith long [Jesus] no dae bat kasem laef olowe” bikos long datfala ransom wea Jesus provaedem. (John 3:16) Wanem nao bae kamaot from datwan?

Sik bae finis. “No eniwan long [“land,” NW] ya bae hemi talem dat hemi sik, bikos [Jehovah] nao bae hemi fogivim olketa pipol blong disfala ples, an tekemaot evri sin blong olketa.”—Aesaea 33:24.

No eniwan bae dae. “Lod [Jehovah] nao bae hemi finisim dae, an draemap tias blong evriwan.”—Aesaea 25:8.

Pipol bae laef olowe. “Present wea God givim hem laef olowe bikos long samting wea Lord bilong iumi Christ Jesus hem duim.”—Rome 6:23.

Pipol wea dae finis bae laef bak. “God bae mekem pipol wea raeteous and pipol wea no raeteous for laef bak.” (Acts 24:15) Ransom wea God givim olsem present hem nao openem wei for pipol wea dae finis for laef bak.

Hao nao bae God mekem evri samting hia for happen?

Gavman bilong God wea stap long heven and Jesus nao rulim, hem nao bae mekem plan bilong God for iumi olketa man and disfala earth for kamap tru. (Psalm 110:1, 2, NW) Jesus teachim olketa follower bilong hem for prea for datfala gavman, or kingdom. Hem sei: “Dadi bilong mifala long heven . . . Mifala laekem Kingdom bilong iu for kam.”—Matthew 6:9, 10.

Kingdom bilong God bae rul ovarem full earth and bae finisim evri nogud samting wea spoelem pipol. Kingdom hia hem best gavman wea winim eni gavman wea rulim olketa man! Dastawe Jesus waka hard for talemaot “gud nius abaotem Kingdom” taem hem long earth and hem talem olketa disaepol for duim sem samting tu.—Matthew 4:23; 24:14.

Jehovah God promis for duim olketa nambawan samting hia bikos hem lovem tumas iumi olketa man. Waswe, datwan mekem iumi laek for savve long hem and for fren witim hem? Sapos iu duim olsem, wanem gud samting nao bae iu kasem? Next article bae storyim diswan.