Wa tô tsadaꞌöbö dzaꞌra ni ãhã ĩtsõrédzém na dadzadanharĩ hã: E ꞌwa hã Ropotoꞌwa. Ĩmorĩꞌrata na, wa tô waihuꞌu dzaꞌra ni Bíblia ꞌre Jeová na ĩtsitsi na hã duré dadzawi ĩhöimanadzé hã danhipai u ĩtsaꞌẽtẽ na hã. Wa tô duré ꞌmadöꞌö dzaꞌra ni Ropotoꞌwa oto te te ĩꞌmanharĩdzé hã duré dzahadu dza te te ĩꞌmanharĩdzéb da hã dapibuma. Dzahadu marĩ ahö di wa te ãma waihuꞌu dzaꞌra da. Tadzahã, ãté te ꞌröwi ĩrotsaꞌra: ‘E marĩ wa, ĩ̱ma rowẽ di dza Ropotoꞌwa te waihuꞌu wamhã.’

Jeová te ropitsutu ‘tsô airĩtĩ wamhã, dza ĩtsõpẽtẽ na hã’. (Atos 17:27) Tô tsena Ropotoꞌwa dzô airĩtĩ wamhã duré ãma waihuꞌu wamhã, danhibdzari ĩwẽ uptabi te dza aima titsõ: ‘atsiwaihuꞌu na te dza aima ꞌre höimana’! (Provérbios 3:32) E niha te dza aipawapto atsiwaihuꞌu na.

Aima robdzei uptabi di dza. Bíblia te tinha Jeová Ropotoꞌwa ‘rowẽ uꞌötsi ꞌre ĩmorĩ na hã.’ (1 Timóteo 1:11) Ãma atsiwaihuꞌu wamhã duré ĩhöimanadzém na tsidzutsi wamhã, aima rowẽ di dza aipẽꞌẽ na, atsimirotsaꞌrata na duré aihöiba na. (Lucas 11:28) Aima robdze ti dza duré aihöimanadzé ĩwẽ na dza aihöimana wa dahöimanadzé aiwamnarĩdzé wẽꞌõ tsina duré dama dza ꞌre aihöimana wẽ mono wa. Ãne wamhã, te dza ĩrotsaꞌra salmo nhihötöꞌwa na te te ĩnharĩ hã: “Ĩ̱ma hã, wẽ di Ropotoꞌwa tẽme te ĩ̱tsina rotété da.” — Salmo 73:28 TNM.

Ropotoꞌwa tsimidzawi na te dza aiꞌmadöꞌö wẽ. Jeová ma tô ropitsutu tãma ĩromhuriꞌwa norĩ ma: ‘Wa dza te ꞌre atsaprõni uꞌötsi. Duré wa dza te ꞌre aiꞌmadöꞌö petse.’ (Salmo 32:8) Jeová te te ꞌmadöꞌö wẽ tãma ĩromhuriꞌwai mono hã duré te te tãma ꞌre anhomri dzaꞌra tiwi tsô ĩrowaptöꞌö dzaꞌra hã. (Salmo 139:1, 2 TNM) Jeová ãma atsiwaihuꞌu uptabi wamhã, te dza ĩꞌumnha õ hã dza te te ꞌre ĩꞌaipawapto mono na hã.

Dahöimanadzé rowẽ na tsi aptoꞌoré. Ropotoꞌwa Jeová te dza aipawapto oto atsima robdze da awaꞌawi duré te te ãma uwaimrami waihuꞌu petse di rowẽ na tsi ꞌre aihöimana mono da aptoꞌoré. (Isaías 48:17, 18 TNM) Bíblia te tinha: ‘Ã hã dahöimanadzé ĩtsiꞌutõrĩꞌõ: Da te aiwaihuꞌu dzaꞌra da, aiwététsi tsena na ꞌRe ĩhöimana uꞌötsi mono na, duré Jesus Cristo, da te waihuꞌu dzaꞌra da, tiꞌai u we ĩtsatõrĩ hã.’ (João 17:3) Ãhã bötö na hã ropire ꞌrowi ꞌre wahöimana dzaꞌra mono nherẽ, dahöimanadzé ĩtsiꞌutõrĩꞌõ dzô ꞌre ĩwanhimipari dzaꞌra hã ubaꞌre tétédzém ne, te wapawaptob dzaꞌra ‘wanhiptete uꞌötsi’ ꞌre wanomro mono da. — Hebreus 6:19.

Ma tô ĩwaihu tsuru na e marĩ wa wẽ di Ropotoꞌwa wa te waihuꞌu petse dzaꞌra da duré ĩtẽme wa te watsina rotété dzaꞌra da. E te atsima ĩwẽ waihuꞌu da duré taha na. Maꞌãpé robdzanhamri tsiwaꞌru Jeová Watsuꞌuꞌwai ma niwamhã tsabu na site jw.org.