O Zaya Nzambi Nkia Nsambu Dilenda Kutwasila?
Yamu wau, mayingi kala tulongokele matusadisi mu vana e mvutu za kiuvu eki: Nani i Nzambi? Tulongokele kala muna Nkand’a Nzambi vo e nkumbu andi Yave, o zola i fu kiandi kisundidi. Tulongokele mpe mana kevanganga ye mana kesinga vanga muna wete dia wantu awonso. Kansi, mayingi diaka tulenda longoka mu kuma kia Nzambi. Nanga olenda kukiyuvula: O zaya Nzambi nkia nsambu dilenda kuntwasila?
Yave wasia nsilu vo ‘avo okuntomba, osoloka oku wina.’ (1 Tusansu 28:9) Avo otomba Nzambi yo kunzaya ovua nsambu, i sia vo, ‘kikundi yo Yave.’ (Nkunga 25:14) E kikundi kiaki nkia nluta kikutwasila?
Okala ye kiese kiakieleka. Yave oyikilwanga vo “Nzambi a kiese.” (1 Timoteo 1:11) O kala nkundi a Nzambi yo tanginina e fu yandi dikutwasila kiese kiakieleka, kina kilenda kutwasila nluta muna ngindu ye muna nitu. (Nkunga 33:12) Okala mpe ye zingu kiakiese muna venga nzila zambi, yima fu yambote yo kala ye ngwizani ambote ye akaka. Okwikila muna mvovo mia ntozi a nkunga ona wavova vo: “O finama Nzambi i wete oku ngina.”—Nkunga 73:28.
Yave otoma kulunga-lunga. Yave wasia nsilu kwa selo yandi vo: “Ikulongesela, yo kusia meso.” (Nkunga 32:8) Ediadi disongele vo Yave osianga e sungididi muna konso selo kiandi yo lungisa e nsatu zandi. (Nkunga 139:1, 2) Avo okedi ye ngwizani ambote yo Yave, yandi okala yaku ntangwa zawonso.
Zingu kiakiese kuna sentu. Vana ntandu a kusadisa mu kala ye zingu kiakiese owau, Yave wa Nzambi olenda mpe kusadisa mu kala ye zingu kiakiese kuna sentu. (Yesaya 48:17, 18) Nkand’a Nzambi uvovanga vo: “Muna vua moyo a mvu ya mvu, divavanga vo batoma kuzaya, ngeye Nzambi mosi kaka aludi yo Yesu Kristu ona watuma.” (Yoane 17:3) Mu lumbu yayi yampasi tuzingilanga, e vuvu kina Nzambi kekutuvananga kilenda tezaneswa ye luvaku lusimbininanga e nzaza, kadi kikutusadisanga mu ‘sikila’ muna ludi.—Ayibere 6:19.
Eyayi kuma yakete kaka tuyikidi isonganga o mfunu wa toma zaya Nzambi yo kala ye ngwizani ambote yo yandi. Muna zaya mambu mankaka, tulombele wamokena ye mosi muna Mbangi za Yave yovo ziula e nzil’eto ya internete, jw.org.
Nanga Oyangalela Mpe Malongi Mama
MALONGI MA SINA MA BIBILA
Nga Olenda Kala Nkundi a Nzambi?
Tuka kolo o wantu bekalanga yo luzolo lwa zaya o Mvangi au. E Bibila kilenda kutusadisa mu kala akundi a Nzambi. O lubantiku lwa kikundi kiaki i zaya e nkumbu a Nzambi.
