ATINO shiiroottoha ikkiro dadillu, yaaddonna callimma amaddinoheha ikkara dandaanno. Qoleno caaccaawattoha, gaabbattohanna waajjishannoheha ikkara dandaanno. Hakkiinni saeno ‘Heeshshote haaˈraˈya mayi waaga afidhino?’ yite hedattoha ikkara dandaanno.

Shiiˈniro xissiisiˈra laanfe diˈˈikkitino. Isinni xissiisiˈrakki shiirootto mancho mageeshshi geeshsha baxattoro leellishshanno. Ikkollana xissokkira shesho afiˈra dandaatto doogo no?

Xissokkinni beedho afiˈra dandaattokkiha lawiherono, aante noo amaale harunsakki sheshifatatto gede kaaˈlitahera dandiitanno:

CAACCE FUSHSHIˈRI

Mittu mittunku manchi xisso fushshiˈranno garinna manchite keeshshanno yanna babbaxxitara dandiitanno. Ikkirono wiˈla xissokkinni beedho afiˈratto gede kaaˈlitahera dandiitanno. Aleenni kulliti Vaneesa togo yitino: “Giddoˈya noo xisso fushshiˈra hasiˈreemma daafira, sammi yee wiˈleemma.” Hedeweelcho rodoose shiidhinoti Soofiyano togo yitino: “Shiiroommata hedeemma woyite lowo geeshsha xissiisiˈreemma; mada fanne hayishshinanni woyite xissannohu gede xissannoe. Xisso shota ikka hooggurono, mada hurtannohu hatto assinirooti.”

XISSOKKI WOLOOTAHO HASAAPHI

Mito woyite calla ofolla hasiˈrattoti egennantinote. Ikkollana dadillu callikki duqqa dandaattokki  duhi gedeeti. Jeeredi yinannihu annasi shiirinohu 17 diri beetti togo yiino: “Giddoˈyata wolootaho hasaaphoommo. Coyiˈreemmori gari geeshsha leella hooginsarono, mannaho hasaaphaˈya lowore kaaˈlitinoe.” Hanafote birxichira qummi assiniti Janiisino mannaho hasaapha kaaˈlitannota kultanni togo yitino: “Mannaho hasaaphaˈya lowo geeshsha sheshifachishshinoe. Hatto assaˈya mararannoe manni noota huwateemma gedenna callimma amaddannoekki gede kaaˈlitinoe.”

WOLOOTU KAAˈLITANNOHETA GIBBOOTI

Mittu dokiterichi togo yiino: “Shiirino manni umonni jaallansanna fiixinsa aannonsa kaaˈlo adhannoha ikkiro, beedho afiˈraranna sheshifatara dandaanno.” Konni daafira jaallakki ate kaaˈlate maa maa assa dandiitannoro kulinsa; insa kaaˈlitahera hasidhe heedhenni kaaˈlitannohe gara affinokkiha ikkara dandaanno.—Lawishsha 17:17.

MAGANUNNIWA SHIQQI YII

Tiina togo yitino: “Minaanniˈya hedeweelcho kaanserete dhibbinni reyita, bashsho gede qarraˈyanna yaaddoˈya isira hasaapha dandeemmakki daafira, baalankare Maganoho kuˈla hanafumma! Soodo soodonte, hakkonne barra cince saeemma gede kaaˈlahera huucciˈreemma. Maganu kaaˈlinoe gara kiire dituqeemma.” Taarsha yinanniti 22 dirisenni ama shiidhino beetto togo yitino: “Qullaawa Maxaafa barru baala nabbawaˈya lowo geeshsha sheshifachishshinoe. Qullaawa Maxaafa nabbaweemma woyite, jawaachishshannota hiinceemma hedo afiˈreemma.”

SHIIROOTTO MANCHI REYOTENNI KAˈˈANNO YANNA HEDI

Tiina ledde togo yitino: “Umi qara kaote hexxo hakkeeshshi geeshsha disheshifachishshinoe; korkaatuno hakkawoyintenni minaannaˈya afiˈra hasiˈroomma, qoleno qaaqquulliˈya annansa afiˈra assidhino. Ikkollana xa shoolu diri saihu gedensaanni kaote hexxo seekke cuˈmiˈroomma. Cincenna kaajje heeˈreemma gede kaaˈlitinoeti tenne hexxooti. Minaanniˈya ledo galagale xaadeemma yanna hedeemma; tini giddiidi keerenna harshammo afiˈreemma gede assitannoe!”

Xissokkinni bayichonko shesho afiˈra hoogattora dandaatto. Ikkirono Vaneesa woˈnaalshi hexxo mudhattokki gede kaaˈlahera dandaanno. Ise togo yitino: “Horo sheshifattinannikkiha lawaˈnera dandaanno; ikkirono xissoˈne galte hossanni hawacci yitanno.”

Shiirootto manchira xissiisiˈra horo agurattoha ikka hoogirono, heeshshokki waaga afidhinota huluullantooti. Maganu baxillunni kaaˈlannohe daafira, jaallakki ledo dancha yanna sayisanna hagiirru noo heeshsho heeˈra dandaatto. Muli yanna giddo Maganu reyitinore kayisanno. Isi shiirootto manchi ledo galagalte xaadde hanqafiˈrattora hasiˈranno. Hatte yannara xissiisiˈre manchitino wodanikki woˈmunni woˈma huranno!