MARÜ CUÜ̃ nangupetü i baitchiãne rü waiümü i waamüü̃ rü to i anüpaagü? Marü cuü̃ nangupetügu rü nüü̃ cucuaꞌ na nhuü̃ nhaü̃ ngẽguma tama nüü̃ icuaꞌgu na taꞌacü iügüü̃, ingetchaü̃ãcü inugu, ioegaãẽgügu rü tchiri ianegügu. Muẽma ya duẽẽgü rü tayaõgü na tümaarü maü̃ rü tautáma narümeü̃ rü poraãcü tangetchaü̃gü.

Na marü ngẽmagu curüĩnüü̃? Bemana marü tama cumatchaü̃. Notürü Tupanaarü Ore rü tamaã nüü̃ niu na tórü maü̃ rü narümeü̃ tá.

Tiagu 5:10 rü nhanagürü: “Yana namaã peĩnüẽãma”. Ngẽguma anüpaa cuü̃ ngupetügu bemana nagu curüĩnü na tautáma wenaarü nataãẽ i curü maü̃, notürü yana namaã naĩnüama. Wüitchigü i nguneü̃gu curü maü̃ rü nimetchigü tá.

Tupanaarü Ore rü tamaã nüü̃ niu na ‘marü yangaicaü̃ i nguneü̃ i ‘marü taũtáma nüü̃ iĩnüü̃ i au, rü taúetáma ngúü̃ ingeü̃ rü ngẽmagagu aita iüü̃’.’ (Isaías 65:19) Nhugu nangupetüü̃ tá i ngẽma? Ngeguma Tupana nhama i Naãnemaã nacuaꞌgu tá rü nanameẽẽgu tá. Guü̃ma i baitchiãne rü waiümü i waamüü̃ rü anüpaa rü niguꞌgü tá. Guü̃ma i ĩnü i tchieü̃ rü taꞌacü i ngúü̃ rü gutchaü̃gü rü narütaue tá erü Tupana ya Guãmaarü Poramaẽcü rü tamaã nauneta na “ngẽma nüíraũü̃ rü marü tá nüü̃ itarüngüma rü taúetáma teé nhugu nüna tacuaꞌãtchi”.—Isaías 65:17.

Ducaꞌ niĩ Tupana ‘cuna nanaãtchaü̃ i wüi taãẽ i aicuma iĩü̃’. Ngẽma rü ngeguma Tupana nhama i Naanemaã nacuaꞌgu tá niĩ. (Jeremias 29:11) Ngẽma wetchicuru rü aicuma tá cuü̃ narüngü̃ẽẽ na taãẽãcü cumaü̃ü̃caꞌ. Sara ya marü nua ngoꞌégae rü nhatarügü: nagu tcharüĩnügu na taꞌacü Tupana naüü̃ tá ngeguma nhama i Naanemaã nacuaꞌgu rü tchoü̃ narüngü̃ẽẽ na nüü̃ tcharüngümaü̃caꞌ yema tchieü̃ ga tchamaã ngupetüü̃ rü meã tchamaamaü̃caꞌ.

Cunawaꞌe na yeera nüü̃ cucuaꞌtchigaü̃ i ngẽma taꞌacü i Tupana naüü̃ tá ngeguma nhama i Naanemaã nacuaꞌgu tá? Nhuãcü cuü̃ narüngü̃ẽẽ ngẽma na nüü̃ cucuaꞌü̃ na tautáma wenaarü nangupetü i baitchiãne rü toomatchigü i anüpaagü? Cuü̃ narüngü̃ẽẽ tá na nüü̃ curüngümaü̃ yema tchieü̃ i cumaã ngupetüü̃ rü meã cumaama tá i nhuꞌma. Nhuꞌmatama cuü̃ narüngü̃ẽẽ tá i Tupanaarü Orearü ucuꞌẽgü na nüü̃ cucuaꞌü̃ca na taꞌacü tá cuüü̃ woo ngeguma gutchaü̃gü cuü̃ ngupetügu. Ngẽmatchiga nadau tamaepüꞌ i cuaꞌruü̃wa.