Ikepam hanano, di yé i toñol mam ndék ni ndék inyu léba ndimbhe i mbadga ini le, njee a yé Djob? Ni njel Bibel, di bi bôdôl nigil le jôl jé le Yéhôva ni ki le lem i i nlôôha nene i nyeni i yé gwéha. Di bi wan ki i yom a bi boñ ni i yom a yé boñ ibôdôl nano inyu loñge i bôt ba binam. Tolakii di gwé ngandak mam i nigil inyu Nyambe, u nla badba le umbe nseñ hala a nlona we.

Yéhôva a mbôn le: “Ibale u nyéñ nye w’a léba nye.” (1 Miñañ 28:9) Bigda ki i bisai bikeñi bi mbem we ibale u nyéñ i yi njee a yé Djob, ndi u pam ki i yi nye​—“liwanda lôñni Yéhôva”! (Tjémbi 25:14) Kii ntén liwanda u ni Djob, u nla kobla lelaa inyu yoñ?

Bañga maséé. Bibel i ntoñol le Yéhôva a yé “Nyambe nu maséé.” (1 Timôtéô 1:11, MN.) I kôôge nye bebee ni i kil manjel mé i ga lona we bañga maséé, hala a nla bane we nseñ i pes mahoñol ni i pes minsôn. (Tjémbi 33:12) W’a la ki niñ ikété maséé​—ibale u nkeñgle ntén niñ u u nlona bikuu, u hôlhak ki bilem bilam, ndi u ban-ga ki maada malam ni bôt bape. U ga hémle i yom ntôp tjémbi a bi kal le: “I yé me loñge le me tiige bebe ni Nyambe.”​—Tjémbi 73:28.

Matééda malam ni nduña. Yéhôva a bi bôn bagwélél bé le: “M’a ti we pék, jis jem li noñok we.” (Tjémbi 32:8) Hala a nkobla le Yéhôva a nyoñ ngéda ni hiki ngwélél wé, a hôlga ki hiki wada inoñnaga ni yom i mbéda nye.

Bilôl bilam. Ha beh ndugi le a néhne we njel i niñ ikété maséé ibôdôl nano, Yéhôva Nyambe a nyiblene ki we njel i bana bilôl bilam kiyaga. (Yésaya 48:17, 18) Bibel i nkal le: “I jam lini jon li nkena i niñ boga: Le ba pam i yi we, bañga mpom Nyambe, ni nu u bi ep le Yésu Kristô.” (Yôhanes 17:3, MN.) Tolakii mangéda ma nlet i len ini, botñem Djob a nti i yé kiki hikoba hi hi “ nla bé set, hi umi ki siñ.”​—Lôk Héber 6:19.

Ha a yé ndigi ndék matode malam ikété ngandak i i nhôla i tibil yi Nyambe ni i yéñ bana maada ma tôbôtôbô ni nye. Di nti we makénd le u kwel ni Mbôgi Yéhôva yada tole u yuuga sit yés internet jw.org inyu kôhna biniigana bilam bipe.