Dios ima shina cashcata yachangapajmi huaquin yuyaicunata ricushcanchij. Bibliapi nishca shinaca, Diospaj shuti Jehová cashcata, paica yallitaj cꞌuyaj cashcatapishmi yachashcanchij. Ñucanchijmanta imata rurashcata, shamuj punllapi imata ruranatapishmi ricushcanchij. Pero Diostaca ashtahuanmi rijsishpa catina cangui. ¿Imamantataj paitaca ashtahuan rijsina cangui?

Jehová Diosca: ‘Can ñucata mashcashpaca japinguimi’ ninmi (1 Crónicas 28:9). Diosta rijsingapaj esforzarishpaca paipaj alli amigomi tucungui (Salmo 25:14). ¿Paipaj amigo canaca ima shinataj ayudanga?

Cushillami causangui. Bibliapica Jehová Diosca “cushi Diosmi can” ninmi (1 Timoteo 1:11, NM). Paipajman ashtahuan cꞌuchuyashpa, pai munashca shina imatapish rurashpaca cushillami causangui (Salmo 33:12). Mana alli ruraicunatapish huashaman saquishpaca shujtajcunahuanmi sumajta causangui. Salmista nishca shinami yuyangui. Paica: “Ñucapajca, Taita Diospaj cꞌuchupi canami alli” nircami (Salmo 73:28).

Diosmi canta cuidanga. Diosca: “Ñuca ñahuitaca canmanta manataj anchuchishachu” ninmi (Salmo 32:8). Jehová Diosca paita sirvijcuna imata minishtishcata ricushpami cada unota alli cuidan (Salmo 139:1, 2). Diospaj amigo tucushpaca pai ima shina cuidajtami canpish ricungui.

Shamuj punllapica sumaj causaitami japingui. Jehová Diosca shamuj punllacunapipish alaja bendicioncunatami cunga (Isaías 48:17, 18). Bibliapica: “Huiñai causaita charinaca cashnami: Diostajca canlla cashcata rijsinami, Jesucristopish can cachashca cashcata crinami” ninmi (Juan 17:3, QC, 1989). Dios cusha nishcacunapi yuyailla canaca “barcota charicuj fierro shinami” can. Sinchi llaquicuna ricurijpipish Diosmanta manataj caruyashunchu (Hebreos 6:19).

Cai yachaipica, Diospaj amigocuna japina huaquin bendicioncunamantami yachashcanchij. Ashtahuan yachasha nishpaca, testigo de Jehovacunahuan parlachun o jw.org paginata ricuchunmi animanchij.