Faanra ke yib e magawon ngom ma dabisiy ni ga ra lemnag nra rin’ e fager rom ban’en ni nge ayuwegem. Machane bay boch e girdi’ ni yad ma yog ni Got e gathi reb e fager rorad ni bochan e yad be lemnag ndariy ban’en ni be rin’ ni nge ayuwegrad. Bin riyul’ riy e, gathi kemus ni boor ban’en ni ke rin’ Got nra yib angin ngodad, ya ku bay boch ban’en nra rin’ ya nge pithig gubin e magawon nge gafgow ni gad be mada’nag e ngiyal’ ney. Ere mang e bayi rin’ Got?

Ra chuweg Got gubin e kireb ni aram e bayi thang e en ni ir tapgin e kireb. Be yog e Bible ko mini’ e cha’ ni ir tapgin e kireb. Be gaar: “Tin ni ka ba’ e girdi’ nu fayleng e ke suweyrad Faanem nib Kireb.” (1 John 5:19) Ere “Faanem nib Kireb” e aram e en ni yog Jesus ni “ir e be gagiyegnag e girdi’ nu fayleng” ni aram Satan ni Moonyan’. (John 12:31) Bochan ni Satan e ir e be gagiyegnag e re fayleng ney, ma aram fan ni ir tapgin e gafgow u roy u fayleng. Ere mang e bayi rin’ Got?

Dabki n’uw nap’an ma bayi fanay Jehovah Got Fak ni aram Jesus Kristus ni nge “kirebnag gelngin e moonyan’; yi moonyan’ e bay e yam’ u pa’.” (Hebrews 2:14; 1 John 3:8) Bin riyul’ riy e, be dag e Bible ni mus ngak fare Moonyan’ ma manang rok “ndaki n’uw nap’an ni nge par” min thang. (Revelation 12:12) Ku ra chuweg Got gubin e kireb me thang mit e piin ni yad ma ngongliy e kireb.​—Psalm 37:9; Proverbs 2:22.

Tomuren ni yira chuweg gubin e kireb u fayleng, ma En ni Ke Sunmiydad e bayi rin’ e n’en nib t’uf ya nge lebguy e n’en nib m’agan’ ngay ni fan ko girdi’ nge fayleng. Ere mang e rayog ni ngad athapeged boch nga m’on?

Gapas nge pagan’ e ra par ni manemus. “Piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba felfelan’.”​—Psalm 37:11.

Ra yoor e ggan nib fel’ nga fithik’ i dowey. “Me par e nam nib sug ko grain; me sug daken yungi ted ko woldug.”​—Psalm 72:16.

Naun nib manigil nge maruwel nra yib angin. “Girdi’ e bay ra toyed e naun mi yad par u lan, . . . Bay ra yunged e woldug ni grapes me fel’ rogorad u logowen, . . . Pi n’en ni kar muruwliyed e ri bayi fel’ rogorad riy.”​—Isaiah 65:21, 22.

Ere gur, ga be athapeg ni ngam guy e pi n’ey ni nge buch? Dabki n’uw nap’an ma ireray rogon e par ko girdi’ ni gubin e rran.

Gubin e girdi’ e ngiyal’ ney e yad ma m’ar ma ra munmun mi yad yim’, machane dabki n’uw nap’an ma bayi chuw e pi n’ey. Dabki n’uw nap’an ma ra fanay Got angin fare biyul ni ke pi’ Jesus ya nge pi’ e yafos ni manemus ngak “urngin e piin ni michan’rad ngak” Jesus. (John 3:16) Ere mang angin nra yib?

Bayi chuw e m’ar. “Dariy be’ ni be par u lan e nam rodad ni bay ki yog nib m’ar, ma denen e ke m’ay i n’ag fan ni urngin.”​—Isaiah 33:24.

Dabki yim’ e girdi’. “Somol ni Th’abi Tolang e bayi kirebnag gelngin e yam’ ni manemus! Bayi faley e lu’ u owchen gubin e girdi’.”​—Isaiah 25:8, BT.

Ra par e girdi’ ni manemus. “Tow’ath rok Got ngodad ndariy puluwon e yafos ndariy n’umngin nap’an nra pi’ u daken e taab girdi’ ni kad tiyed e Somol rodad i Jesus Kristus.”​—Roma 6:23.

Piin ni kar m’ad e bay ni fasegrad. “Bayi faseg urngin e girdi’ ko yam’, ni tin nib fel’ nge tin nib kireb.” (Acts 24:15) Ma aram e ra yib angin fare tow’ath rok Got ngorad ni bochan fare biyul.

Uw rogon ni nge lebguy Got gubin e pi n’ey?

Bayi lebguy Got e n’en nib m’agan’ ngay ni fan ko girdi’ nge fayleng u daken ba am ni bay u tharmiy ni Jesus Kristus e ir e ke dugliy ni nge mang Pilung riy. (Psalm 110:1, 2) Re am ney ara Gil’ilungun e ir e fil Jesus ngak pi gachalpen ni ngar yibilayed ni gaar: “Chitamangimad ni ga bay u tharmiy, . . . [ngam] par ni gur e ga be gagiyegnagmad.”​—Matthew 6:9, 10.

Bayi gagiyegnag Gil’ilungun Got e fayleng me chuweg gubin ban’en ni ma k’aring e amith nge gafgow ngodad. Re am ney e ireray e bin th’abi fel’ e am ni nge gagiyegnag e girdi’! Aram fan ni athamgil Jesus ni nge machibnag fare “Thin Nib Fel’ ni murung’agen e gagiyeg rok Got” u nap’an ni immoy u fayleng, miki yog ngak pi gachalpen ni ngar rin’ed e re n’ey.​—Matthew 4:23; 24:14.

Bochan nrib t’uf e girdi’ rok Jehovah Got, ma aram fan ni ke micheg nra rin’ gubin e pi n’ey nib manigil ni fan ngorad. Ere gur, gathi be k’aringem e re n’ey ni ngam adag ni ngam nang murung’agen Jehovah mag chugur ngak? Faan ga ra dugliy ni ngam rin’ e re n’ey, ma mang angin nra yib ngom? Bin migid e article e ra tamilangnag murung’agen e re n’ey.