Ee i dë a wan fuka, joo dë ku di mëni taa wan gaan mati fii o du wan soni u heepi i. U di soni dë mbei sömëni sëmbë ta taki taa de ku Gadu na mati, u di an ta du na wan soni u heepi de. Fuu taki ën kumafa a dë, Gadu du sömëni soni kaa u heepi u, nöö a o du soni jeti u puu hii dee fuka ku pena dee dë a di ten aki. Andi Gadu o du da u?

Gadu o puu hii hogi soni u di a o puu di sëmbë di ta mbei taa hogi soni ta pasa. Di Bëibel ta taki ambë ta mbei hogi soni ta pasa sö. A taa: „Hii dee oto sëmbë u di goonliba aki tuu dë a didibi basu” (1 Johanisi 5:19). Hën nöö Jesosi bi kai „di tiima u di goonliba aki”. Hën da Saatan Didibi (Johanisi 12:31). U di Saatan hën ta tii di goonliba mbei sömëni hogi soni ta pasa sö a goonliba. Andi Gadu o du?

Jehovah Gadu o mbei di Womi Mii fëën Jesosi Keesitu du wan soni u „kaba di sëmbë a sösö di ta tja dëdë ko. Hën da di didibi” (Hebelejën 2:14; 1 Johanisi 3:8). Di Bëibel seei ta taki taa Didibi sabi taa „ten fëën ko sati” u de puu ën a pasi (Akoalimbo 12:12). Gadu o kii dee sëmbë dee ta du hogi puu tu.​—Psalöm 37:9; Nöngö 2:22.

Te di Gadu di mbei u puu hii hogidu a goonliba kaa, nöö a o du hii soni sö taa u sa libi kumafa a bi kë a wan paladëisi a goonliba aki. Unfa soni o dë a di ten dë?

Bööböö libi o dë u teego. „Dee sakafasi sëmbë o feni di goonliba, nöö de o piizii seei biga bööböö libi o dë pasa maaka.”​—Psalöm 37:11.

Njanjan o dë pasa maaka. „Soni u njan o fuu goonliba seei. A dee kuun hedi seei njanjan o dë pasa maaka.”​—Psalöm 72:16.

Bumbuu wosu ku wooko di ta da piizii. „De o mbei wosu, nöö deseei o ta libi a de. De o paandi doloifi djai, nöö de o ta njan dee fuuta u de. . . . Dee sëmbë dee mi tei, o feni wini u di wooko u de.”​—Jesaaja 65:21, 22.

I kë si te dee soni dë o pasa u? Abiti möön, nöö sö di libi o dë.

Hii sëmbë ta suwaki, nöö te u kaba fëën u ta dëdë. Ma a di ten di ta ko soni an o dë sö möön. Gadu o mbei taa u feni wini u di paka di Jesosi paka di lusupaima da u sö taa „ee wan sëmbë i ta biibi a di Mii fëën aki liba, nöö ja o lasi go kaba a sösö möönsö, ma i abi di libi u teego kaa” (Johanisi 3:16). Unfa soni o dë baka di dë?

Siki an o dë möön. „Na wan hojo sëmbë o taki taa: „’Mi suwaki.’ A o da dee sëmbë dee ta libi a di köndë paadon u dee zöndu u de.”​—Jesaaja 33:24.

Dëdë an o dë möön. „A o guli dëdë u teego, nöö Jehovah di Möön Hei Masa o feki hiniwan wojowata puu a hii sëmbë . . . fesi.”​—Jesaaja 25:8.

Sëmbë o ta libi u teego. „Hogilibi abi hën paka, hën da dëdë. Ma nöö Gadu, na paka a ta paka u. Soni a ta da u fu sösö, hën da di libi u teego di u sa feni a Jesosi Keesitu u Masa.”​— Loomë 6:23.

Dee sëmbë dee bi dëdë o weki ko a libi baka. „Mi ta biibi tu taa te sëmbë dëdë de o toona weki baka, dee bi libi bunu a Masa Gadu wojo ku dee an bi libi bunu tuu” (Tjabukama 24:15). De seei o feni wini u di lusupaima di Gadu da u kuma kado.

Unfa Gadu o du hii dee soni aki?

Di tii di Gadu seti aki o mbei taa dee soni dee a abi a pakisei da libisëmbë ku di goonliba aki o pasa tuu. Nöö Jesosi hën o dë di Könu (Psalöm 110:1, 2). Di tii aki, nasö di könuköndë aki da di soni di Jesosi bi ta lei dee bakama fëën u de begi fëën. A bi taa: ’U Tata a liba ala, . . . u begi taa di Tii fii musu paaja a hii goonliba.’​—Mateosi 6:9, 10.

Di Könuköndë u Gadu o tii hii di goonliba, nöö a o puu hii dee fuka dee ta miti u a di goonliba aki. Di Könuköndë aki da di möön bunu tii di libisëmbë sa feni! Fëën mbei Jesosi bi ta paaja di bunu buka u di Könuköndë di a bi dë a goonliba aki, nöö a bi piki dee bakama fëën u du di wan seei soni tu.​—Mateosi 4:23; 24:14.

U di Jehovah Gadu lobi libisëmbë, mbei a paamusi de taa a o du dee soni aki da de. Di soni aki an ta mbei i kë ko sabi di Gadu aki, fii ku ën sa ko dë mati ö? Un wini joo feni te i du di soni aki? Wë woo lesi di soni aki a di woto di ta ko.