Shuj ali amigoca ñucanchicuna imapash llaquicunata charijpica ayudanllami. Chaimandami huaquingunaca llaquicunapi cajpica Taita Diosca na ayudanllu, na ñucanchi amigochu can nishca. Shinapash Taita Diosca ñami ashtacata ñucanchicunamandaca rurashca. Shamuj punllacunapicarin tucui llaquicunatami tucuchisha nin. Shinaca ¿imatata ruragrin?

Taita Diosca nalita rurachijtami tucuchigrin. Bibliapica “cai pachapajtalla rurashpa causajcunataca, diablomi tucuicunata mandajun” nin (1 Juan 5:19). Jesuspashmi “cai pachapajtalla rurachishpa mandajca” Satanás Diablomi can nirca (Juan 12:31). Diablo cai mundota mandajushcamandami, ashtaca llaquicuna tiashca. Chai llaquicunata tucuchingapaca ¿imatata Taita Diosca ruragrin?

Ñallami Jehová Diosca paipa Churi Jesusta utilizashpa “huañuita mandana ushaita charij diablota” tucuchinga (Hebreos 2:14; 1 Juan 3:8). Bibliapica Diabloca paipa tucuchi tucuna ‘punlla’ chayamujtaca yachan ninmi (Apocalipsis 12:12). Taita Diosca nalita ruraj gentecunatapashmi tucuchigrin (Salmo 37:9; Proverbios 2:22).

Nalicunata tucuchishca jipaca, Jehová Diosca cai Alpapi gentecuna cushilla causachunmi paipa munaita pactachinga. Chai pactarijpica ¿imashinata causashun?

Tranquilo, ali causaimi tianga. “Na jariyajcunami, [Alpataca] japinga. Casilla ali causaihuanmi, ninanda cushijunajunga” (Salmo 37:11).

Gentecunaca ñana yarjai pasangachu. “Pambapipash, jahua urcu umacunapipash, granocuna tiachunmi maqui jundata shitanajunga” (Salmo 72:16).

Juyailla huasicuna, gushtashca trabajocunami tianga. ‘Huasicunata shayachishpami, chaipi causanajunga. Uvas chagrata tarpushpami, chaipi fucushcata micushpa causanajunga. Ñuca agllashcacunaca, paicunapaj maquihuan imatalla rurashcahuanmi cushijushpa causanajunga’ (Isaías 65:21, 22).

Ñallapachami chai juyailla, ali causaiguta charipashun.

Cunan punllacunapica tucuicunallatami imapash ungüi japijpi, huañunchi. Shinapash ñana shina cangachu. Jesús huañushcamandami Jehová Diosca paipa munaita pactachinga. Chaimandami Juan 3:16​pica “pipash [Jesuspi] crishpaca, na chingaita chingagringachu, ashtahuangarin causaitami causagringa” nin. Shinaca ¿imashinata causashun?

Tucui ungüicunami tucuringa. “Chaipi causajcunaca, pipash na: ‘Ñucaca huañujunimi’ ninajungachu” (Isaías 33:24).

Huañuica ñana tiangachu. “Huañuitapash, causaita causaicamanmi tucuchinga. Mandaj Jatun [Jehová] Diosca, tucuicunapaj ñavimandami viquita fichanga” (Isaías 25:8).

Para siempremi causashun. “Ñucanchi Apunchi Cristo Jesusmandami, causaita causagrinata Taita Diosca yanga caramujun” (Romanos 6:23).

Huañushcacunaca cutinmi causaringa. ‘Imatapash cashcatapacha rurajcuna, imatapash cashcatapacha na rurajcuna huañushcatapash Taita Diosmi causachinga’ (Hechos 24:15). Jesús paipa causaita cushcamandami, huañushcacunaca causari ushanga.

Chaita pactachingapaca ¿imatata Taita Diosca ruranga?

Taita Diosca paipa munaita pactachingapami jahua cielopi shuj alipacha gobiernota churashca. Chaipica Jesustami mandachun mingashca (Salmo 110:1, 2). Chai reinomanda o gobiernomanda mañachunmi Jesusca paipa catijcunataca Mateo 6:9, 10​pica yachachirca. Chaipica ninmi: ‘Jahua pachapi tiajuj ñucanchi Taitalla, can mandanaca, ucha chayamuchunmi munanchi’ nishpa.

Diospa Reino cai Alpapi mandajujpica tucuilla llaquicunata, nanaicunatami tucuchinga. Gentecunaca shina alipacha gobiernota charinataca yaitallapash na yashcachu. Jesús cai Alpapi cashpaca, chai Reinomandami ‘ali villaicunata villachishpa’ purirca. Paipa catijcunatapash chaitallata rurachunmi mandarca (Mateo 4:23; 24:14).

Jehová Diosca gentecunata juyaimandami, cai juyailla causaiguta caramusha nin. Shinaca ¿nachu paimanda ashtahuan yachajushpa, paipa ali amigo cangapaj munapangui? Shina rurashpaca ¿ima bendiciongunatata chasquipashun? Chaitaca cati temapimi ricupashun.