Kafai ne oko koe ki se tulaga faigata, e mautinoa eiloa me ka fakamoemoe koe me ka fesoasoani atu a tou taugasoa ki a koe. Mai te mafaufau ki te mea tenā, e fai mai a nisi tino me i te Atua e sē se taugasoa, me e mafau‵fau latou me e seai se mea a te Atua e fai mō latou. A ko te ‵tonuga loa, ne seki fai fua ne te Atua a mea e uke mō te ‵lei o tatou, kae ka gasuesue foki a ia o faka‵lei aka a fakalavelave mo logo‵maega katoa e fe‵paki mo tatou i aso nei. Ne a mea ka fai ne te Atua?

Ka fakagata ne te Atua a mea ma‵sei katoa mai te fakaseai ne ia a te māfuaga o mea ma‵sei katoa. E fakaasi mai i te Tusi Tapu a te māfuaga o mea konā i ana pati konei: “Kae ko te lalolagi kātoa ko nofo mai lalo i te pule a te tino masei.” (1 Ioane 5:19) A te “tino masei” tenā ko te tino foki loa telā ne taku ne Iesu ki “te pule o te lalolagi tenei,” ko Satani te Tiapolo. (Ioane 12:31) A te fakamalosiga a Satani ki te lalolagi o tino ko te māfuaga o tulaga faiga‵ta i te lalolagi nei. Ne a mea ka fai ne te Atua?

Ko pili o gasuesue a Ieova te Atua e auala i tena Tama, ko Iesu Keliso, o “fakaseai atu ne ia e auala i tena mate a te māfuaga o te mate telā ko te Tiapolo.” (Epelu 2:14; 1 Ioane 3:8) A te ‵tonuga loa, e fakaasi mai i te Tusi Tapu me iloa ‵lei ne te Tiapolo me “i tena taimi ko toetoe” a koi tuai o oko mai tena fakaseaiga. (Fakaasiga 12:12) Ka fakaseai foki ne te Atua a tino katoa kolā e fai ne latou a amioga ma‵sei.—Salamo 37:9; Faataoto 2:22.

Kafai ko fakaseai atu a mea ma‵sei katoa i te lalolagi, ka gasuesue eiloa te ‵tou Mafuaga ke fakataunu tena fuafuaga se-gata-mai e uiga ki tino katoa mo te lalolagi. Se a te mea e mafai o olioli tatou ki ei?

Te filemu mo te tokagamalie tumau. “Ko tino agamalu ka fai mō latou te lalolagi, kae ka maua ne latou te fiafiaga sili ona ko te lasi o te filemu.”—Salamo 37:11.

Ka malaku a mea‵kai paleni. “Ka malaku eiloa a saito i te laukele; ka ‵fonu a taulu o mauga.”—Salamo 72:16.

Fale ‵lei mo se galuega fakamalie loto. “Ka faite ne latou olotou fale kae ‵nofo i ei, kae ka ‵toki ne latou a togavine kae ‵kai ki olotou fuataga . . . . Kae ko galuega e fai ne olotou lima ka fia‵fia ki ei oku tino filifilia.”—Isaia 65:21, 22.

E mata, e olioli koe ke lavea atu a vaegā tulaga penā? Ko pili o maua ne tino katoa a te olaga tenei i aso mai mua.

A tino katoa e pokotia i masaki mo te mate i aso nei, kae e se tenā eiloa te mea ka tupu i se taimi pili mai mua nei. Ko pili o fakagalue aka a te aoga o te taulaga togiola a Iesu ko te mea “ke se fakaseai atu so se tino telā e fakaasi atu faeloa te fakatuanaki ki a ia kae ke maua ne ia te ola se-gata-mai.” (Ioane 3:16) Se a te mea ka iku mai i ei?

Ka fakaseai atu a masaki. “Ka seai se tino e fai aka: ‘Au ko masaki.’ A tino kolā e ‵nofo i fenua ka fakamagalogina olotou mea ‵se.”—Isaia 33:24.

Ka se toe fai a te mate e pelā me se mala ki tino katoa. “Ka fakaseai ne ia te mate ki te se-gata-mai, kae ko te Aliki Sili ko Ieova ka ‵solo ne ia a loimata mai i mata katoa.”—Isaia 25:8.

A tino ka ola ki te se-gata-mai. “Kae ko te meaalofa telā e tuku mai ne te Atua ko te ola se-gata-mai i a Keliso Iesu te ‵tou Aliki.”—Loma 6:23.

A latou kolā ko ‵mate ka toe faka‵tu mai ki te ola. “Ka toe‵tu mai a tino amio‵tonu mo tino sē amio‵tonu.” (Galuega 24:15) Ka maua ne latou a mea aoga mai te meaalofa a te Atua ko te togiola.

Ka fakataunu pefea ne te Atua a mea katoa konei?

Ka fakataunu ne te Atua tena fuafuaga mō tino katoa mo te lalolagi e auala i te malo faka-te-lagi, fakatasi mo Keliso Iesu e pelā me ko te Pule telā ne ‵tofi aka. (Salamo 110:1, 2) Ko te pulega io me ko te malo, telā ne akoako ne Iesu ki ana soko ke ‵talo atu i pati konei: “Te motou Tamana telā i te lagi, . . . ke oko mai tou Malo.”—Mataio 6:9, 10.

Ka pule mai te Malo o te Atua ki luga i te lalolagi nei kae ka fakaseai atu ei a fakalavelave mo logo‵maega katoa i te lalolagi. A te Malo tenei ko te ‵toe pulega ‵lei eiloa ke pule mai! Tenā te pogai ne taumafai ei a Iesu o folafola atu “te tala ‵lei o te Malo” i tena galuega talai i te lalolagi nei kae fai atu ki ana soko ke fai foki penā.—Mataio 4:23; 24:14.

Ona ko tena alofa sili mō tino kolā ne faite ne ia, ne tauto mai a Ieova me ka fai ne ia a mea ‵gali katoa mō latou. E mata, e se fai ne te mea tenā ke iloa ne koe a ia kae ke fakapilipili atu ki a ia? Kafai e filifili koe ke fai penā, ka aoga pefea a te mea tenā ki a koe? Ka fakamatala mai i te suā mataupu.