Badwu ɛke, yɛzuzu ninyɛne bie mɔ mɔɔ ɛboa yɛ ɛmaa yɛnyia kpuya ɛhye mɔɔ se Nwane a le Nyamenle? la anwo mualɛ. Yɛzukoale ye wɔ Baebolo ne anu kɛ ye duma a le Gyihova na ye subane titili a le ɛlɔlɛ. Eza yɛzuzu ninyɛne mɔɔ yeyɛ nee mɔɔ ɔbayɛ yeaboa alesama la anwo. Dɔɔnwo wɔ ɛkɛ mɔɔ yɛbahola yɛazukoa ye wɔ Nyamenle anwo ɛdeɛ, noko bie a ɛbabiza kɛ, kɛzi ɔbaboa me ɛ?

Gyihova ɛbɔ ɛwɔkɛ kɛ “saa ɛkɔ ye ɛkɛ ne a, ɔbalie wɔ.” (1 Edwɛkɛsisilɛ 28:9) Dwenle nwo nea, saa ɛkpondɛ Nyamenle na ɛnwu ye boɛ a, ɛbanyia ahyɛlɛdeɛ mɔɔ sonle bolɛ​—‘Gyihova Agɔnwolɛvalɛ’! (Edwɛndolɛ 25:14) Kɛzi agɔnwolɛvalɛ ɛhye baboa wɔ ɛ?

Nɔhalɛ anyelielɛ. Bɛha Gyihova anwo edwɛkɛ kɛ ɔle “anyelielɛ Nyamenle.” (1 Timote 1:11) Saa ɛbikye ye na ɛsukoa ye ndenle ne mɔ a, ɔbamaa wɔanyia nɔhalɛ anyelielɛ, na yemɔ baboa wɔ wɔ nganeɛdelɛ nu, adwenle nu yɛɛ nwonane nu. (Edwɛndolɛ 33:12) Eza ɛbahola wɔanyia anyelielɛ wɔ ɛbɛlabɔlɛ nu ɔlua ɛ nwo mɔɔ ɛbahwe wɔavi nyɛleɛ mɔɔ baboda wɔ la anwo, wɔanyia subane mɔɔ baboa wɔ, na ɛ nee awie mɔ avinli ahɔ zo ayɛ kpalɛ la azo. Ninyɛne ɛhye mɔ bamaa ɛ nye alie. Ɛ nee edwɛndolɛnli ne mɔɔ hanle kɛ: “Ɔle kpalɛ kɛ menwɔbikye Nyamenle” la bayɛ adwenle.​—Edwɛndolɛ 73:28.

Ɔbanlea wɔ. Gyihova bɔ ye azonvolɛ ɛwɔkɛ kɛ: “Mebamaa me nye ara ɛ nwo zo na meadu wɔ folɛ.” (Edwɛndolɛ 32:8) Mɔɔ ɛhye kile la a le kɛ, Gyihova maa ɔ nye kɔ ye sonvolɛ ko biala anwo zo na ɔfa mɔɔ ɔhyia la ɔmaa ye. (Edwɛndolɛ 139:1, 2) Saa ɛ nee Gyihova nyia agɔnwolɛvalɛ kpalɛ a, ɛbanwu ye kɛ ɔwɔ ɛkɛ ne ɔmaa wɔ dahuu.

Kenle bie mɔɔ yɛ anyelielɛ. Debie bieko mɔɔ Gyihova Nyamenle ɛyɛ amaa wɔanyia anyelielɛ nee ɛbɛlabɔlɛ mɔɔ yɛ ahunlundwolɛ la a le kɛ, yebuke nwolɛ adenle ne yemaa wɔ amaa wɔanyia kenle bie mɔɔ yɛ nwanwane. (Ayezaya 48:17, 18) Baebolo ne ka kɛ: “Ɛhye a le dahuu ngoane a, kɛ bɛkɛnwu wɔ, nɔhalɛ Nyamenle kokye ne, nee mɔɔ ɛzoanle ye la, Gyisɛse Kelaese.” (Dwɔn 17:3) Wɔ mekɛ ɛhye mɔɔ anu yɛ se la anu, anyelazo ne mɔɔ Nyamenle fa maa yɛ la le kɛ sɛkɛ mɔɔ maa ‘yɛgyinla ye pi yɛɛ kpundi la.’​—Hibuluma 6:19.

Ɛhye mɔ nee ndelebɛbo gyɛne bie mɔ ati a ɔwɔ kɛ ɛnwu Nyamenle boɛ na ɛfa ye agɔnwolɛ a. Ɛbahola ɛ nee Gyihova Alasevolɛ ne mɔ anu ko biala adendɛ anzɛɛ kɔ jw.org/nzi amaa wɔanyia nwolɛ edwɛkɛ dɔɔnwo mɔɔ baboa la.