Fiyo opapa otwa mona enyamukulo kepulo kutya, Kalunga oye lyelye? Otwe lihonga mOmbiibeli kutya edina laye oJehova nosho yo kutya oukwatya waye oo u didilikwedi, ohole. Otwe lihonga yo osho a ninga naasho ta ka ninga opo ovanhu va mone ouwa. Nonande ope na shihapu okulihonga kombinga yaKalunga, otashi dulika u diladile nghee tashi ke ku etela ouwa ngeenge owe lihongo shihapu.

Jehova okwa udaneka kutya “ngeenge to mu kongo, oto ke mu mona.” (1 Omafimbo 28:9) Ngeenge owa shiiva Kalunga, oto ka kala u na ‘eendafano nOmwene’ ile tu tye ekwatafano lopofingo naye le likalekelwa. (Epsalme 25:14) Ekwatafano olo lopofingo otali ka tya shike kwoove?

Ehafo lashili. Jehova okwa popiwa e li ‘Kalunga omunelao.’ (1 Timoteus 1:11) Ngeenge otwa ehene popepi naye nokuhopaenena eendjila daye, otashi ke tu etela ehafo lashili, naasho otashi dulu oku tu etela ouwa pamadiladilo nosho yo palutu. (Epsalme 33:12) Ohatu dulu yo okukala twa hafa monghalamwenyo, mokuhenuka eenghedi inadi koshoka, okukulika eenghedi diwa nosho yo okukaleka po ekwatafano letu navamwe. Oto ka twa kumwe nomupsalme oo a ti: “Okukala popepi naKalunga, osho elao lange.” — Epsalme 73:28.

Efiloshisho. Jehova okwa udanekela ovapiya vaye a ti: “Onda hala ndi ku twe omayele; eisho lange tali ku pashukile.” (Epsalme 32:8) Osho osha hala kutya Jehova oha file oshisho ovapiya vaye pauhandimwe nohe va pe osho va pumbwa. (Epsalme 139:1, 2) Ngeenge owa kulike ekwatafano liwa naJehova, oto ka mona kutya oku na ko nasha naave.

Onakwiiwa itunhula. Shikwao vali, okwe tu kwafela tu kale twa hafa notu na onghalamwenyo tai ti sha paife, ashike natango okwe shi ningifa tashi shiiva opo tu ka mone onghalamwenyo itunhula monakwiiwa. (Jesaja 48:17, 18) Ombiibeli oya ti: “Nomwenyo waalushe oo tuu ou, vo ve ku shiive, Oove auke Kalunga kashili, naau we mu tuma, Jesus Kristus.” (Johannes 17:3) Mounyuni ou wa kolokosha, otu na eteelelo olo Kalunga e tu pa li li ngaashi ekanghameno loku tu ‘pameka nola kwatelela.’ — Ovaheberi 6:19.

Oinima oyo oi li imwe yomomatomheno a fimana, oo tae tu ningifa tu shiive nawa Kalunga nokukulika ekwatafano lopofingo naye. Oto dulu okupopya naumwe womEendombwedi daJehova ile u ye ko-jw.org/kj opo u mone ouyelele muhapu.