Pasimene ni cakusawusya, akusajembeceya kuti mjawo jwapamtima ŵakamucisye. Mwakulandana ni yeleyi, ŵandu ŵane akusaŵeceta kuti Mlungu ngaŵa mkuŵa najo paunasi ligongo akusayiwona kuti jwalakwe ngakwakamucisya. Kusala yisyene, ngaŵa kuti Mlungu agambile kutupa yindu yakutukamucisyape, nambo jwalakwe cacitendapo kandu ni yakusawusya yosope yatukusimana nayo. Ana Mlungu cacitenda yamtuli?

Mlungu cacimasya yakusakala yosope mwakumjonanga jwakusatandisya yakusakalayo. Baibulo jikusakolanga ya jwakusakalaju pajikusati, “Kwa wosope ŵakwegamila ya pa cilambo cosope capasi ali m’myala mwa jwakusakala jula.” (1 Yohane 5:19) “Jwakusakala” jweleju ni jwaŵamkolasile Yesu kuti ali ‘jwakulamulila jwa cilamboci’ jwali Satana. (Yohane 12:31) Yitendo ya Satana ni yayikusatendekasyaga kuti ŵandu asimaneje ni yakusawusya yejinji m’cilambomu. Ana Mlungu cacitenda yamtuli msogolomu?

Pacangakaŵapa, Yehofa Mlungu cakamulicisye masengo Mwanace jwakwe jwali Yesu Klistu kuti “amjonanje Satana jwele jwakwete macili ga ciwa.” (Ahebeli 2:14; 1 Yohane 3:8) Baibulo jikusalosya kuti Satana msyenejo akumanyilila kuti “jigambile kumsigalila ndaŵi panandipe” kuti ajonanjidwe. (Ciwunukuko 12:12) Mlungu cacityosya yakusakala yosope yalumo ni ŵandu ŵakusatenda yakusakala.—Salimo 37:9; Misyungu 2:22.

Panyuma pakumasya yakusakala yosope pacilambopa, Mkupanganya jwetu cacikwanilisya cakulinga cakwe cakuti ŵandu atame ni umi kwangamala m’paladaiso. Ana tujembeceyeje yindu yapi?

Mtendele wangamala. “Ŵakulitulusya cacipocela cilambo kuti ciŵe cawo, ni taciŵa pa mtendele wakupundanganya.”—Salimo 37:11.

Yakulya yejinji soni yambone. ‘Mcilambomo muciŵa yakulya yejinji, atamose pacanya pa matumbi paciŵa yakulya yejinji.’—Salimo 72:16.

Masengo soni malo gakutama gambone. “Ŵandu ŵangu tacitaŵa nyumba soni tacitamamo, tacipanda migunda ja mipeleya, tacilya yisogosi yakwe. . . . Ŵandu ŵangu ŵakusagulidwa tacisangalalila masengo ga makono gawo kwa ndaŵi jelewu.”—Yesaya 65:21, 22.

Ana wawojo akusasacililaga ali ayiweni yeleyi? Pacangakaŵapa ŵandu wosope tucisangalala ni yindu yeleyi.

Masiku agano jwalijose akusalwalaga kapena kuwa, nambo pandaŵi jelejo yeleyi ngasiyipagwasoni. Pacangakaŵapa, Mlungu cakamulicisye masengo mbopesi ja ciwombolo ca Yesu kuti “jwalijose jwakukulupilila mwa jwalakwe akawa nambo akole umi wangamala.” (Yohane 3:16) Ana yeleyi yikugopolela cici?

Yilwele yicimala. “Pangali atamose jumo mcilambomo jutaciŵeceta kuti, une ngulwala soni ŵandu wosope kweleko ulemwa wawo tiwucikululucidwa.”—Yesaya 33:24.

Ciwa ngasicipagwasoni. “Ambuje tacicimasya ciwa mpaka ndaŵi jangali mbesi. Tacipukuta misosi m’meso mwa jwalijose.”—Yesaya 25:8.

Ŵandu cacitama mpaka kalakala. “Mtuka walulele wa Mlungu uli umi wangamala mwa Klistu Yesu Ambuje ŵetu.”—Aloma 6:23.

Ŵandu ŵaŵawile cacijimuka. “Ŵandu wosope ŵaswela mtima ni ŵakusakala tacajimusya ku ŵawe.” (Masengo 24:15) Yeleyi yicikomboleka ligongo lya ciwombolo.

Ana Mlungu cacikwanilisya camtuli yosopeyi?

Mlungu cacikwanilisya cakulinga cakwe kwa ŵandu soni cilambo capasi pakukamulicisya masengo boma jakwinani jele Jwakulamulila jwakwe ali Yesu Klistu. (Salimo 110:1, 2) Yesu jwasalaga ya boma kapena kuti ucimwene paŵajiganyaga ŵakumkuya ŵakwe kupopela kuti “Atati ŵetu ŵakwinani, . . . Ucimwene wawo uyice.”—Mateyu 6:9, 10.

Ucimwene wa Mlungu ucilamulila pacilambo cosope soni ucimasya yakusakala ni yipwetesi yosope. Ucimwenewu uli boma jambone mnope kupunda maboma gosope ga ŵandu. Yeleyi ni yayamtendekasisye Yesu kulimbicila kulalicila “ngani syambone syakwamba Ucimwene” ali pa undumetume wakwe wa pacilambo capasi, soni ŵasalile ŵakulijiganya ŵakwe kukamula masengoga.—Mateyu 4:23; 24:14.

Ligongo lya cinonyelo, Yehofa asimicisye yakwatendela ŵandu yindu yakusangalasya mnopeyi. Ana yeleyi ngayikwatendekasya kusaka kummanyilila cenene jwalakwe soni kuŵa najo paunasi? Ana kusagula kutenda yeleyi kucakamucisya camtuli wawojo? Ngani jakuyicisya cijakamucisye kupata kwanga kwa yiwusyoyi.