Haeba o ne o le mathateng, ha ho pelaelo hore o ne o tla lebella hore motswalle wa hao a o thuse. Re ntse re nahanne ka sena, batho ba bangata ba re Modimo ha se motswalle wa bona hobane ha a ba thuse ka letho. Haele hantle, ha se hore Modimo o re etseditse dintho tse molemo feela empa o tla boela a fedise mathata a rona. Modimo o tla etsang?

Modimo o tla fedisa bokgopo ka hore a qale ka ho fedisa motho ya bo bakang. Bibele e ya re jwetsa hore na ke mang motho eo ha e re: “Lefatshe lohle le rapaletse matleng a ya kgopo.” (1 Johanne 5:19) Motho eo “ya kgopo” ke yena eo Jesu a ileng a mmitsa “mmusi wa lefatshe lena,” e leng Satane Diabolose. (Johanne 12:31) Satane ke yena ya etsang hore ho be le mathata lefatsheng. Modimo o tla etsang?

Haufinyane Jehova Modimo o tla sebedisa Mora wa hae, Jesu Kreste ho “etsa lefeela ya nang le mokgwa wa ho baka lefu, ke hore, Diabolose.” (Baheberu 2:14; 1 Johanne 3:8) Haele hantle, Diabolose o a tseba hore “o na le nako e kgutshwanyane” pele a fediswa. (Tšenolo 12:12) Modimo o tla boela a fedise batho bohle ba etsang dintho tse kgopo.—Pesaleme ya 37:9; Liproverbia 2:22.

Ka mora hore Mmopi wa rona a fedise bokgopo bohle lefatsheng, o tla phethahatsa morero wa hae wa hore batho ba phele ka ho sa feleng lefatsheng le letle. Re ka lebellang?

Kgotso ya nnete le tshireletseho. “Ba bonolo ba tla rua lefatshe, ka sebele ba tla fumana thabo e phethehileng kgotsong e ngata.”—Pesaleme ya 37:11.

Dijo tse ngata. “Ho tla ba le dijothollo tse ngata lefatsheng; ho tla ba le nala hodima ditlhoro tsa dithaba.”—Pesaleme ya 72:16.

Matlo a matle le mesebetsi e kgotsofatsang. “Ba tla haha matlo mme ba dule ho ona; ka sebele ba tla lema dirapa tsa morara mme ba je ditholwana tsa tsona. . . . mme bakgethwa ba ka ba tla sebedisa mosebetsi wa matsoho a bona ka botlalo.”—Esaia 65:21, 22.

Na o ka rata ho bona ha dintho tsee di etsahala? Di tla etsahala haufinyane.

Kajeno batho ba a kula ebe qetellong ba a hlokahala, empa qetellong seo se tla fela. Haufinyane Modimo o tla re bontsha melemo e ileng ya tliswa ke lefu la Jesu e le hore “e mong le e mong ya bontshang tumelo ho yena a se ke a timetswa empa a be le bophelo bo sa feleng.” (Johanne 3:16) Diphello e tla ba dife?

O tla fedisa ho kula. “Ha ho moahi ya tla re: ‘Kea kula.’ Batho ba dulang naheng eo e tla ba ba tshwaretsweng diphoso tsa bona.”—Esaia 33:24.

Lefu ha sa tla hlola le eba teng. “O tla metsa lefu ka ho sa feleng, mme ka sebele Mmusi Morena Jehova o tla hlakola meokgo difahlehong tsohle.”—Esaia 25:8.

Batho ba tla phela ka ho sa feleng. “Mpho eo Modimo a fanang ka yona ke bophelo bo sa feleng ka Kreste Jesu Morena wa rona.”—Baroma 6:23.

Bafu ba tla tsoswa. “Ho tla ba le tsoho ya ba lokileng le ba sa lokang.” (Liketso 24:15) Ba tla tsoswa ba tla fumana molemo o tliswang ke sehlabelo sa Jesu.

Modimo o tla etsa dintho tsee kaofela jwang?

Modimo o tla phethahatsa morero wa hae ka batho le lefatshe a sebedisa mmuso wa lehodimo oo morena wa ona e leng Jesu Kreste. (Pesaleme ya 110:1, 2) Ke Mmuso oo Jesu a ileng a bolella balatedi ba hae hore ba o rapelle, ba re: “Ntata rona ya mahodimong, . . . Mmuso wa hao o ke o tle.”—Matheu 6:9, 10.

Mmuso wa Modimo o tla busa lefatsheng mme o fedise bohloko le mathata ohle. Ha hona Mmuso o ka tshwanang le ona! Ke ka hoo Jesu a neng a ikemiseditse ho bolela “ditaba tse molemo tsa Mmuso” ha a ne a le lefatsheng mme a bolella barutuwa ba hae hore ba etse se tshwanang.—Matheu 4:23; 24:14.

Jehova Modimo o tshepisitse hore o tla etsa dintho tsena kaofela hobane o rata batho haholo. Na seo ha se etse hore o batle ho mo tseba le ho atamela haufi le yena? Ho etsa seo ho ka o thusa jwang? Sehlooho se latelang se tla o thusa.