Kon aada ka ha makuri nga sitwasyon, sigurado nga naglalaom ka nga bubuligan ka hin usa nga maopay nga sangkay. Tungod hito nga panhunahuna, may mga nasiring nga an Dios diri sangkay tungod kay diri nira inaabat nga ginbubuligan hira han Dios. Ha pagkamatuod, diri la damu an nahimo han Dios para ha aton kapulsanan kondi magios liwat hiya basi mawara an mga problema ngan an pag-antos nga aton inaatubang yana. Ano an pagbubuhaton han Dios?

Tatapuson han Dios an tanan nga karaotan pinaagi ha pagpoo han gintitikangan hito. Ginkikilala han Biblia kon ano an gintitikangan hito han ito magsiring: “An bug-os nga kalibotan kontrolado han gahum han usa nga maraot.” (1 Juan 5:19) Ito nga “usa nga maraot” amo liwat an gintawag ni Jesus nga “an magmarando hini nga kalibotan,” hi Satanas nga Yawa. (Juan 12:31) An impluwensya ni Satanas ha katawohan amo an surok han maraot nga kahimtang ha tuna. Ano an pagbubuhaton han Dios?

Ha diri maiha magios hi Jehova nga Dios pinaagi han iya Anak nga hi Jesu-Kristo basi “mabungkag niya an usa nga may kapas ha pagpahinabo han kamatayon, nga amo an Yawa.” (Hebreo 2:14; 1 Juan 3:8) Ha pagkamatuod, iginpapakita han Biblia nga maaram mismo an Yawa nga “halipot na la an iya panahon.” (Pahayag 12:12) Bubungkagon liwat han Dios an tanan nga hinungdan han karaotan ngan an mga nagbubuhat hito.​—Salmos 37:9; Proberbios 2:22.

Katapos wad-on an ngatanan nga karaotan ha tuna, magios an aton Maglalarang basi tumanon an iya katuyoan para ha katawohan ngan ha tuna. Ano an aton malalaoman ha tidaraon?

Waray kataposan nga kamurayawan ngan seguridad. “An maaghup makakapanonod han tuna, ngan maglilipay hira tungud han kahuraan han kamurayaw.”​—Salmos 37:11.

Hura ngan masustansya nga pagkaon. “Magkakaada kahura-an hin lugas ha tuna ha bawbaw han mga bukid.”​—Salmos 72:16.

Komportable nga balay ngan makapatagbaw nga buruhaton. “Hira magtutukud hin mga balay ngan maukoy hini; ngan hira magtatanum hin mga urubasan, ngan makaon han mga bunga hini. . . . An akon mga pinili . . . magpapahimulus han buhat han ira mga kamot.”​—Isaias 65:21, 22.

Naghihingyap ka ba nga makita an sugad nga kahimtang? Ha diri maiha, ito an maieksperyensyahan han ngatanan kada adlaw.

An ngatanan yana nagkakasakit ngan namamatay, kondi hirani na ito pagwad-on. Ha diri maiha papahinaboon han Dios an tanan nga kapulsanan han halad-lukat ni Jesus basi “an tagsa nga nagpapakita hin pagtoo ha iya diri mamatay kondi magkaada kinabuhi nga waray kataposan.” (Juan 3:16) Ano an magigin resulta hito?

Waray na magkakasakit. “An umurukoy diri masiring: Ako masakit: an katawohan nga naukoy dida pasasayloon han ira karat-an.”​—Isaias 33:24.

An mga tawo diri na mag-aantos tungod han kamatayon. “Iya linamoy ha kadayonan an kamatayon; ngan an Ginoo nga hi Jehova magpapahid han mga luha tikang ha ngatanan nga nawong.”​—Isaias 25:8.

An mga tawo mabubuhi ha waray kataposan. “An regalo nga iginhahatag han Dios amo an kinabuhi nga waray kataposan pinaagi kan Kristo Jesus nga aton Ginoo.”​—Roma 6:23.

Babanhawon an mga namatay. “May pagkabanhaw han mga matadong ngan mga diri-matadong.” (Buhat 24:15) Magpapahimulos hira han regalo han Dios​—an lukat.

Paonan-o papahinaboon ini ngatanan han Dios?

Papahinaboon han Dios an iya katuyoan para ha katawohan ngan ha tuna pinaagi hin usa nga langitnon nga gobyerno diin hi Kristo Jesus an igintoka nga Magmarando. (Salmos 110:1, 2) Amo ito an gobyerno, o ginhadian, nga igintutdo ni Jesus nga ig-ampo han iya mga sumurunod: “Amay namon ha langit, . . . kumanhi unta an imo Ginhadian.”​—Mateo 6:9, 10.

Magmamando an Ginhadian han Dios ha bug-os nga kalibotan ngan wawad-on an mga kasakit ngan pag-antos ha tuna. Ini nga Ginhadian amo an pinakamaopay nga gobyerno nga magmamando ha katawohan! Ito an hinungdan kon kay ano nga ginbuhat ni Jesus an ngatanan basi ipasamwak an “maopay nga sumat han Ginhadian” durante han iya pagministeryo ha tuna ngan ginsugo niya an iya mga disipulo nga buhaton an pariho.​—Mateo 4:23; 24:14.

Tungod han daku nga gugma ha katawohan, nagsaad hi Jehova ha pagtuman hini ngatanan nga mag-opay nga butang para ha ira. Diri ba ito nag-aaghat ha imo nga kilalahon hiya ngan magin duok ha iya? Kon bubuhaton mo ito, ano an kapulsanan hito ha imo? Igsasaysay ito han masunod nga artikulo.