Gũkinyĩria haha, nĩ twĩrutĩte maũndũ mangĩtũteithia gũcokia kĩũria gĩkĩ, Ngai Nũũ? Twambĩrĩirie na kwĩruta atĩ rĩĩtwa rĩa Ngai rĩrĩa rĩ thĩinĩ wa Bibilia nĩ Jehova, na tuona atĩ ngumo yake ĩrĩa nene nĩ wendo. Ningĩ nĩ tuonire maũndũ marĩa aneka na marĩa abangĩte gwĩka ma kũguna andũ. O na gũtuĩka kũrĩ o na maũndũ mangĩ maingĩ tũngĩĩruta megiĩ Ngai, no gũkorũo nĩ ũreyũria gwĩka ũguo kũngĩkũguna atĩa?

Jehova eranĩire atĩ “angĩkorũo nĩ ũkũmũcaria, nĩ ekũreka ũmuone.” (1 Maũndũ ma Matukũ ma Tene 28:9, New World Translation) Ta wĩcirie kĩheo kĩa goro kĩrĩa ũngĩgĩa nakĩo nĩ ũndũ wa gũcaria Ngai na kũmũmenya, na nĩkĩo “ũrata wa hakuhĩ na Jehova”! (Thaburi 25:14, NWT) Ũrata ta ũcio ũngĩgũteithia atĩa?

Kũgĩa na gĩkeno kĩa ma. Bibilia ĩtaga Jehova “Ngai ũrĩa mũkeni.” (1 Timotheo 1:11) Kũmũkuhĩrĩria o hamwe na kwĩgerekania nake nĩ kũrĩtũmaga ũgĩe na gĩkeno kĩa ma, ũndũ ũrĩa ũngĩkũguna kĩĩmwĩrĩ na kĩĩmeciria. (Thaburi 33:12) Ningĩ no ũhote kũgĩa na ũtũũro ũrĩ na gĩkeno na njĩra ya gwĩthema mĩtugo ĩrĩa ĩngĩgũthũkia, gũkũria mĩtugo mĩega, na gũikarania wega na andũ arĩa angĩ. O nawe no uuge o ta mwandĩki wa thaburi ũrĩa woigire: “Gũkuhĩhĩria Ngai, nĩkuo kũnjagĩrĩire.”​—Thaburi 73:28.

Gwĩcirio na kũrũmbũiyo nĩwe. Jehova eerĩire ndungata ciake ũũ: “Ndĩĩgũtaaraga o ngĩkũbaraga na riitho rĩakwa.” (Thaburi 32:8) Ũndũ ũcio ũronania atĩ Jehova arũmbũyagia ndungata ciake irĩ mũndũ ũmwe ũmwe na akahe o ĩmwe kĩrĩa ĩrabatara. (Thaburi 139:1, 2) Warĩkia kũgĩa na ũrata mwega hamwe na Jehova, nĩ ũrĩonaga atĩ hingo ciothe nĩ arĩkoragwo ehaarĩirie gũgũteithia.

Kĩĩrĩgĩrĩro kĩega kĩa ihinda rĩrĩa rĩroka. Makĩria ma gũgũteithia kũgĩa na ũtũũro ũrĩ na gĩkeno na muoroto ihinda-inĩ rĩrĩ, Jehova Ngai ningĩ nĩ akũheaga kĩĩrĩgĩrĩro kĩega kĩa ihinda rĩrĩa rĩroka. (Isaia 48:17, 18) Bibilia yugaga: “Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma, na mamenye ũrĩa watũmire, nĩwe Jesu Kristo.” (Johana 17:3) Mahinda-inĩ maya maritũ, kĩĩrĩgĩrĩro kĩu Ngai aheanaga no gĩkorũo gĩtariĩ ta nanga harĩ ithuĩ, gĩgatũteithia gũikara tũrĩ na ‘ma na tũrũmĩte.’​—Ahibirania 6:19.

Icio no itũmi imwe iria ingĩtũma wende kũmenya Ngai makĩria na gũkũria ũrata wa hakuhĩ hamwe nake. Tũgũkũũria waranĩrie na Mũira wa Jehova o wothe kana ũhingũre website ya jw.org/ki na nĩ ũkwĩruta ũhoro makĩria.