Te lekil amigo jaʼ te machʼa ya xjuʼ ya jkʼanbeytik koltayel te kʼalal ayotik ta wokol. Jaʼ yuʼun bayal machʼatik ya yalik te ma kamigotik te Diose, melel ya yalik te maʼyuk bin ya spas ta jwentatike. Pero bayal bintik spasojix ta jtojoltik sok nopol ya xbajtʼ schajpan te kʼopetik kuʼuntik sok ya slajinbey skʼoplal te jwokoltike. ¿Bin ya xbajtʼ spas te Diose?

Te Dios yame slajin te bintik ya yakʼ wokolile. Te Biblia ya yakʼ ta naʼel te machʼa-a te ya yakʼ wokolil: «Ay ta scʼab pucuj swohlol te bahlumilale» (1 Juan 5:19). Kʼalal la yalbey skʼoplal Jesús te «ajwalil yuʼun te balumilale» jaʼ yak ta yalbeyel skʼoplal-a te Pukuje (Juan 12:31, XCD). Jaʼ ta swenta te Pukuj te ay bayal swokol te ants winiketike. ¿Bin ya xbajtʼ spas te Dios ta swenta-abi?

Te Jehová nopol ya xbajtʼ stuuntes te sNichʼan swenta ya slajin «te machʼa scuentahinej te lajele, ha te pucuje» (Hebreos 2:14; 1 Juan 3:8). Jaʼnix jich te Biblia ya yal te snaʼoj te Pukuj «te nopol ya xlaj ora yuʼun», melel ya yichʼ lajinel (Apocalipsis 12:12). Te Dios jaʼnix jich ya xbajtʼ slajin te chopol ants winiketike (Salmo 37:9; Proverbios 2:22).

Kʼalal te Jpaswanej kuʼuntik la slajinix-a te bintik chopol, yame skʼotes ta pasel te skʼanojel yoʼtan ta stojol te ants winiketik sok te Balumilale. ¿Binwan yilel ya xkʼot te kuxinele?

Spisil-ora lamal-kʼinal sok maʼyuk xiwel. «Yan te machʼatic manso yoʼtanic ya me yichʼic hilel te qʼuinal soc ya me smulanic bayel lamal qʼuinal» (Salmo 37:11).

Bayal lekil weʼelil. «Ayuc me bayel trigo ta lumqʼuinal, ta baba witsetic» (Salmo 72:16).

Tʼujbil naetik sok aʼtelil te ya yakʼ tseʼel-oʼtanil. «Ya spasic nahetic soc ya xnahinic tey a, ya stsʼunic tsʼusubiltic soc ya sloʼbeyic sit. [...] Te machʼatic tsabilic cuʼun, ya me yaiybe yutsilal te yatʼel scʼabique» (Isaías 65:21, 22).

¿Yabal amulan te jichuk ya xkuxinat ta Balumilal? Spisil-abi nopolme ya xkʼot ta pasel.

Ta ora ini, jpisiltik ya stsakotik chamel sok ya xlajotik, pero nopol ya xchʼayix bael. Wokolayal te la yakʼ sba ta lajel te Jesús, te Jehová nopolme ya skʼotes ta pasel ini: «Spisil te machʼatic ya schʼuhunic ma ba ya xchʼayic, ay scuxlejalic sbahtel qʼuinal yuʼun» (Juan 3:16). ¿Binwan yilel te kuxinel-abi?

Ya xlaj skʼoplal te chamele. «Mayuc machʼa te nahinem ta Sión te hich ya yal: Ayon ta chamel, te xchihe. Ya xpasbot perdón yuʼun smulic te machʼatic nahinemic tey a» (Isaías 33:24).

Maʼyukix lajel. «Ya me slajin scuenta sbahtel qʼuinal te lajele, te Cajwaltic Jehová ya scusticlambe yaʼlel sitic ta spisilic» (Isaías 25:8).

Te ants winiketike ya xkuxinik ta sbajtʼelkʼinal. «Te mahtanil yuʼun Dios, ha te cuxlejal sbahtel qʼuinal ta scuenta te Cajwaltic Cristo Jesús» (Romanos 6:23).

Ya xchaʼkuxajik te machʼatik lajemike. «Ay chaʼcuxajel yuʼun te machʼatic chamenic, te machʼatic toj yoʼtanic soc te machʼatic ma ba toj yoʼtanic» (Hechos 24:15). Te machʼatik lajemikix ya staik lekilal-euk ta swenta te majtʼanil yuʼun te stojol kolele.

¿Bin ya xbajtʼ spas te Dios swenta ya skʼotes ta pasel spisil-abi?

Te Dios yame skʼotes ta pasel te skʼanojel yoʼtan ta stojol te ants winiketik sok te Balumilal ta swentanax te wentainel te ay ta chʼulchan te yakʼojbey ta skʼab te Jesuse (Salmo 110:1, 2). Jaʼnix te wentainel o ajwalinel-abi te la yalbey te yakuk skʼanik ta skʼoponel Dios te jnopojeletik yuʼun te Jesús kʼalal jich la yal: «Jtatic te ayat ta chʼulchan [...]. Acʼa taluc te cuentahinel awuʼun» (Mateo 6:9, 10).

Te Wentainel yuʼun Dios yame xmantalaj ta Balumilal sok yame slajin spisil wokolil sok te bin kʼuxe. Jaʼ-abi jaʼ lekil ajwalil te ya xjuʼ ya staik te ants winiketike. Jaʼ yuʼun kʼalal ayin ta Balumilal te Jesús la spas tulan ta scholel «te lec yachʼil cʼop yuʼun te cuentahinel yuʼun Dios» sok la spas ta mantal te jnopojeletik yuʼun te jichuk ya spasik-euke (Mateo 4:23; 24:14).

Ta swenta te kʼax kʼuxotik ta yoʼtan te Jehová, yaloj ta jamal te ya skʼotes ta pasel spisil te bintik sjapojbotike. ¿Mabal ya stijbat awoʼtan-abi ta snaʼbeyelxan sba sok te ya awamigoine? ¿Bintik lekilal ya xjuʼ ya ata teme jich ya apase? Jaʼ-abi yame kiltik ta yan artikulo.