Qarru iillannohe yannara, muli jaalikki rahe iillahera hasiˈrattoti egennantinote. Mitu manni Maganu insa kaaˈlate mittoreno assinokkiha lawannonsa daafira, isi jaalansa ikkinokkita coyidhanno. Ikkollana, Maganu ninkera yee duucha coye assino; albillitte isi iillanni noonke qarra baala hunanno. Maganu albillitte maa assanno?

Maganu bunshete buicho mooshshanno. Qullaawu Maxaafi “Tini gobba [woy, alame] gudisante bushunni amadantino” yee bunshete buicho ayetiro kulanno. (1 Yohaannisi 5:19) ‘Busha’ yinihu, Yesuusi ‘tenne alame gashshaancho’ yiiho Sheexaane Daawuloosiiti. (Yohaannisi 12:31) Mannu ooso qarrantanni noohu, alame gashshe noohu Sheexaane ikkino daafiraati. Maganu maa assannoyya?

Maganu Yihowa muli yanna giddo, Yesuusi Kiristoosi widoonni “reyote aana roorre afiˈrinoha Sheexaane” hunanno. (Ibiraawoota 2:14; 1 Yohaannisi 3:8) Isinni Qullaawu Maxaafi Sheexaanu umisi “shiima yanna calla gattinosita” afinota kulanno. (Yohaannisi Ajuuja 12:12) Qoleno Maganu bunshe assitannore baala hunanno.—Faarso 37:9; Lawishsha 2:22.

Kalaqaanchinke bunshe baala uullate aaninni huni gedensaanni, mannu oosoranna uullate hedinore wonshanno. Ikkina albillitte mayi ikkanno yine hexxa dandiineemmo?

Geedote keere. “Shaqqaddu . . . baatto ragidhanno; atootenna keere afidhe hagiidhitanno.”—Faarso 37:11.

Una ikkitannota falakkino sagale. ‘Baatto gide laashshitanno; ilaallate aana jajju woˈmanno.’—Faarso 72:16.

Injiino minenna hagiirsiisanno looso. “Manniˈya, mine miˈne heeˈranno; woyineno kaasiˈre laalose itanno. . . . Loosiˈrinorinnino seeda diro hagiidhanni heeˈranno.”—Isayaasi 65:21, 22.

Togoo yanna quqquxante agadhatto? Muli yanna giddo baalunku barru baala togoo heeshsho heeˈneemmo.

Yannankera dhibbanna reyo goˈle gata dandaanno manchi dino; muli yanna giddo kayinni kuri coyibba baˈanno. Maganu hajajamanno manni Yesuusite wodote kakkalonni hoˈro afiˈranno gede assanno; tini “Iso ammaˈninohu baalu hegere heeshsho afiˈranno gede ikkinnina baˈˈannokki gede” assitanno. (Yohaannisi 3:16) Ikkina albillitte mayi ikkanno yine hexxa dandiineemmo?

Dhibbu baˈˈanno. “‘Dhiwamoommo’ yaannoha dianfanni. Hakkiicho heeˈrano mannira cubbonsa agurranni.”—Isayaasi 33:24.

Reyo diheedhanno. “Mootichu Kaaliiqi reyo coˈo asse hunanno; mannu baalunku albinni hindiiddo feyanno.”—Isayaasi 25:8.

Mannu hegerera heeˈranno. “Maganuwiinni afiˈnanni baˈraaˈri . . . Mootichinke Kiristoosi Yesuusi widoonni hegere heeshshooti.”—Roomu Sokka 6:23.

Reyitinori kaˈanno. ‘Cubbaataammunna keeraano reyotenni kaˈanno.’ (Soqqamaasinete Looso 24:15) Reyino manni kaˈˈannohu Maganu qixxeessinote wodote qixxaawonni horo afiˈranno daafiraati.

Ikkina Maganu konne baala coye assannohu hiittoonniiti?

Maganu mannu oosoranna uullate hedinore wonshannohu iima xintaminohu Yesuusi Kiristoosi moohanno gashshooti widoonniiti. (Faarso 110:1, 2) Yesuusi harunsaanosi “Annanke Gordoho heeˈrattohu, . . . Gashshootikki dayo” yite huuccidhanno gede rosiisinonsahu konne gashshooteeti.—Maatewoosi 6:9, 10.

Maganu Mangiste uulla gashshitanno; hattono dadillenna qarra baala uullate aaninni huntanno. Mannu ooso konne saino gashshoote afidhara didandiitanno! Yesuusi uullate aana soqqami yannara “gordu Gashshootiha Dancha Duduwo” duduwinohunna rosaanosino hatto assitanno gede rosiisinohu iseraati.—Maatewoosi 4:23; 24:14.

Maganu Yihowa mannu ooso baxanno daafira, konne dhagge ikkanno atoote abbeemmoˈne yee qaale eino. Ikkina tenne afakki, isi daafira ledde rosattonna isiwa shiqqi yaatto gede diassitannohe? Hatto assakki kaaˈlitannohehu hiittoonniiti? Aananno birxichi tenne daafira xawisanno.