Nasabat na naton sing amat-amat ang pamangkot nga, Sin-o ang Dios? Natun-an naton sa Biblia nga ang iya ngalan amo si Jehova kag ang iya panguna nga kinaiya amo ang gugma. Natun-an man naton kon ano na ang iya nahimo kag pagahimuon pa. Bisan madamo pa ang aton matun-an parte sa Dios, mahimo magapalibog ka kon ano ang imo mabenepisyo sa sini.

Nagpromisa si Jehova nga “kon pangitaon mo sia, makita mo sia.” (1 Cronica 28:9) Malahalon gid nga regalo ang mabaton mo kon pangitaon mo kag kilalahon ang Dios, kay mabaton mo “ang suod nga pagpakig-abyan kay Jehova”! (Salmo 25:14) Ano ang mabenepisyo mo sa sini?

Matuod nga kalipay. Si Jehova “malipayon nga Dios.” (1 Timoteo 1:11) Mangin malipayon ka gid kon suod ka sa iya kag ginasunod mo ang iya mga kasuguan, kag mangin maayo ang imo kahimtangan sa emosyon, sa panghunahuna, kag sa pisikal. (Salmo 33:12) Mangin malipayon ka man kay malikawan mo ang makahalalit nga pagkabuhi, mapauswag mo ang maayo nga mga kinaiya, kag mangin maayo ang imo relasyon sa iban. Magaugyon ka sa ginsiling sang salmista: “Para sa akon, maayo nga magpalapit sa Dios.”—Salmo 73:28.

Ulikdan ka niya kag atipanon. Si Jehova nagpromisa sa iya mga alagad: “Laygayan ko ikaw samtang nagatulok ako sa imo.” (Salmo 32:8) Gani ginaatipan gid ni Jehova ang iya mga alagad suno sa ila mismo mga kinahanglanon. (Salmo 139:1, 2) Kon suod ka na kay Jehova, indi ka gid niya pagpabay-an.

Matahom nga palaabuton. Ginabuligan kita ni Jehova nga Dios nga magmalipayon subong kag ginhatagan man niya kita sing matahom nga palaabuton. (Isaias 48:17, 18) Ang Biblia nagasiling: “Ini nagakahulugan sang kabuhi nga wala sing katapusan, ang pagkilala nila sa imo, ang lamang matuod nga Dios, kag sa imo ginpadala, si Jesucristo.” (Juan 17:3) Sa sining mabudlay nga panahon, ang paglaum nga ginatanyag sang Dios mangin pareho sa angkla nga “pat-od kag malig-on.”—Hebreo 6:19.

Pila lang ini sa mga rason kon ngaa dapat kilalahon pa gid naton ang Dios kag kon ngaa dapat mangin suod kita sa iya. Ginaagda ka namon nga kontakon ang isa sa mga Saksi ni Jehova ukon kadtuan ang jw.org/hil para sa dugang nga impormasyon.