Kʼacha tataqa llakiypi kashajtinchej chay rato yanapawanchej. ¿Ajinachu Diosninchej? Wakin runasqa ninku: “Diosqa noqata ni imapi yanapawanchu, nichá wawanchu kani”, nispa. Chaywanpis Diosninchejqa tukuyninchejta ashkhataña yanapawanchej. Tumpamantawantaj payqa tukuy problemasninchejta, llakiyninchejtawan chinkachenqa. Imatachus ruwananta yachakuna.

Jehová Diosqa kay llakiy kausayta tukuchinanpaj, pichus chaypaj juchayojta chinkachenqa. Bibliaqa nin, mundontinmanta runas “Kuraj Supaypa makinpi kasqankuta” (1 Juan 5:19). Jesuspis ‘kay mundota Supay kamachishasqanta’ nerqa (Juan 12:31). Kay mundopi llakiykuna kananpaj, Satanás juchayoj. ¿Imatá Dios ruwanqa?

Tumpamantawan Jesusman atiyta qonqa, “Kuraj Supayta chinkachinanpaj, pichus wañuchinanpaj atiyniyoj, chayta” (Hebreos 2:14; 1 Juan 3:8). Biblia nisqanman jina, Kuraj Supaypis yachan “paypaj pisi tiempollaña kasqanta” (Apocalipsis 12:12). Jehová Diosqa sajra runastapis chinkachillanqataj (Salmo 37:9; Proverbios 2:22).

Jehová Diosqa Supayta chinkachiytawan, imatachus qallariypi runaspaj munarqa, chayta juntʼanqa. Chay juntʼakojtin, ¿imaynataj kausay kanqa?

Ni imamanta manchachikuspa, allinta kausakusunchej. “Llampʼu sonqoyojkunatajrí kay pachata herenciata jina japʼenqanku, allin kawsaypitaj kusisqa kanqanku” (Salmo 37:11).

Ashkha mikhunayoj kasunchej. ‘Jallpʼaqa sumajta poqonqa, Diosninchejtaj bendeciwasunchej’ (Salmo 67:6).

Kʼachitu wasiyoj, sumaj trabajoyojtaj kasunchej. “Chaypi wasista ruwakuspa, tiyakonqanku. Uva huertasta churanqanku, poqoynintataj mikhonqanku”. Diospa ajllasqasnenqa “makisninkoj tarpusqanta mikhurikonqanku” (Isaías 65:21, 22).

¿Chay jinata kausakuyta munawajchu? Tumpamantawan chay sumaj kausay kanqapuni.

Kay tiempopeqa, tukuypis onqonchej, wañunchej ima. Jinapis Jehová Diosqa chayta tumpamantawan chinkachenqa. Payqa Wawan Jesusta “qorqa, ajinamanta pillapis paypi creejqa mana wañunanpaj, manachayqa wiñay kausayniyoj kananpaj” (Juan 3:16). Jesús kausayninta qosqanrayku, kay bendiciones kanqa.

Manaña onqoykuna kanqachu. “Mana pipis nenqachu: Onqosqa kani, nispaqa”. Runaspa “juchasninku pampachasqa kanqa” (Isaías 33:24).

Manaña wañuy kanqachu. “Payqa wañuyta wiñaypaj chinkachenqa, tukuypa waqaynintataj Tukuy Atiyniyoj Tata Diosqa pichanqa” (Isaías 25:8).

Wiñaypaj kausasun. “Diospa regalonrí wiñay kausay, Señorninchej Cristo Jesusnejta” (Romanos 6:23).

Wañusqas kausarimonqanku. ‘Cheqan runasta, mana cheqan runastapis Dios kausarichimonqa’ (Hechos 24:15). Jesús kausayninta qosqanrayku, wañusqaspis kausarinponqanku.

¿Imaynatá chayta Jehová Diosninchej juntʼanqa?

Jehová Diosqa munayninta juntʼananpaj, uj Gobiernota sayarichenqa. Chay Gobiernopitaj Jesusta presidenteta jina churanqa (Salmo 110:1, 2). Jesuspis yachachisqasninman chay Gobiernomanta yachacherqa. Payqa ajinata mañakunankuta nerqa: “Cielopi kashaj Tatayku”, “Gobiernoyki jamuchun”, nispa (Mateo 6:9, 10).

Diospa Gobiernonqa kay jallpʼata gobernamonqa, chinkachenqataj tukuy llakiyta, ñakʼariytawan. Chay Gobiernoqa mana kay mundomanta gobiernos jinachu kanqa. Jesusqa Diospa Gobiernonmanta “sumaj willaykunata willaspa” purerqa. Discipulosninmanpis chayta ruwanankuta nerqa (Mateo 4:23; 24:14).

Jehová Diosqa mayta munakuwasqanchejrayku, chay sumaj imasta qonawanchejta niwanchej. Chayta yachay, ¿manachu payman qayllaykunaykipaj yanapasunki? Payman chimpanki chayqa, ashkha bendicionesta japʼinki. Chayta qhepan paginapi yachakunki.