Kufikela swoswi, se hi tiva nhlamulo ya xivutiso lexinge i mani Xikwembu. Hi sungule hi kudjondza aBibeleni leswaku vito la Xikwembu i Yehovha ni leswaku lirhandzu hi lona li vonekaka ngopfu ka wumunhu la xona. Hi tlhele hi djondza hi leswi Xikwembu xiswi yendleke ni leswi xingataswi yendla leswaku xi vuyelisa vanhu hinkwavo. Kaha ni swin’wana swotala leswi hingaswi djondzaka hi Xikwembu, kambe ungaha tivutisa leswaku uta vuyeliwa hi yini hi kudjondza leswi yengetelekeke hi xona.

Yehovha a tshembisa leswaku loko “umulava atayendla leswaku umukuma” (1 Tikronika 28:9) Yanakanya hi nyiko ya kutsakisa leyi ungatayi kuma loko u yendla minzamu ya kutiva Xikwembu, kunga kuva ni “wunghana la likulu” na xona! (Tipisalema 25:14) Xana wunghanu lotano lingaku vuyelisa hi yini?

Uta tsaka swa ntiyiso. Yehovha a hlamuseliwa tani hi “Xikwembu lexitsakeke”. (1 Timotiya 1:11) Kutshinela ka yena ni kutekelela wumunhu la yena switaku yendla u tsaka. Kutani kutsaka loku kutaku rhulisa miyanakanyo ni kuku pfuna kuva ni lihanyo lelinene. (Tipisalema 33:12) Nakambe uta va ni wutomi la kutsakisa hi kufambela kule ni matikhomela ya kubiha, kuhlakulela minkhuva leyi sirhelelaka wutomi ni kuhanyisana kahle ni vanhu van’wana. Uta pfumelelana ni mupisalema lweyi anga te: “Kutshinela kusuhi na Yehovha i swinene ka mina.” — Tipisalema 73:28.

Uta khataleliwa. Yehovha a tshembise malandza ya yena a ku: “Nitakunyika ndzayo niveke tihlo la mina ahenhla ka wena.” (Tipisalema 32:8) Leswi swi vula leswaku Yehovha hi yexe a khatalela nandza mun’wana ni mun’wana wa yena naswona a nyika mun’wana ni mun’wana leswi aswi lavaka hakunene. (Tipisalema 139:1, 2) Loko se u li ni wuxaka la linene na Yehovha, utaswi vona leswaku waku pfuna minkama hinkwayo.

Uta va ni wumundzuku la kutsakisa. Handle ka kuku pfuna leswaku u va ni wutomi la kutsakisa swoswi, Yehovha Xikwembu a tlhela aku pfulela mukhandlu wa kuva ni wumundzuku la kutsakisa. (Esaya 48:17, 18) Bibele li li: ‘vutomi lebyingaheliki, hi leswaku vakutiva, wena ntsena unga Xikwembu xa ntiyiso, na Yesu Kriste lweyi umurhumeke.’ (Yohane 17:3) Ka minkama leyi ya kukarhata, ntshembo lowu Yehovha ahi nyikaka wona, ‘lowutiyeke ni kutshembeka’, wungahi pfuna kutiyisela. — Vaheveru 6:19.

Leswi kova swivangelo swingaliswingani swolava kudjondza hi Xikwembu ni kuyaka wunghanu la le kusuhi na xona. Haku rhamba leswaku u khuluma ni Timboni ta Yehovha kumbe kunghena ka jw.org/jw-cgm leswaku u kuma rungula lin’wani.