Ka si du nga mo rogo kpakarapai, zanga kapa, mo nika ida gupai nga wene bakureamo mangipai tipa ka undo ro. Na gipai re berãse yo, kura aboro nape gupai nga bakurearani nga Mbori te mbiko i nabihe nga Mbori amanganga pai tipa ka undo yo te. Ka gumba rengo, Mbori ima manga dungu apai ani agbia undo ti ni na ko nika mangapai amanga tipa agu akpakarapai na rungo ani agbia tirani na ni areme. Gini apai Mbori nika mangaha?

Mbori nika digiso gbegberẽ apai dunduko ni diako gupai kusayo naye na ni. Baibiri nayugo gupai naye na gbegberẽ pai ho si aya ni: “Zegino dunduko du ni zogozogo ho be gbegberẽ ko.” (1 Yoane 5:19) Gu “gbegberẽ ko” re nga kina gu bangisa boro Yesu ayambu ni nga “gbia gi zegino re,” Satana Bakitingbanga. (Yoane 12:31) Ga Satana maapai kurii aboro nga mburu gu gbegberẽ apai du auru kpotosende. Ginipai Mbori nika mangaha?

Yekova Mbori nika mangapai barambeda vurube Wiriko nga Yesu Kristo tipa ‘ko gbarasi gu mangaapai nga ga guni du na tandu kpio, nga bakitingbanga.’ (AEbere 2:14; 1 Yoane 3:8) Ziazia Kekeapai nayugo gupai nga Bakitingbanga nitiko ima ino gupai nga “kina bete rago nye fu ko” tipa i gbarasi ko. (Yugoti 12:12) Mbori nika gbarasa agu aboro dunduko a namanga gbegberẽ apai.—Atambuahe 37:9; Asanza 2:22.

Tingbafuo Bakusirani nyasiriipa gbegberẽ apai dunduko auru kpotosende, ko nika mangapai ka digiso gako ringbisapai tipa aboro na kpotosende. Gini apai rengbe ani ka ngera kumbatayo tipaha?

Nyenye zereda na ngbabase. “Ono bayee aboro adía kumbo ringara, ki du na ngbarago tipa gu wenepia du kpaima.”—Atambuahe 37:11.

Wene ariahe kpaima. “Zende ahe zúku rogo ringara kpaima; si wó ri abaagangara yo.”—Atambuahe 72:16.

Wene akporo gbiati wene asunge. “I adúdua abambu ki niraki rogo; i arũka bakakue aati yo ki niri zuzuhe. . . . Gimi siasia aboro ará zezeredi tipa gbanga rago mbiko gu mangapai nga ga beyo.”—Yesaya 65:21, 22.

Ya mo mo nakpinyemu ka bi gi ngbatunga raka re? Barambeda si nika ngia gu raka aboro nikaa rakaha na aˈuru dũ.

Areme, aboro dunduko nakaza na kini kpiki ni yangaraha, ono barambeda si amanganga berewe te. Barambeda, Mbori nika ye na agu amaku du ti ga Yesu motumo tumorii tipa gupai nga “gu ni ka idi pa ko ni kpi nga te, ono nyenye unga du adu be ni.” (Yoane 3:16) Sangbanaha nika ngia gine?

I nika dia kaza kusayo. “A nga boro kporo sa ayá, ‘Mi nawoka’ te; agu aboro naraka rogo ho i avú yo avu ti gayo irairapai.”—Yesaya 33:24.

Kpio adunga berewe te. “Ko adígisa pa kpio nye anye kindi, Gbia Mbori awéga aume ti bangirise ku sa yo dunduko.”—Yesaya 25:8.

Aboro nika raka nyeanye kindi. “Ga Mbori gamunihe gbua nga nyenye unga rogo Kristo Yesu yo gaani Gbia.”—ARomo 6:23.

I nika zingisa agu aboro naima kpiko. “Ruru aboro azinga be kpio na iraira yo a.” (Amokedi 24:15) I nika gbia undo ti ga Mbori gamahe nga ga motumo tumorii.

Wai du Mbori nika manga agi apai re dunduko?

Mbori nika digiso gako ringbisapai tipa aboro na kpotosende vurube gu zogarago nga ga ngbangbaturũ, du Yesu Kristo ni gaha Bazogo. (Atambuahe 110:1, 2) Gi zogarago re watadu gi kindo re du Yesu ayugupai fu apefuoko i naakpara tipaha rogo agi afugo du re: “Barani du ngbangbaturũ yo, . . . ga ngbi yé.”—Matayo 6:9, 10.

Ga Mbori Kindo nika zogarago ku auru kpotosende na ki di aigirã na rungo dunduko kusayo. Gi Kindo re nga gu wene zogarago rengbe aboro ka raka kutii behe! Si nga ndu gupai Yesu amangi asadatise ti ni ka tungusa gu “wene pangbanga nga ga ngbi” ti regbo gako sunge tungusapai auru kpotosende ane na ki pe gupai fu gako abawiriki nga i mangihe kinawo a.—Matayo 4:23; 24:14.

Yekova Mbori ima kidohe ka manga gi wene apai re fu aboro, mbiko gu nyemuse du ko na ni koyo du gako kusikusiahe ni. Ya mo gipai re asanga ro mo idi ka ino ko na ki mbedi na ko te? Ka mo sia ka mangaha wo, gini undo mo nika gbiaha? Gu kekeapai ngbefuo gere nika sakapai tipaha.