Ha u e-⁠na le mathata u hloka motsoalle oa hao hore a u thuse. Batho ba bang ba re Molimo ha se motsoalle oa bona hobane ba nahana hore ha a ba thuse ha ba e-⁠na le mathata. ’Nete ke hore Molimo oa re thusa ha re e-⁠na le mathata ebile o re tšepisa hore o tla felisa lintho tsohle tse re utloisang bohloko. O tla etsetsa batho eng?

O tla qala ka ho felisa motho ea bo bakang. Bibele e re: “Lefatše lohle le rapaletse matleng a ea khopo.” (1 Johanne 5:​19) Jesu o ile a re motho eo “ea khopo” ke Satane Diabolose e leng eena “ ’musi oa lefatše lena.” (Johanne 12:​31) Satane ke eena ea bakelang batho mathata a mangata lefatšeng. Jehova o tla etsa’ng?

O tla sebelisa Jesu e le hore “a ka etsa lefeela ea nang le mokhoa oa ho baka lefu, ke hore, Diabolose.” (Baheberu 2:​14; 1 Johanne 3:⁠8) Bibele e re Diabolose oa “tseba hore o na le nako e khutšoanyane” pele a timetsoa. (Tšenolo 12:​12) Hape, Molimo o tla boela a felise batho bohle ba khopo.​—⁠Pesaleme ea 37:⁠9; Liproverbia 2:⁠22.

Ka mor’a hore Molimo a felise bokhopo, o tla phethahatsa morero oa hae oa hore batho ba phele ka ho sa feleng lefatšeng. Ke melemo efe eo re tla e fumana?

Re tla phela ka khotso ebile re sireletsehile. “Ba bonolo ba tla rua lefatše, ka sebele ba tla fumana thabo e phethehileng khotsong e ngata.”​—⁠Pesaleme ea 37:⁠11.

Ho tla ba le lijo tse ngata. “Ho tla ba le lijo-thollo tse ngata lefatšeng; ho tla ba le nala holim’a litlhoro tsa lithaba.”​—⁠Pesaleme ea 72:⁠16.

Re tla ba le matlo a matle le mosebetsi o khotsofatsang. “Ba tla haha matlo ’me ba lule ho ’ona; ka sebele ba tla lema lirapa tsa morara ’me ba je litholoana tsa tsona. . . . Bakhethoa ba ka ba tla sebelisa mosebetsi oa matsoho a bona ka botlalo.”​—⁠Esaia 65:​21, 22.

Na u labalabela ho bona ha lintho tsee li etsahala? Haufinyane li tla phethahala ’me re phele hamonate ka ho sa feleng.

Ke ’nete hore batho kaofela baa kula ebile baa shoa empa e ke ke ea e-⁠ba ka ho sa feleng. Re tla fumana melemo e mengata kaha Jesu o ile a re shoela “e le hore e mong le e mong ea bontšang tumelo ho eena a se ke a timetsoa empa a be le bophelo bo sa feleng.” (Johanne 3:​16) Re tla fumana melemo efe?

Ha re sa tla kula. “Ha ho moahi ea tla re, ‘kea kula.’ Batho ba lulang naheng eo e tla ba ba tšoaretsoeng liphoso tsa bona.”​—⁠Esaia 33:⁠24.

Ha re sa tla hlola re shoa. “O tla metsa lefu ka ho sa feleng, ’me ka sebele ’Musi Morena Jehova o tla hlakola meokho lifahlehong tsohle.”​—⁠Esaia 25:⁠8.

Re tla phela ka ho sa feleng. “Mpho eo Molimo a fanang ka eona ke bophelo bo sa feleng ka Kreste Jesu Morena oa rona.”​—⁠Baroma 6:⁠23.

Bafu ba tla tsosoa. “Ho tla ba le tsoho ea ba lokileng le ba sa lokang.” (Liketso 24:​15) Batho bohle ba hlokahetseng ba tla tsosoa hobane Jesu o ile a re shoela.

Molimo o tla phethahatsa litšepiso tsee joang?

O tla phethahatsa litšepiso tsa hae ka hore a hlome ’muso leholimong oo morena oa ’ona e tla ba Jesu Kreste. (Pesaleme ea 110:​1, 2) ’Muso ona ke ’ona oo Jesu a ileng a ruta balateli ba hae hore ba rapelle hore o tle, ba re: “Ntat’a rona ea maholimong, . . . ’muso oa hao o ke o tle.”​—⁠Matheu 6: 9, 10.

’Muso oa Molimo o tla busa lefatse lohle ’me o felise lintho tsohle tse bohloko. ’Muso oo o molemo ho feta mebuso eohle ea batho. Ke kahoo ha Jesu a ne a le lefatšeng a ileng a sebetsa ka thata ho “bolela litaba tse molemo tsa ’muso” ’me a laela balateli ba hae hore le bona ba etse se tšoanang.​—⁠Matheu 4:​23; 24:⁠14.

Kaha Jehova Molimo o rata batho, o tšepisitse ho ba etsetsa lintho tsena tse molemo. Na litšepiso tsee ha li etse hore u utloe u batla ho tseba Molimo le ho mo rata haholo? U tla fumana melemo efe haeba u tseba Molimo ebile u mo rata? Sehlooho se latelang se tla araba potso ena.