Naka wɛ ekɔ l’okakatanu ɔmɔtshi, kete aha la taamu wɛ nongamɛka dia ɔngɛnyi ayɛ ɔmɔtshi w’oshika nsala dui dimɔtshi dia kokimanyiya. La kanyi shɔ lo yimba, anto amɔtshi mbutaka dia Nzambi bu ɔngɛnyi wa ngasɔ, nɛ dia vɔ fɔnyaka dia Nzambi hasale ndooko dui dia mbakimanyiya. Lo mɛtɛ, Nzambi akasale awui efula lo wahɔ aso ndo nde ayosala dui dimɔtshi nto lo kɛnɛ kendana l’ekakatanu ndo asui wahomana la so ɛlɔ kɛnɛ. Kakɔna kayosala Nzambi?

Nzambi ayokomiya awui wa kɔlɔ tshɛ lo minya kiɔkɔ yawɔ. Bible mɛnyaka ɔnɛ lele lo kiɔkɔ y’awui asɔ lo mbuta ɔnɛ: “Andja w’otondo wekɔ lo nɔmbɔma oma le kanga kɔlɔ.” (1 Joani 5:19) “Kanga kɔlɔ” ɔsɔ ele ɔnɛ lele Yeso akawelɛ ɔnɛ “owandji w’andja ɔnɛ,” mbuta ate Satana Diabolo. (Joani 12:31) Shɛngiya yele la Satana le anto wa l’andja ɔnɛ mbele lo kiɔkɔ y’awui wa kɔlɔ wasalema la nkɛtɛ. Kakɔna kayosala Nzambi?

Keem’edja Jehowa Nzambi ayokamba la Ɔnande, Yeso Kristo dia “ndanya ɔnɛ lele la akoka wa ndjakisha, mbuta ate diabolo.” (Hɛbɛru 2:14; 1 Joani 3:8) Lo mɛtɛ, Bible mɛnyaka dia Diabolo ndamɛ mbeyaka dia “etena kambootshikalɛ kaya mondo” la ntondo ka nde ndanyema. (Ɛnyɛlɔ 12:12) Ndo nto Nzambi ayokomiya awui wa kɔlɔ tshɛ ndo ayolanya wanɛ wasala awui akɔ.​—Osambo 37:9; Tokedi 2:22.

L’ɔkɔngɔ wa minya awui wa kɔlɔ tshɛ oma la nkɛtɛ, Otungi aso ayosala kɛnɛ kahombama dia nkotsha sangwelo diande, mbuta ate dia anto wa kokele nsɛna pondjo pondjo lo Paradiso ka la nkɛtɛ. Akokaso nongamɛ lo nshi yayaye?

Wɔladi ndo lotui tshitshi la pondjo. “Koko akanga wa memakana wayokita nkɛtɛ, ndo vɔ wayɔngɛnangɛnaka heyama la wɔladi w’efula.”​—Osambo 37:11.

Mbo ya ndɛ y’amɛna yayonga tshavutshavu. “Mbo ya ndɛ yayoyala efula la nkɛtɛ; yɔ yayonga tshavutshavu lo tɔsɔdi t’akona.”​—Osambo 72:16.

Mvudu ndo elimu w’amɛna. “Vɔ wayoka mvudu ko wayodjasɛka lɔkɔ, ndo vɔ wayokamba dikambɔ dia vinyɔ ko wayɔlɛka elowa w’oma lɔkɔ. . . . Ɛsɔnami ami wayɔngɛnangɛna lo yɛdikɔ y’efula la olimu wa anya awɔ”​—Isaya 65:21, 22.

Onde wɛ kombolaka mɛna ekotshamelo ka alaka asɔ? Keem’edja tayanga mɛna ekotshamelo kawɔ.

Ɛlɔ kɛnɛ onto tshɛ tataka hemɔ ndo mvɔka, koko awui asɔ hawotosalema nto. Keem’edja Nzambi ayokamba la wahɔ w’oma lo olambo w’oshinga w’etshungwelo waki Yeso dia “onto tshɛ longa la mbetawɔ le nde atovɔke, koko akondja lɔsɛnɔ la pondjo.” (Joani 3:16) Etombelo akɔna wayonga la dui sɔ?

Hemɔ hatoyala nto. “Ndooko onto lodjashi lɛkɔ layota ate: ‘Lekɔ la hemɔ.’ Anto wodjashi lo wodja wayodimanyiyama munga yawɔ.”​—Isaya 33:24.

Nyɔi hatɛnya anto paa nto. “Nde ayonya nyɔi pondjo, ndo Nkum’Olongo Nkumadiɔndjɔ Jehowa ayokitola asɔyi oma lo dungi tshɛ.”​—Isaya 25:8.

Anto wayɔsɛna pondjo pondjo. “Woshasha washa Nzambi ele lɔsɛnɔ la pondjo oma le Kristo Yeso Nkumɛso.”​—Rɔmɔ 6:23.

Wanɛ wakavu wayolɔ. “Eolwelo k’anto w’ɛlɔlɔ ndo k’anto wa kɔlɔ kayoyala.” (Etsha 24:15) Vɔ wayokondja wahɔ oma lo woshasha waki Nzambi w’oshinga w’etshungwelo.

Ngande wayokotsha Nzambi awui asɔ tshɛ?

Nzambi ayokotsha sangwelo diande lo dikambo di’anto ndo dia nkɛtɛ lo tshimbo ya lowandji la l’olongo lele Ɔnɔmbɔdi alɔ wakasɔnama, Kristo Yeso. (Osambo 110:1, 2) Lowandji kana diolelo sɔ mbaketsha Yeso ambeki ande dia nɔmbaka dikambo dia diɔ ɔnɛ: “Shɛso lele l’olongo, . . . Diolelo diayɛ diaye.”​—Mateo 6:9, 10.

Diolelo diaki Nzambi diayɔlɔmbɔla nkɛtɛ ndo diayonya paa ndo asui tshɛ wele la nkɛtɛ. Diolelo sɔ mbele lowandji loleki dimɛna lakoka anto monga la lɔ! Diakɔ diele Yeso ndamɛ akayasha tshɛ dia mbewoya “lokumu l’ɔlɔlɔ la Diolelo” l’etena kakandasambishaka la nkɛtɛ ndo nde akatɛ ambeki ande dia nsala woho akɔ waamɛ.​—Mateo 4:23; 24:14.

L’ɔtɛ wa ngandji k’efula kokande anto, Jehowa Nzambi akalake dia mbaasalɛ awui wa diambo asɔ tshɛ. Onde awui asɔ hawokotshutshuya dia mbeeya ndo ndjasukanya la nde? Naka wɛ nsɔna dia nsala dui sɔ, wahɔ akɔna wayoyokondja? Sawo diayela diayolembetshiya dui sɔ.