Ropire atsô watobro wamhã, tô tsena aima wẽ di atsiwaihu ĩꞌuptabi hã te te aipawaptob da. Ãhã rotsaꞌrata dzarina, ĩꞌahö norĩ te te ꞌmadöꞌö dzaꞌra õ di Ropotoꞌwa ĩtsiwaihuꞌu na. E marĩ wa. Te rotsaꞌrata dzaꞌra ãne: ‘Ropotoꞌwa ĩ̱tsiwaihuꞌu ꞌwaꞌöhã, te aré ĩ̱pawapto.’ Tsena na, Ropotoꞌwa marĩ ahö na ma tô wama ꞌmanharĩ dzaꞌra duré dzahadu te dza romhu te te uprotsi da uburé robdzépatadzé hã duré ropire wama ꞌre ĩhöimana mono ãhã bötö na. E marĩ bété Ropotoꞌwa te dza ꞌmanha.

Rowatsété mono te te uprotsi da, Ropotoꞌwa te dza uprotsi rowatsété ꞌmanharĩꞌwa danhipai u ĩtsaꞌẽne. Ropotoꞌwai mreme te höiꞌré e ꞌwa ta hã: ‘Tiꞌai ãma tsiwaꞌru ꞌre ĩdahöimana dzaꞌra mono hã, Ĩwatsété uptabi dzadawa para ꞌre ĩdahöimana dzaꞌra mono na hã.’ (1 João 5:19) Ãhã ‘Ĩwatsété uptabi’ tô Jesus te te ĩꞌmahörö hã ‘dawadaꞌuri watsété ꞌwa’ na. Tahã Satanás, Waꞌuburé hã. (João 12:31) Satanás Tiꞌai ãma te te ꞌre dawadaꞌuri. Õhã danhipai u robdzépata ꞌmanharĩꞌwa Tiꞌai ꞌre. E niha Ropotoꞌwa te dza uprotsi Waꞌuburé.

Tiꞌra Jesus uꞌöbö, Wapotoꞌwa Jeová ‘te dza pru Waꞌuburé nhiptede hã, taha nhimiꞌmanharĩdzéb dzarina, dadöꞌödzé ma, datsipibuma marĩ ꞌre danhopré mono tõ da oto.’ (Hebreus 2:14; 1 João 3:8) Ropotoꞌwai mreme te watsuꞌu Waꞌuburé tsiꞌuihö na ‘dza ꞌre ĩhöimana hutu mono dzém na te te tsina ĩwaihuꞌu na’, tawamhã, tãma waihuꞌu petse di dza ĩtsiꞌutõrĩ da na hã. (Apocalipse 12:12) Ropotoꞌwa te dza duré te te ꞌre awamro ĩwatsété ꞌmanharĩꞌwa norĩ na. — Provérbios 2:21, 22.

Rowatsété mono te te uprotsi parimhã, Wapotoꞌwa te dza ãma uwaimra Ro Ĩwẽ ãma Tiꞌai ꞌre õne uꞌö ꞌre dahöimana uꞌötsi dzaꞌra mono da. E marĩ ĩwẽ dzô wa dza ꞌre wanhimipari dzaꞌra.

Rowẽ uꞌö ropipa ãna. “Ĩtsahiꞌõ norĩ tsi te dza tihöimana dzaꞌra rowẽ ãma tiꞌai ꞌre robdze uptabi na duré romharé na.” — Salmo 37:11 TNM.

Datsa ĩwẽ aihĩni ma. ‘Amnho, tiꞌai waꞌõtõ nhoꞌõmo mono na tsaꞌwari ꞌrãihö na ꞌre ĩtsaꞌwari ꞌrãtöi mono da tsi! Duré ẽtẽ ꞌrãihö nhitsiwi mono hã, amnho rowaꞌu te te ꞌre ĩtsihi dzaꞌra mono da tsi.’ — Salmo 72:16.

Danhorõwa ĩwẽ duré romhuri robdzedzé. ‘Õ norĩ hã te dza te te tsima ꞌre ꞌri dzaꞌra ĩwa tsõrõwa dzaꞌra da; Te dza uva ꞌru hã te te ꞌre dzuri duré te dza ĩꞌrã te te ꞌre huri . . . Duré ĩ̱nhimipitsutu norĩ tinhibꞌrata nhimiromhuri na te dza te te tsima ꞌre rowẽ uptabi dzaꞌra.’ — Isaías 65:21, 22 TNM.

E aima wẽ di ãhã marĩ ĩwẽ norĩ. Romhutu di oto ãne tsi ꞌre wahöimana dzaꞌra mono da.

Ãhã bötö na hã, aihĩni te ꞌre dahödzé dzaꞌra duré te ꞌre dadöꞌö dzaꞌra. Tadzahã, romhutu na ãnei õ di dza oto. Romhutu na, Ropotoꞌwa te dza ãma uwaimra uburé marĩ ĩwẽ Jesus nhimiwaꞌöbödzéb uꞌöbö. Ãne te dza ꞌmanha uburé Jesus te te ꞌre ĩtsadze dzaꞌra mono ma hã ‘ꞌre döꞌö dzaꞌra mono tõ da, döꞌö ãna ꞌre tsiꞌubumroi uꞌötsi mono da.’ (João 3:16) ꞌMadöꞌö Bíblia nhihötö norĩ taha na.

Dahödzé õ di dza oto. “Niꞌwa te te nharĩ õ di dza: ‘Ĩ̱hödzé di.’ Tiꞌai ãma ꞌre ĩhöimana dzaꞌra mono norĩ watsédé hã te dza tãma pari dzaꞌra ni.” — Isaías 33:24 TNM.

Da te robdzépata õ di dza oto dadöꞌö uꞌöbö. ‘Te dza duré oto daꞌatõmo uꞌõ, dapẽꞌẽdzé õ uꞌötsi ꞌre dahöimana uꞌötsi dzaꞌra mono da. Tawamhã duré oto ꞌre dadöꞌö dzaꞌra mono õ di dza.’ — Apocalipse 21:4.

Te dza ꞌre dahöimana uꞌötsi dzaꞌra datsiꞌutõrĩ ãna. ‘ꞌRe ĩhöimana uꞌötsi mono te te tsima ꞌre ĩwẽ mono dzé te te ꞌre ĩꞌmanharĩ dzaꞌra mono norĩ hã . . . te dza õne uꞌötsi ꞌre höimana dzaꞌra.’ — 1 João 2:17.

Adöꞌö norĩ te dza apö ꞌre höimana dzaꞌra. ‘Wa hã duré ĩ̱watsuꞌu watsété ꞌwa norĩ me ꞌRe ĩhöimana uꞌötsi mono apö te te ĩdaꞌahöiwaꞌutudzéb dzô wa mapari dzaꞌra ni, uburé ĩwẽ norĩ hã duré ĩwatsété norĩ  dzama.’ (Atos 24:15) Tahã tsada hã dawaꞌöbödzé Jeová te te ĩꞌmanharĩ uꞌöbö.

E niha bété Ropotoꞌwa te dza ãma aꞌuwaimra.

Ropotoꞌwa te dza ãma uwaimra te te tsima ĩwẽdzé hã daꞌãma hã duré Tiꞌai ãma hã tinhimirobꞌrudzém hawi. Ĩtsimirobꞌrudzé hã höiwa ãma te tihöiba duré Rotiꞌwa ĩꞌremhã Jesus Cristo. (Salmo 110:1, 2) Jesus ma tô rowahutu tidzadawa dzamarĩꞌwa norĩ ma ãhã robꞌrudzéb dzô te te rowaptẽrẽ dzaꞌra da. Te tinha: “Wamama höiwa u ꞌre ĩꞌaihöimana mono, . . . wei morĩ watẽme atsimirobꞌrudzé hã.” — Mateus 6:9, 10 RTN.

Ropotoꞌwa nhimirobꞌrudzé hã te dza te te roti Tiꞌai ãma duré te dza uprotsi uburé ropire duré robdzépada hã dama ĩhöimana hã. Tahã tô robꞌrudzé danhipai u ĩwẽ dama ĩhöimana da hã! Taha wa, Tiꞌai ãma ꞌre morĩ ré, Jesus ma tô tsiwatsutu petse “Robꞌrudzé watsuꞌu wẽ” te te dama watsuꞌu da duré te tinha ĩtsadawa dzamarĩꞌwa norĩ ãne te te ꞌre ꞌmanharĩ dzaꞌra mono da duré. — Mateus 4:23; 24:14 TNM.

Wadzawi uptabi te, Ropotoꞌwa Jeová ma tô wama ropitsutu dzaꞌra marĩ ĩwẽ norĩ na. E tahã te airétsi ãma waihuꞌu da duré ĩtẽme atsina rotété da. Ãne ꞌmanharĩ wamhã, aima rowẽ di dza. E niha bö. Ĩtsihödö amo na te dza ĩwaihu.