Toib buñ ni nac ximigdxinno labúu gacnébu lóono órni cadudyno ló galnagan. Por ngú noʼ buñ ni ná que Dios diti nacbu ximigno, portín ronyibu pensary que Dios diti racné lóono. Per Dios ma buny xidal cós por lóono né mápa mer cueʼbu guirá galnagan ni cacalóno né sanitlóbu galrrioʼob ni cadudyno ló. ¿Xí cós gony Dios ló dzú ni sietra?

Dios sanitlóbu ro ralainy cós mal. La Biblia rasetlaa pu ralainy cós mal: «Guidopynac gudxliogoxreʼ noʼni ladxña ni nigolú mal» (1 Juan 5:19). «Ni nigolú mal» ngú Buñdzab, Jesús láaca goleʼ laabu «ni rony mandary gudxliogoxreʼ» (Juan 12:31). Xtol Buñdzab radudy buñ ló galnagan. ¿Xí láani gony Dios par cueʼ guirá galnagan ni cadudyno ló?

Mápa mer, Jehová Dios saquiimbu Xiimbu par guinitlóbu Buñdzab ni nap galnadip par guigaity (Hebreos 2:14; 1 Juan 3:8). Scú láani, la Biblia ná que Buñdzab «nanbu que ma tidxósi tiemp napbu» par guinitlóbu (Revelación 12:12). Dios láaca sanitlóbu guirá buñ mal (Salmo 37:9; Proverbios 2:22).

Órni ma binitlóbu cós mal, Dios ni bisaʼ lóono sony cumplirbu ni ma goniʼbu gonybu par buñ né par Gudxlio. ¿Ximod sabanyno dzúcu?

Saguaʼno goxt né diti sadzuibyno. «Buñ nadaʼa sabany ló gudxlio, né nigolú sioʼ nakityibu né saguaʼyibu goxtiguie» (Salmo 37:11).

Ma diti sadzón galrro. «Sioʼgolu ni guá buñ ló gudxlio; laidy dainy sioʼ xirogoluʼni» (Salmo 72:16).

Sapno yoʼ sacróyen né sioladxno gonyno dxiin. «Sasaʼyibu yoʼ né saquiinyibu láani, sasagaʼyibu yac cuánnax né sooyibu xcaani. [...] Guirá ni ma golúya gony dxiin né guibaladxbu por guirá ni cayonybu» (Isaías 65:21, 22).

¿Ñoladxlo nabanylo ló toib Gudxlio xomod ndeʼ la? Mapa mer sabanyno modreʼ.

Ló naareʼ guirá buñ raxoʼ né raity, per mápa mer guidxin dzú guinitló guirá ndeʼ. Raxquixno ni goity Jesús portín modreʼ Jehová sony que «guirá ni gap fe láabu diti guinitló né labúu guibany tipzó» (Juan 3:16). ¿Ximod sabanyno dzúcu?

Sanitló galguitz. «Ni toib buñ ni guibany cú guiniʼ: Caxoʼya. Guirá buñ ni cués ló gudxlio saduidy cuent que Jehová ma bituidy xcalkiéyibu scásiʼ» (Isaías 33:24).

Ma diti sioʼ galgoity. «Láabu sagaibybu galgoity por tipzó, né Señor Jehová ni rony Mandary Gudxlio né guibá, sasiá nís ni rareʼ bisaló guirá buñ» (Isaías 25:8).

Buñ sabany tipzó. «Portín galkié riaxni né galgoity, per galrrascad ni Dios raduidy láani ngú galnabány tipzó por Cristo Jesús Señor xtunyno» (Romanos 6:23).

Siás buñ ni ma goity. «Siás gueʼet ni buny xinés nisló Dios né ni diti buny xinés» (Hechos 24:15). Layibu láaca sacaʼyibu xcalnasác Dios por ni bixelbu Xiimbu goity por lóono.

¿Ximod sony Dios guirá ndeʼ?

Dios sagoʼ toib Gobierno lainy guibá ro gony mandary Jesucristo né láani sony cumplirni ni ma  goniʼ Dios gony par buñ né par Gudxlio (Salmo 110:1, 2). Gobierno reʼca bisuidy Jesús xpiin guinab lóo Dios órni goniʼbu: «Bixiosdo ni noʼ guibá [...]. Guieed Gobierno xtunylo» (Mateo 6:9, 10).

Gobierno xtuny Dios sony mandaryni Gudxlio né sabeʼni guirá maláy né galrrioʼob ni noʼ. Diti noʼ stoib gobierno más galán ni labúu gap buñ. Por ngú, órni Jesús goyoʼbu ló Gudxlio goyodieʼbu goniʼbu «diitz sacró xtuny Gobierno reʼ». Né buny mandarybu xpiimbu ñony ngúca (Mateo 4:23; 24:14).

Jehová ma goniʼ guicaʼno guirá galnasác reʼ portín nadxiʼgolubu lóono. ¿Diti rachiinni looy guimbutzaaylo né guidzaklo láabu la? ¿Xí galnasác sacaʼlo pal ronylo ngú? Guisuidyno láani ló artículo ni sieed.