Loko awo va ka xiyimo xa kukarhata, awuta navela leswaku munghanu lwenene aku pfuna, ahi swona? Hi kupimisa hi ndlela leyi, van’wana va vula leswaku Xikwembu ahi munghanu wa munene hikuva axi yendli nchumu leswaku xiva pfuna. Kambe leswo ahi ntiyiso. Xikwembu se xi yendle minchumu ya kutala leswaku xihi pfuna naswona xahata yendla swin’wana leswaku xi susa swikarhato leswihi yendlaka hi hlupheka namuntlha. Xita yendla yini?

Xikwembu xita helisa wubihi hi kuyendla leswaku muvangi wa lona angaha vi kona. Kasi i mani lweyi a vangaka wubihi? Bibele la hlamula: “Misava hinkwayu yi le hansi ka lweyi wobiha.” (1 Yohane 5:19) A “lweyi wobiha” a vuliwaka laha i Sathana Diyavulosi, lweyi Yesu Kreste amu vitaneke “hosana” kumbe mufumi wa misava. (Yohane 12:31) Misava namuntlha yi tale hi swikarhato hi mhaka ya leswi yinga le mavokweni ya Sathana. Se Xikwembu xita yendla yini?

Kungali khale, Yehovha Xikwembu ata tirhisa Yesu Kreste leswaku ‘ahelisa lweyi anga ni matimba ya rifu, kunga yena Diyavulosi’. (Vaheveru 2:14; 1 Yohane 3:8) Phela hambi yena Sathana waswi tiva leswaku “nkarhi wa yena wukomile” leswaku a helisiwa. (Nhlavutelo 12:12) Handle ka kuhelisa Sathana, Xikwembu xita helisa kuhlupheka hinkwako ni hinkwavo lavaku vangaka. — Tipisalema 37:9; Swivuriso 2:22.

Ndzhaku ka kuhelisa wubihi hinkwalo, Muvumbi wa hina ata yendla hinkwaswo leswi lavekaka leswaku a hetisisa xikongomelo xa yena xa khale. Kunavela ka yena i ka leswaku vanhu lava hetisekeke va hanya hilaha kunga heliki amisaveni leyinga paradeyisi. Xana misava yita tshamisa kuyini loko kurhandza ka Xikwembu kuta hetiseka?

Misava yita va ni kurhula ni kusirheleleka. “Lavatitsongahataka vatadja ndzhaka ya misava, kunene vatakuma ntsako lowuheleleke akurhuleni lokukulu.” — Tipisalema 37:11.

Kuta va ni swakudla swotala. *

Vanhu vata tshama ka tiyindlu letinene naswona vata yendla mintirho leyi tsakisaka. “Vatayaka tiyindlu vatshama ka tona, vatabyala masimu ya mawuvha ni kudla mihandzu ya wona . . . vahlawuliwa va mina vatawutsakela hi kuhelela ntirho wa mavoko ya vona.” — Esaya 65:21, 22.

Xana awuswi naveli kuhanya ka misava ya kutshamisa xileswi? Kungali khale, wutomi la hina lita va xitanu siku ni siku.

Namuntlha, vanhu hinkwavo va vabya naswona hi kufamba ka nkama va fa. Kambe leswo swita hela. Kungali khale, Xikwembu xita tirhisa gandzelo la nkutsulo la n’wana wa xona leswaku vanhu “hinkwavu lava vapfumelaka ka yena [Yesu] vangalovi, kambe vava ni vutomi lebzingaheliki.” (Yohane 3:16) Xana wutomi lita tshamisa kuyini loko Xikwembu xi yendla leswo?

Mavabyi mata helisiwa. ‘Kurila kumbe kuvaviseka aswingahatava kona’. — Nhlavutelo 21:4.

Lifu leli hetaka vanhu namuntlha alingahata va kona. “Nala lweyi wohetelela lweyi angatahelisiwa i rifu”. — 1 Vakorinto 15:26.

Vanhu vata hanya vangaha fi. “Nyiko . . . leyi humaka ka Xikwembu, i vutomi lebzingaheliki, ha Yesu Kriste Hosi ya hina.” — Varhoma 6:23.

Lava feke vata pfuxiwa. “Lavolulama ni lavangalulamangiki vatapfuka kufeni.” (Mintirho 24:15) Na vona vata vuyeliwa hi nyiko ya Xikwembu, kunga nkutsulo.

Xana Xikwembu xitaswi yendlisa kuyini hinkwaswo leswi?

Leswaku xi hetisisa xikongomelo xa xona hi vanhu ni  misava, Xikwembu xita tirhisa Mfumu wa xona wa le matilweni, lowu Hosi ya wona leyi vekiweke kunga Yesu Kreste. (Tipisalema 110:1, 2) Mfumu lowu hi wona lowu Yesu a djondziseke vadjondzisiwa va yena leswaku vawu khongelela va ku: “Tatana wa hina lweyi anga matilweni . . . akute kufuma ka wena”. — Matewu 6:9, 10.

Mfumu wa Xikwembu wuta fuma misava ni kuhelisa kuhlupheka ni kuvaviseka hinkwaku lokunga kona. Mfumu lowu hi wona wunga wa kuyampsa kutlula mimfumu hinkwayo leyi tshameke yi fuma vanhu. Hi mhaka leyo, loko a li laha misaveni Yesu a tirhise nkama ni ntamu wa yena leswaku a chumayela “evhangeli [mahungu lamanene] ya Mfumu” hilaha a akota ha kona. A tlhele a khutaza valandzeli va yena leswaku va yendla leswi fanaka. — Matewu 4:23; 24:14.

Yehovha Xikwembu a tshembisa kuhi yendlela swilo leswi hinkwaswo swa kutsakisa hikolaho ka leswi ahi rhandzaka hintamu swinene. Xana lexi ahi xona xivangelo lexi twalaka xa kuva u lwela kumu tiva ni kuva munghanu wa yena? Xana uta vuyeliwa hi yini loko u yendla leswo? Nhlokomhaka leyi landzelaka yita hlamula xivutiso lexo.