Kapau ‘okú ke ‘i ha tu‘unga faingata‘a, ‘oku ‘ikai ha toe veiveiua ho‘o fiema‘u ha kaume‘a lelei ke tokoni atu kiate koe. ‘I he fo‘i fakakaukau ko iá, ‘oku pehē ‘e he ni‘ihi ko e ‘Otuá ‘oku ‘ikai ko ha kaume‘a koe‘uhi ‘oku nau pehē ‘oku ‘ikai fai ‘e he ‘Otuá ha me‘a ma‘anautolu. Ko hono mo‘oní, kuo ‘ikai ngata pē hono fai ‘e he ‘Otuá ‘a e ngaahi me‘a lahi ke tau ma‘u ‘aonga mei ai ka te ne toe fakangata ‘a e ngaahi palopalema mo e faingata‘a ‘oku tau fehangahangai mo ia ‘i he ‘aho ní. Ko e hā ‘e fai ‘e he ‘Otuá?

‘E fakangata ‘e he ‘Otuá ‘a e kotoa ‘o e fulikivanú ‘aki hono to‘o atu hono tupu‘angá. ‘Oku fakapapau‘i mai ‘e he Tohi Tapú ‘a hono tupu‘angá ‘i he‘ene pehē: “Ko e māmaní kotoa ‘oku tokoto ia ‘i he mafai ‘o e tokotaha fulikivanú.” (1 Sione 5:19) Ko e ‘tokotaha fulikivanu’ ko iá ‘oku ‘ikai ko ha tokotaha kehe ia mei he tokotaha na‘e ui ‘e Sīsū “ko e pule ‘o e māmani ko ení,” ‘a Sētane ko e Tēvoló. (Sione 12:31) Ko e tupu‘anga tefito ‘o e ngaahi tu‘unga fakamamahi ‘i he māmaní ko e tākiekina ‘e Sētane ‘a e fa‘ahinga ‘o e tangatá. Ko e hā ‘e fai ‘e he ‘Otuá?

Ko Sihova ko e ‘Otuá ‘e vavé ni ke ne ngāue‘aki ‘a hono ‘Aló, ‘a Sīsū Kalaisi, ke ne “fakaka‘anga ai ‘a e tokotaha ‘okú ne malava ke fakatupunga ‘a e maté, ‘a ia, ko e Tēvoló.” (Hepelū 2:14; 1 Sione 3:8) Ko e mo‘oni, ‘oku fakahaa‘i mai ‘e he Tohi Tapú ko e Tēvoló tonu ‘okú ne ‘ilo‘i “‘oku toe si‘i pē hono taimí” ki mu‘a pea faka‘auha iá. (Fakahā 12:12) ‘E to‘o atu foki ‘e he ‘Otuá ‘a e fa‘ahinga kotoa ‘oku nau fakatupunga ‘a e fulikivanú.​—Saame 37:9; Palōveepi 2:22.

‘I he hili hono to‘o atu ‘a e kotoa ‘o e fulikivanú mei he māmaní, ‘e fakahoko ‘e hotau Tokotaha-Fakatupú ‘ene taumu‘a ta‘engata ki he fa‘ahinga ‘o e tangatá mo e māmaní. Ko e hā te tau fakatu‘otu‘a atu ki aí?

Melino mo e malu‘anga tu‘uloa. “Ko e anga-vaivaí te nau ma‘u ‘a e māmaní, pea te nau ma‘u ‘a e fiefia lahi ‘i he melino hulu fau.”​—Saame 37:11.

Me‘akai fakatupu mo‘ui lelei pea lahi fau. “‘E lahi fau ‘a e uité ‘i he māmaní; ‘e mahutafea ‘a e tumutumu ‘o e ngaahi mo‘ungá.”​—Saame 72:16.

Ngaahi ‘api lelei pea mo e ngāue fakafiemālie. “Te nau langa fale pea nofo ai, pea te nau tō ngoue kālepi pea kai ‘a hono fuá. . . . Ko e ngāue ‘a honau nimá ‘e fiefia kakato ai ‘a e fa‘ahinga kuó u filí.”​—‘Aisea 65:21, 22.

‘Okú ke faka‘amu ke ke sio ‘i he ngaahi tu‘unga ko iá? ‘E vavé ni ke hoko ia ko e me‘a anga-maheni ki he tokotaha kotoa pē.

‘Oku hu‘u atu ‘a e tokotaha kotoa ‘i he ‘ahó ni ki he puké pea faai atu pē ‘o mate, ka ‘e ‘ikai ke toe hoko ia. ‘Oku vavé ni ke ngāue‘aki ‘e he ‘Otuá ‘a e ‘aonga ‘o e feilaulau huhu‘i na‘e fai ‘e Sīsuú ki he “tokotaha kotoa pē ‘okú ne ngāue‘i ‘a e tui kiate iá ke ‘oua na‘a ‘auha ka ne ma‘u ‘a e mo‘ui ta‘engatá.” (Sione 3:16) Ko e hā hono olá?

Fakangata ‘osi ‘a e puké. “‘E ‘ikai ha taha ‘oku nofo ai te ne pehē: ‘‘Oku ou puke.’ Ko e kakai ‘oku nofo ‘i he fonuá ‘e fakamolemole‘i ‘a ‘enau faihalá.”​—‘Aisea 33:24.

‘E ‘ikai toe fakamamahi‘i ‘e he maté ‘a e tangatá. “Te ne folofua ‘a mate ‘o ta‘engata, pea ‘e holoholo ‘e he ‘Eiki Hau ko Sihová ‘a e lo‘imatá mei he mata kotoa pē.”​—‘Aisea 25:8.

‘E mo‘ui ta‘engata ‘a e kakaí. “Ko e me‘a‘ofa ‘oku foaki ‘e he ‘Otuá ko e mo‘ui ta‘engata ‘ia Kalaisi Sīsū ko hotau ‘Eikí.”​—Loma 6:23.

Ko e fa‘ahinga kuo maté ‘e toe fakafoki mai. “‘E ‘i ai ‘a e toetu‘u fakatou‘osi ‘a e mā‘oni‘oní mo e ta‘emā‘oni‘oní.” (Ngāue 24:15) Te nau ma‘u ‘aonga mei he me‘a‘ofa ‘a e ‘Otuá ko e huhu‘í.

‘E anga-fēfē hono fakahoko kotoa eni ‘e he ‘Otuá?

‘E fakahoko ‘e he ‘Otuá ‘ene taumu‘a ki he fa‘ahinga ‘o e tangatá mo e māmaní ‘o fakafou ‘i ha founga-pule fakahēvani, fakataha mo Kalaisi Sīsū ko e Tokotaha Pule kuo fakanofó. (Saame 110:1, 2) Ko e founga-pule ia pe pule‘anga, na‘e ako‘i ‘e Sīsū ki hono kau muimuí ke nau lotu fekau‘aki mo iá ‘i he ngaahi leá ni: “Ko ‘emau Tamai ‘oku ‘i hēvani, . . . ke hoko mai ho Pule‘angá.”​—Mātiu 6:9, 10.

‘E ngāue‘aki ‘e he Pule‘anga ‘o e ‘Otuá hono mafaí ki he māmaní pea to‘o ‘osi kotoa ‘a e mamahí mo e faingata‘á mei ai. Ko e Pule‘anga ko ení ‘a e founga-pule lelei taha kuo faifai ange pea ‘i aí! Ko e ‘uhinga ia na‘e feinga mālohi ai ‘a Sīsū tonu ke fanongonongo ‘a e ‘ongoongo lelei ‘o e Pule‘angá’ lolotonga ‘ene ngāue fakafaifekau ‘i he māmaní pea na‘á ne tala ki he‘ene kau ākongá ke nau fai ‘a e me‘a tatau.​—Mātiu 4:23; 24:14.

Ko e ‘ofa lahi ‘a Sihova ko e ‘Otuá ki he fa‘ahinga ‘o e tangatá, kuó ne tala‘ofa te ne fakahoko kotoa ‘a e ngaahi me‘a fakaofo ko ení ma‘anautolu. ‘Ikai ‘oku ‘ai koe ‘e he ngaahi me‘a ko iá ke ke loto ke ‘ilo‘i ia pea ‘unu‘unu ofi kiate ia? Kapau ko ho‘o filí ia ‘e fēfē ha‘o ma‘u ‘aonga mei ai? ‘E fakamatala‘i ia ‘i he kupu hono hokó.