Rofyor Waduf Marḇak
MANKUNDAW ḇaido snonkaku waswar ya iduf marḇak ido, na waḇor famfnom kaku. Ine monda ḇa, ḇeduf ani ḇaido mankundaw imbude na mumsor fasawsaw. Rofyor koraḇe dokter indo na komkak kaku. Ono wer ido, samswen fa kosrow dokter i ma ḇaḇyak na neke, ḇaido kofawi ḇa aryawin kinem anna narow ke roḇa. Roi nane kam nkur ko ido, na nafrur fa koḇor famfnom kaku.
Na kor fafnoḇek roryo? Sibor sismai sneprei fafisu senadi sor ḇe Manseren Allah ma siwasya mnuk-mnuk ro Refo na. Fafnoḇek ḇesena ndramuma ro kina koḇansi ma wos samarawraw ḇeramuma ro bati koḇesya.
ANUN INSAMA SWAMBRAḆ
Robert ḇena umur taun ri 58, doḇe, ”Wakyar kaku faro Manseren Allah kada, na swambraḇ ro dafduf ḇekur au na. Benadi wor ḇe Yahwe I. Wakofenḇair roi wakara na. Wor fa Sinan ḇyuk rur ḇesren ma samambraḇ insama waknon, ma kina Bansi kako sisambraḇ.”
Robert fyawar wer ḇo doḇe, ”Kina bansi sisya ḇesya kwar fa sifnoḇek au kada, na swambraḇ kaku. Ras nakam sino sisya setelfon aya ḇo sifuken, ’Be rariso?’ Bati ayesi ḇeḇarek ro moḇ ḇeḇinkwan kako sḇuk wos samarawraw ḇe aya. Ine nafrur fa yaknon kaku ma yana karkara ḇepyum.”
Ausya mamfar snonkaku ḇeduf sya ido, Linda isya ḇyuk anun ḇepyum ḇe Au. Doḇe, ”Snonkaku ḇeduf sya simarisen kofrur pyum si raris snonkaku ḇeduf ḇa sya. Simewer sawos ker dafduf sena monda. Inja, wawos monda roi ḇesena.”
Kuker samambraḇ ro Manseren Allah, wos sneprei ro Refo ya, ma fafnoḇek ro kina ma bati koḇansi, na kokyar kaku koduf dafduf ḇemarḇak kakono, payamyum ya isya kaker ro kenem ine.
Wamarisen Ido Mam Ine Kako
FAKFUKEN ḆEKUR REFO NEḆEKAREM
Refo ya Bisa Isaramper Ko Fafisu Kosmai Dafduf Ḇemarḇak Ke?
Imbo! Farkor nyan ri kyor moḇsa na waknon monda fafisu waduf marḇak.
BARYAS
Rofyor Snonkaku Waswar Oso Iduf Marḇak Kaku
Rariso ḇero kina sya sḇuk sneprei ma sfaduru snonkaku siswar ḇeduf marḇak ya rai? Rariso ḇemamwarek snonkaku ḇeduf sya smam pyum masasor sena fa nek ḇa?
