Juk alli amïguqa, mana allikunapa pasanqantsik höram yanapamantsik. Diosqa noqantsikpaq mana yarpachakunqanta pensarmi, mëtsikaq nunakunaqa amïguntsik mana kanqanta niyan. Tsënö kaptimpis, Diosqa imëkatanam noqantsikrëkur rurashqa; y shamoq tiempuchöqa, llapan problëmakunata y sufrimientukunatam ushakätsimunqa. Tsëpaqqa, ¿imataraq Dios ruranqa?

¿Imanötaq Diosqa llapan mana alli rurëkunata ushakätsimunqa? Bibliachömi kënö nin: “Mana cäsukoq nunakunaqa Satanaspa makinchömi këkäyan” (1 Juan 5:19). Bibliachö ninqannöpis mana alli rurëkunata ushakätsinampaqqa, Satanastaran puntata ushakätsinqa. Satanasqa, “mana cäsukoq nunakunapa” gobernaqnin kanqantam Jesusqa nirqan (Juan 12:31). Kanan witsanqa mëtsika problëmakuna kan, Diablupa makinchö kë Patsa kaptinmi. Y ¿imataraq Diosqa ruramunqa?

Ichikllachönam Jehoväqa, Tsurin Jesuswan “wanïman chätsikïta puëdeqta, juk parlakïchöqa Diabluta” ushakäratsinqa (Hebrëus 2:14; 1 Juan 3:8). Bibliachöqa rikätsimantsik, ushakänampaq “wallka tiempullana” pishinqanta Diablu musyanqantam (Revelacion 12:12). Y Diosqa llapan mana alli ruraq nunakunatapis ushakätsinqam (Salmus 37:9; Proverbius 2:22).

Llapan mana alli rurëkunata ushakäratsirmi, Teytantsikqa nunakunapaq y Patsapaq änikunqanta cumplinqa. Y tsë witsanqa, ¿imanötaq kawënintsik kanqa?

Yamë y segürum kawakushun. “Manshu nunakunaqa patsatam chaskiyanqa, y chipyëpa yamë këta tarirmi alläpa kushishqa kawakuyanqa” (Salmus 37:11).

Mëtsika y alli mikïmi kapamäshun. “Chakrakunachöqa mëtsika gränu mikïmi kanqa, hasta jirkakuna jananchömi alläpa atska kanqa” (Salmus 72:16).

Alli trabäjuyoq y shumaq wayiyoqmi kashun. “Wayikunatam rurayanqa y tsëchömi täräyanqa; üvastam muruyanqa, y wayunqantam mikuyanqa. [...] Akrashqäkunaqa makinkunawan llapan rurayanqantam kikinkuna utilizäyanqa” (Isaïas 65:21, 22).

Tsënö kawakïqa, ¿gustashunkimantsuraq? Kë änikïkunaqa ichikllachönam cumplikärinqa.

Kanan witsanqa llapantsikmi qeshyapäkuntsik y wanuntsik, peru tsëqa ichikllachönam cambiarinqa. Jesus kawëninta qoshqa kanqanrëkurmi, Jehoväqa “pëman markäkuyanqanta rikätsikoqkuna mana ushakätsishqa kayänampaq, sinöqa imëyaqpis kawëyoq kayänampaq” permitinqa (Juan 3:16). Tsëqa, ¿imanöraq kawë kanqa?

Tukï cläsi qeshyakunam ushakanqa. “Manam ni pï ninqanatsu: “Qeshyämi”. Patsachö täraq nunakunaqa jutsankunapita perdonashqam kayanqa” (Isaïas 33:24).

Manam pipis wanunqanatsu. “[Diosqa] rasumpam wanïta chipyëpa ushakäratsinqa, y Llapan Autoridäyoq Señornintsik Jehovämi weqinkunata nawinkunapita pitsarapunqa” (Isaïas 25:8).

Nunakunaqa mana wanushpam kawayanqa. “Dios qokunqan qarëqa Señornintsik Cristu Jesusrëkur imëyaqpis kawëmi” (Romänus 6:23).

Wanushqakunam kawariyämunqa. ‘Alli kaqta ruraqkuna y mana allita ruraqkunapis kawariyämunqam’ (Hëchus 24:15). Jesus kawëninta qonqanrëkurmi, wanushqakunapis kawarimïta puëdiyanqa.

 ¿Imanötaq Diosqa këkunata cumplimunqa?

Nunakunapaq y Patsapaq änikunqanta cumplimunampaqqa, Diosqa juk Gobiernutam ciëluchö churashqa, y tsë Gobiernuchöqa Jesusmi mandakëkämun (Salmus 110:1, 2). Tsë Gobiernupaq parlarmi, Jesusqa qateqninkunata kënö mañakuyänampaq yachatsirqan: “Ciëluchö këkaq Teytalläkuna, [..] Gobiernïki shamutsun” (Mateu 6:9, 10).

Diospa Gobiernunmi kë Patsata mandakamunqa y llapan nanatsikïkunata y sufrimientukunatam ushakätsimunqa. Kë Gobiernuqa, llapan gobiernukunapitapis mas allim kanqa. Tsërëkurmi Jesusqa, tsë “Gobiernumpita alli willakïkunata willakurnin” alläpa kallpachakurqan y qateqninkunatapis tsënölla rurayänampaqmi mandarqan (Mateu 4:23; 24:14).

Alläpa kuyamarnintsikmi, Jehoväqa kë llapanta ruramunampaq änimashqantsik. ¿Manaku tsërëkur mas reqita munantsik y amïgun kanapaq kallpachakuntsik? Y amïgun kashqaqa, ¿ima bendicionkunatataq chaskishun? Qateqnin kaq yachatsikïchömi tsëpita yachakushun.