Kuyawaqninchik amistadninchikqa sasachakuypi kaptinchikpas yanapawanchikmi. Chaynam Jehova Diospas kuyawasqanchikrayku tukuyta ruwarqa yanapawananchikpaq, hamuq tiempopipas ñakarichiwaqninchikkunatam chinkachinqa. ¿Imakunatam Diosqa ruwanqa?

¿Pitaq ñakarichiwanchik? Bibliam kaynata nin: “Diosta mana yupaychaq runakunam ichaqa llapallanku satanaspa munaychakusqan kachkanku”, nispa (1 Juan 5:19). Jesusmi nirqa Dios mana yupaychaq runakunapi satanas munaychakusqanmanta (Juan 12:31). Chayraykum runakunaqa tukuywan ñakarinchik. Chaynaqa, ¿imatam Jehova Diosqa ruwanqa?

Jehova Diosmi churin Jesusman atiyta quykun satanasta ‘pasaypaqta chinkachinanpaq’ (Hebreos 2:14; 1 Juan 3:8). Diablomantam biblia nin: “Yachakunmi pisi tiempoyuqllaña kasqanta”, nispa. Arí, pisi tiempollamantañam diabloqa chinkachisqa kanqa (Apocalipsis 12:12). Diosqa chinkachinqataqmi mana allin ruwaq runakunatapas (Salmo 37:9; Proverbios 2:22).

Mana allin kaqkunata chinkarachispanñataqmi, Jehova Diosqa allpa pachata allichanqa allin runakuna chaypi wiñaypaq kawsakunankupaq. ¿Imakunatam Diosqa quwasun?

Hawkam kawsakusun. Bibliam nin: ‘Llampu sunquyuqkunam ichaqa herenciankupaq allpata chaskinqaku, paykunaqa kusikuywanmi hawkayaypi kawsanqaku’, nispa (Salmo 37:11).

Manam pipas yarqaymantaqa kasunchu. Bibliam nin: ‘Kay pachapiyá achka-achka kawsaykuna qispichun. Muqu chakrakunapiyá sumaqllataña kawsaykuna aywityachun’, nispa (Salmo 72:16).

Wasiyuqmi kasun chaynataq munasqanchik llamkaypim llamkasun. Bibliam nin: “Wasikunatam hatarichinqaku hinaspam chaypi yachanqaku, uvaskunatam plantanqaku hinaspam rurunta mikunqaku. [...] Akllakusqaykunaqa llamkasqankupa ruruntam mikunqaku”, nispa (Isaias 65:21, 22).

Mayna sumaqmi chaypi kawsakuyqa kanqa.

Kunan tiempopiqa llapallanchikmi imawanpas unqunchik chaynataq wañunchik. Ichaqa Jehova Diosta haykam kasukuqqa hinaspa Jesucristota qatipakuqqa wiñaypaqmi kawsasunchik (Juan 3:16).

Manañam pipas unqunqañachu. Bibliam nin: ‘Manañam mayqannikichikpas ninkichikñachu: “Unquchkanim” nispaqa. Diosmi chaypi yachaqkunapa huchanta pampachanqa’, nispa (Isaias 33:24).

Manañam pipas wañunqañachu. Bibliam nin: ‘Tayta Diosmi wañuyta wiñaypaq chinkachinqa, lliw runapa wiqintam pichanqa’, nispa (Isaias 25:8).

Wiñaypaqñam kawsakusun. Bibliam nin: “Diospa regalonmi ichaqa señorninchik Cristo Jesusrayku wiñaypaq kawsakuy”, nispa (Romanos 6:23).

Wañuqkunam kawsarimunqaku. Bibliam nin: ‘Allin ruwaq hinaspa mana allin ruwaq runakunam kawsarimunqaku’, nispa (Hechos 24:15). Arí, Jesuspa wañukusqanraykum lliw wañukuqkunapas kawsarimunqaku.

¿Imaynatam Diosqa chaykunata ruwanqa?

Jesusmi kay pachapi kaspan qatiqninkunaman yachachirqa Diosta kaynata mañakunankupaq: “Hanaq pachapi taytayku. [...] Munaychakuynikiyá hamuchun”, nispa (Mateo 6:9, 10). Jehova Diosmi allpa pachapi munaynin ruwakunanpaq Jesucristoman atiyta quykun (Salmo 110:1, 2).

Diosqa munaychakuyninwanmi tukuy mana allinkunata chinkachinqa. Chaymanta willakunanpaqmi Jesus kay pachapi kaspanqa anchata kallpanchakurqa hinaspam qatiqninkunamanpas kamachirqa Diospa munaychakuyninmanta willakunankupaq (Mateo 4:23; 24:14).

Jehova Diosqa kuyawasqanchikraykum tukuy chaykunata quwasunchik. Kayqa kallpanchawanchikmi payman asuykunanchikpaq chaynataq kuyachikunanchikpaqpas. ¿Imaynatam chayqa yanapawasun? Chaymantam qatiqnin yachachikuypi yachasun.