Jun lekil kamigotik jani ja maʼ ti wa x-ajyi jmoktik yajni wan ekʼel jbʼajtik wokoli. Ja yuj, jujuntik wa spensarane ja Dyosi mi kamigoʼuktik, yujni wa xyalawe mi skoltayotik. Pe ja yeʼn jelxa jitsan jastik skʼulunej bʼa keʼntik sok mojanxa ay jas oj skʼuluk soka wokoliki. ¿Jas oj skʼuluk ja Dyos?

Bʼa oj ya kʼot tikʼan ja jastik malo, ja Dyos tʼilan oj xchʼaysnajel ja maʼ smuli. Ja Biblia wa sjeʼa machunkiluk ja smuli yajni wa xyala: «Ja maʼ tey ba mundo, ti aye juntiro ja ba scʼab ja diablo» (1 Juan 5:19). Yeʼnani ja «diablo» ja maʼ junxta staʼa tiʼal ja Jesús yajni ya sbʼiʼiluk «ja yajualalil ja luum iti» (Juan 12:31). Yuja yeʼn yamanyuj ja luʼumkʼinali, ja Satanás yeʼn smul ja swokol ja ixuk winiki. Pe ¿jas oj skʼuluk ja Dyos?

Ja Jyoba ojxta ya makunuk ja Yunin bʼa oj yakan «ibilajel ja diablo» (Hebreos 2:14; 1 Juan 3:8). Ja Biblia wa sjeʼa ja Dyablo «huan ni snaa que bisubal xa lec ja stiempo» bʼa oj chʼayjuk-el snajel (Apocalipsis 12:12). Ja Dyos cha ojni xchʼaysnajel ja matik malo (Salmo 37:9; Proverbios 2:22).

Tsaʼan ja xyaʼ kʼot tikʼan ja jastik malo, ja jKʼulumantiki oj yaʼ kʼotuk ja jas skʼanunej tolabida sbʼaja ixuk winik sok ja Luʼumi. Anto, ¿jastalxa oj ajyuk ja jsakʼaniltiki?

Lamanil sok mixa jas oj ekʼ jbʼajtik. «Pe ja matik chʼin wa xyaʼa sbʼaji oj sbʼajuke ja luʼumi, sok jel oj yabʼye stsamalil ajyel laman» (Salmo 37:11).

Jel oj ajyuk waʼelalik bʼa lek. «Oj ajyuk jitsan sat jastik junuk ja bʼa luʼumi; sok ja bʼa sniʼ ja witsiki oj jelxuk ele» (Salmo 72:16).

Tsamalik jnajtik sok kaʼteltik bʼa wa xyaʼa gustoʼil. «Ja yeʼnle oj yawe kʼeʼuk naʼitsik sok tini oj ajyuke tiw, soka yeʼnle oj stsʼun-e yalajil stsʼusubʼe sok oj sloʼe ja sati. [...] Soka yaʼtele oj skʼuluke soka skʼabʼe ja matik jtsaʼuneji ojni yabʼye stsamalil lek» (Isaías 65:21, 22).

¿Wan maʼ xa kʼana oj ajyan sakʼan bʼa jun luʼum jastal it? Pes ojxta kʼot smeranil ja jastik it.

Ja bʼa jtyempotiki, jpetsaniltik wala yamjitik chamel sok wala chamtik, pe mi tolabida jach oj ajyuk. Ja Jyoba yaʼunej makunuk ja sakʼanil yaʼa ja Jesús bʼa slekilal «ja maʼ huas scʼuan ja yeni, mi ni oj chʼayuquea. Oj ni stae ja svida jau ba mi ni nunca huax chʼaqui» (Juan 3:16). ¿Jastalxa oj ajyuk ja jsakʼaniltiki?

Mixa maʼ oj maloʼaxuk. «Sok mini jun swinkil oj yale: ‹Maloʼayon›. Ja matik sakʼan ja bʼa luʼumi ojni kusjuk ja smuleʼi» (Isaías 33:24).

Mixa maʼ oj chamuk. «Ja yeʼn oj sbʼukʼ koʼe ja chamelchʼakeli bʼa tolabida, soka Kajwaltik Jyoba oj skus ja yaʼalel sat ja ixuk winiki» (Isaías 25:8).

Ja ixuk winik oj ajyuke sakʼan bʼa tolabida. «Ja majtanal wa xyaʼa ja Dyosi jani ja sakʼanil bʼa tolabida yuja Kajwaltik Kristo Jesús» (Romanos 6:23, TNM).

Ja chamwiniki oj sakʼwuke. «Ja maʼ huax chami, tʼilan oj cho sac-huuc, sea lec, ma malo» (Hechos 24:15). Ja chamwiniki oj cha yawe el slekilal stsʼakatal ja koltanel yaʼa ja Dyosi.

¿Jastal oj lajxukyuj skʼulajel ja it ja Dyos?

Ja Dyosi oj ya makunuk jun gobyerno bʼa satkʼinal bʼa yeʼn yamanyuj ja Jesukristo, bʼa oj ya kʼotuk ja jas wa skʼana sbʼaja ixuk winik sok ja Luʼumi (Salmo 110:1, 2). Jaʼ junxta gobyerno sjeʼayi ja Jesús ja snebʼumaniki bʼa a-skʼane soka yaljelik it: «Jtaticon Dios ti aya ba satqʼuinali [...]. A jacuc ja tiempo oj ni acʼul mandari» (Mateo 6:9, 10).

Ja sGobyerno ja Dyos oj skʼul mandar ja Luʼumi sok oj xchʼaysnajel ja yijel wokoli. Jani ja gobyerno mas lek oj bʼobʼ ajyuk yuja ixuk winiki. Ja yuj, ja Jesús skʼujolan ja janekʼ bʼobʼyuj ja yajni ti ajyi bʼa Luʼumi bʼa xcholjel «ja yajcʼachil loil it jastal huan xa scʼulajel mandar ja Diosi» sok cha yayi mandar ja snebʼumanik bʼa junxta oj skʼuluke (Mateo 4:23; 24:14).

Ja Jyoba yaʼunejkitik ja tsamal kʼapjelalik it yujni jel syajtayotik. ¿Mi maʼ wa snikawotik ja jaw bʼa oj jnatik sbʼaj sok skʼujolajel bʼa oj kamigoʼuktik? ¿Jastik slekilal oj jtatik ta jkʼulantik ja it? La kiltik ja bʼa artikulo jakumi.