Hini nga serye hin mga artikulo, nahibaroan naton an baton ha pakiana nga, Hin-o an Dios? Nagtikang kita pinaagi ha pahibaro ha Biblia nga Jehova an iya ngaran ngan gugma an iya nangunguna nga kalidad. Ginhisgotan liwat naton kon ano an iya mga ginbuhat ngan pagbubuhaton pa para ha kapulsanan han katawohan. Bisan kon damu pa an sadang hibaroan mahitungod ha Dios, bangin mahunahuna mo kon ano an kapulsanan para ha imo han pagkilala ha iya.

Hi Jehova nagsasaad nga “kon pamilngon mo hiya, itutugot niya nga maagian mo hiya.” (1 Cronicas 28:9) Handurawa an presyoso nga regalo nga imo makakarawat samtang imo ginpapamiling ngan nakikilala an Dios—“an duok nga pakigsangkay kan Jehova”! (Salmo 25:14) Ano an kapulsanan para ha imo han sugad nga pakigsangkay?

Tinuod nga kalipay. Hi Jehova iginhuhulagway sugad nga an “malipayon nga Dios.” (1 Timoteo 1:11) An pagin duok ha iya ngan pagsubad han iya mga paagi maghahatag ha imo hin tinuod nga kalipay, nga magigin mapulsanon ha imo ha emosyonal, mental, ngan pisikal. (Salmo 33:12) Magkakaada ka liwat malipayon nga kinabuhi pinaagi ha paglikay ha nakakadaot nga estilo han pagkinabuhi, pagkultibar hin mag-opay nga pamatasan, ngan pagtipig hin maopay nga relasyon ha iba. Mauyon ka ha ginsiring han salmista: “Maopay an pagpahirani ha Dios para ha akon.”—Salmo 73:28.

Personal nga pagtagad ngan atensyon. Hi Jehova nagsasaad ha iya mga surugoon: “Sasagdonan ko ikaw samtang nagkikita ako ha imo.” (Salmo 32:8) Nangangahulogan ito nga hi Jehova maghahatag ha iya mga surugoon hin personal nga atensyon ngan iya ipapahiuyon an iya pag-ataman ha ira tagsa nga panginahanglan. (Salmo 139:1, 2) Kon napatubo mo na an maopay nga relasyon kan Jehova, makikita mo nga aada hiya pirme para ha imo.

Makalilipay nga tidaraon. Dugang pa han igintatanyag ha imo nga malipayon ngan makapatagbaw nga kinabuhi yana, ginbubuligan ka ni Jehova nga Dios nga magkaada liwat makalilipay nga tidaraon. (Isaias 48:17, 18) An Biblia nasiring: “Nangangahulogan ini hin kinabuhi nga waray kataposan, an ira padayon nga pagkilala ha imo, an amo la nga tinuod nga Dios, ngan ha iya nga imo ginsugo, hi Jesu-Kristo.” (Juan 17:3) Hinin masamok nga panahon, an paglaom nga igintatagana han Dios puropariho hin angkla nga “sigurado ngan marig-on” nga magtitipig ha aton.—Hebreo 6:19.

Pipira la ini han damu nga importante nga rason kon kay ano nga sadang naton kilalahon an Dios hin mas labaw pa gud ngan magkultibar hin duok nga relasyon ha iya. Gin-aabiabi ka namon nga makiistorya ha usa han mga Saksi ni Jehova o bumisita ha jw.org para hin dugang nga mapulsanon nga impormasyon.