Juntúul maʼalob amigoeʼ jeʼel u yáantkoʼon kéen k-aktáant problemaʼobeʼ. Le oʼolal yaan máaxoʼob tuklikeʼ Dioseʼ maʼ k-amigoiʼ tumen ku yaʼalikoʼobeʼ mix baʼal ku beetik t-oʼolal. U jaajileʼ yaʼab baʼaloʼob tsʼoʼok u beetik yoʼolal wíinik. Tsʼoʼoleʼ maʼ tun xáantaleʼ yaan u láaj utskíintik le problemaʼoboʼ yéetel yaan u luʼsik le muʼyajiloʼ. ¿Bix túun ken u beetil?

Dioseʼ yaan u xuʼulsik le máax beetik u yantal kʼasaʼaniloʼ. Le Bibliaoʼ ku yaʼalik: «U túulisil yóokʼol kaabeʼ tiʼ yaan yáanal u páajtalil le j-Kʼasaʼanoʼ» (1 Juan 5:19). Satanaseʼ letiʼe «j-Kʼasaʼanoʼ» yéetel letiʼ «u gobernanteil le yóokʼol kaabaʼ» (Juan 12:31). Jeʼex k-ilkoʼ letiʼe Kʼaasilbaʼal beetik u sen yantal problemaʼoboʼ. ¿Baʼax túun ken u beet Dios?

Maʼ tun xáantaleʼ Jéeobaeʼ yaan u yaʼalik tiʼ Jesús ka u xuʼuls «le máax yaan u páajtalil tiʼ utiaʼal u kíimsik máakoʼ, lelaʼ letiʼe Kʼaasilbaʼaloʼ» (Hebreoʼob 2:14; 1 Juan 3:8). Le Bibliaoʼ ku yaʼalikeʼ le Kʼaasilbaʼaloʼ «u yojel chéen junpʼíit kʼiin pʼaataltiʼ», jach taʼaytak u xuʼulsaʼal (Apocalipsis 12:12). Dios xaneʼ yaan u xuʼulsik le máaxoʼob kʼasaʼanoʼoboʼ (Salmo 37:9; Proverbios 2:22).

Le kéen luʼsaʼak le kʼasaʼaniloʼ, Jéeobaeʼ yaan u béeykuntik le baʼax u tukultmaj utiaʼal le Luʼumoʼ bey xan utiaʼal wíinikoʼ. ¿Bix le kuxtal kun antaloʼ?

Mix máak kun sajaktal tumen yaan u yantal jeetsʼelil mantatsʼ. «Le utsul máakoʼoboʼ yaan u pʼáatloʼob way luʼumeʼ, jach yaan u kiʼimaktal u yóoloʼob tumen mix baʼal kun beetik u preocuparkubaʼob» (Salmo 37:11, TNM).

Yaan u yantal yaʼab baʼax jaantbil. «Yaan u sen tsʼáaik u yich le luʼumoʼ, tak tu maas kaʼanlil le montañaʼoboʼ» (Salmo 72:16, TNM).

Yaan u yantal najoʼob jatsʼutstak yéetel maʼalob meyaj. «Máaxoʼob ku beetkoʼob u yotochoʼobeʼ bíin kajlakoʼob ichiloʼob, máaxoʼob pakʼik uvaʼobeʼ bíin u jaantoʼob u yich. [...] Le máaxoʼob in yéeymajoʼobeʼ bíin u jaantoʼob u yich u meyajoʼob» (Isaías 65:21, 22).

¿A kʼáat wa kuxtal tiʼ junpʼéel lugar beyaʼ? Maʼ tun xáantal kéen u beet Dios lelaʼ.

Bejlaʼeʼ tuláakloʼon k-kʼojaʼantal yéetel k-kíimil, chéen baʼaleʼ maʼ tun xáantal kéen luʼsaʼak. Yoʼolal u kuxtal Jesús tu kʼuboʼ, Jéeobaeʼ yaan u beetik «maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul» (Juan 3:16). ¿Bix wal le kuxtal ken u tsʼáatoʼon Diosoʼ?

Maʼ kun antal kʼojaʼaniloʼob. «Mix juntúul kajnáal bíin u yaʼal: Kʼojaʼanen. [Dios], bíin u saʼats u siʼipiloʼob» (Isaías 33:24).

Maʼ kun antal kíimil. «Bíin u xuʼuls junpuliʼ le kíimiloʼ, bíin u choʼo u jaʼil u yich tuláakal máak» (Isaías 25:8).

Yaan u kuxtal máak utiaʼal mantatsʼ. «Le siibal ku tsʼáaik Diosoʼ, kuxtal minaʼan u xuul tu yoʼolal k-Yuumtsil Cristo Jesús» (Romailoʼob 6:23).

Yaan u kaʼa líiʼsaʼal le kimenoʼoboʼ. Yaan «u kaʼa kuxkíintaʼal le kimenoʼob jeʼex u yaʼalmil Diosoʼ, le utsoʼoboʼ bey xan le kʼasaʼanoʼoboʼ» (Baʼaxoʼob [Hechos] 24:15). Jeʼex k-ilkoʼ yaan u kaʼa líiʼsaʼal le kimenoʼob yoʼolal u kuxtal Jesús tu kʼuboʼ.

¿Bix ken u béeykuntil Dios lelaʼ?

Dioseʼ yaan u béeykuntik baʼax u tukultmaj utiaʼal wíinik bey xan utiaʼal le Luʼumaʼ. Lelaʼ yaan u beetik yoʼolal le gobierno u tsʼaamaj tu kʼab Jesucristooʼ (Salmo 110:1, 2). Le gobierno wa le reinoaʼ letiʼe tu kaʼansaj Jesús tiʼ u disipuloʼob ka u kʼáatoʼob beyaʼ: «K-Taata yanech teʼ kaʼanoʼ, [...] taalak a Reino» (Mateo 6:9, 10).

Kéen káajak u gobernar u Reino Dios way Luʼumeʼ yaan u xuʼulsik tuláakal le baʼaxoʼob beetik k-muʼyajoʼ. U Reino Dioseʼ letiʼe maas maʼalob gobierno kun antaloʼ. Le oʼolal ka taal way Luʼum Jesuseʼ tu tsʼáaj u yóol u kʼaʼayt «u maʼalob péektsilil le Reinooʼ» yéetel tu yaʼalaj tiʼ u disipuloʼob ka u beetoʼob xan beyoʼ (Mateo 4:23; 24:14).

Le jatsʼuts promesaʼob u beetmaj Jéeobaoʼ ku yeʼesik jach u yaabiltmoʼon. ¿Máasaʼ lelaʼ ku péeksikoʼon k-maas kʼaj óolt Dios yéetel k-beetikba u amigo? ¿Baʼax utsiloʼob ken k-kʼam wa k-beetik beyoʼ? Lelaʼ yaan k-kanik teʼ xook ku segueroʼ.