Su we na nkalakashi, kushii mpaka okulupila’shi ba kuuku bebuwa bakite kintu kampanda bwa nkukwasha. Pa mwanda wa byabya bangi abambaa’shi Efile Mukulu ta nkuuku nya mwanda abapwandikisha’shi Efile Mukulu takwete kukita kintu su nkimune bwa kwibakwasha. Mu binyibinyi, Efile Mukulu ta mukite penda myanda ibungi bwa kwitukwasha nya, anka akakitshi ingi myanda pabitale nkalakashi na makyenga atudi nao lelo uno. Efile Mukulu akakitshi kinyi?

Efile Mukulu akafudisha bubi boso pa kukatusha mbalo yabutukila. Bible alesha yaaya mbalo yabutikila nsaa yakula’shi: “Byaa-pano byooso mbishaale ku matalwa a mubi.” (1 Yowano 5:19) Yawa “mubi” naye umune abadi betanyine kwi Yesu bu “nfumu aa pano pa nsenga,” Satana Diabulu. (Yowano 12:31) Bukitshishi bwi nabo Satana kwi bantu ba pa nsenga nyi bwikale bu nsulo ya nshalelo e bubi pa nsenga. Efile Mukulu akakitshi kinyi?

Yehowa Efile Mukulu afubu na Mwana aye, Yesu Kidishitu, “bwa kutuuta, . . . bukome bwa uno baadi na matalwa a lufu, ngi’shi, Kafilefile.” (Beena-Ebelu 2:14; 1 Yowano 3:8) Byabya Bible alesha’shi Diabulu nabene auku’shi “kubaamushaadila mafuku apeela” bwashi abutudibwe. (Kibafumbwilwe 12:12) Efile Mukulu akakatusha boso bakwete kufwisha bubi.—Misambo 37:9; Nkindji 2:22.

Kunyima kwa kukatusha bubi pa nsenga, Mupangi etu akitshi kyakya akitungu bwa kulombasha mpàngo yaye ya kutula bantu bapwidikye mu mpaladiiso pa nsega. Twi kutengyela kinyi?

Kufukama na kwiyikeela kwa ikalayika “Beeyishe namu abapyaana nsenga abasangeela mu butaale bw’eyendo.”—Misambo 37:11.

Byakudya bibuwa bibungi. “Mwiumbo muikale ñano [ntete] ibungi miepu yâyo îkale aîpuku mu mangulu.”—Misambo 72:16, EEM.

Mashibo na mufubo wi buwa. “Abeebaka mashibo, beemushaale; abakunu nfinyo naa abadi bikuba byaayo. . . . Basangulwe bande abeekala balombeene kudya bituukye ku maasa aabo.”—Yeeshaya 65:21, 22.

Okumina kumona uno nshalelo su? Binobino akalombana bwa bantu boso efuku dyoso.

Lelo uno bantu boso bakwete kukumba na kufwa, anka t’abikala dingi byabya nya. Kubashala mafuku apela Efile Mukulu afubisha myabi ya mulambu wa nkuulo wa Yesu bwa’shi “muntu ooso amukumiina tashiminanga, anka ayikale na muuwa wa iikalaika.” (Yowano 3:16) Akukatuku kipeta kinyi?

Mikumbo tayikekala kwanka dimo “Mwimushale sunga umune tamba dimo’shi: ‘Nee na mukumbo.’ Bashaale mu Yeelusaleme abalekyeelwa kito kyaabo.”—Yeeshaya 33:24.

Lufu talukyengyesha bantu dingi. “Ashimisha lufu bwa looso. Yehowa Efile Mukulu akumuna mpolo ibaadi ku meeso a bantu boso dingi.”—Yeeshaya 25:8.

Bantu abakashala bwa ikalayika pa nsenga. “Kipeebwa kya buntu bw’Efile Mukulu naamu nyi mmuuwa wa iikalaika mu Yesu Kidishitu Nfumwetu.”—Beena-Looma 6:23.

Bantu boso bafwe abasanguka. “Akwikala kusanguka kwa balulame naa kwaa bashii-balulame.” (Bikitshino 24:15) Abakapete bukwashi bwa kya buntu kya nkuulo ky’Efile Mukulu.

Efile Mukulu akalombasha bino byoso naminyi?

Efile Mukulu akalombasha mpàngo yaye bwa bantu na bwa nsenga ku bukwashi bwa mbulamatadi a mwiyilu, e na Yesu Kidishitu bu Mukunkushi. (Misambo 110:1, 2) Ngi mbulamatadi sunga bufumu bubadi Yesu mulungule balondji baaye bwa kuteka mu bino bishima: “Yaay’etu ee mwiyilu, . . . Bufumu bwobe bufikye.”—Mateo 6:9, 10.

Bufumu bw’Efile Mukulu abukamunu nsenga nakukatusha mitanyo na makyenga bi panka. Buno Bufumu nyi mbulamatadi mukile buwa atungu’shi bantu bekale naye! Nyi bwakinyi Yesu badi mwipane mu kulungula “mukandu wibuuwa wa Bufumu” mu mudimo waye wa pa nsenga na nkulungula balondji baye bwabadya kwiulungula.—Mateo 4:23; 24:14.

Pa mwanda wa kifulo kyadi nakyo bwa bantu, Yehowa mmulee’shi ebakitshina bino bintu byoso bibuwa. Bino t’abikutakula mu kukimba kumwiuka na kwifubwila pepi naye su? Mbukwashi kinyi bopete su bokitshi byabya? Mwisambo aulondo awibipatuula.