Éyoñe wo juan a ngul ôkon
NGE wo, nge ke môt éziñ ya nda bôte jôé a bili ngul ôkon, wo yem aval avé jam ete da tyelé nleme yôp. A nto na, wo wo juan a ôkon ôbien, wo fe wo yiane juan a mame ma te’elane wo a tyelé wo nleme yôp. Woñ a ate’e ya nlem bi ne dañe bet éyoñ ése wo yiane ke nda biañ, éyoñ wo kate kui na ô bi biañ é ne saé wo, nge ke éyoñ mebiañ wo nyoñ ma beta so so wo mam mefe nyule jôé. Mam mete mese me nto beta meve’ele.
Nne bi ne yene mvolane vé? Abui bôt e nga bi mvolan amu be nga futi ndi jap be Zambe a zene ya meye’elan a nlañane bifuse ya Bible bia volô
nlem. Mvolan ô ne fe so éyoñe nda bôte jôé a bemvôé bôé ba nye’e wo a su’u wo.MAM ME NGA VOLÔ BÔTE BEVOK
Robert, nnye ate a bili mimbu 58 a jô na: “Nge ô bili ngule mbunane be Zambe, a ye volô wo na ô jibi ôkone wôé. Ye’ela’ane Yéhôva. Kate’e nye avale wo wô’ôtan. Sili’i nye mbamba nsisime wé. Ye’ela’ane nye na a ve wo ngule ya bo ayok asu nda bôte jôé a na, ô jibi ôkone wôé a éjijin ése.
Éyoñe nda bôte jôé ja su’u wo, é va’a fe wo ngule nyul, jam ete e ne nya mfii. Môs ôse, ébu’a jia nge bibaé ya nda bôte jam, ja loene ma na é sili ma na, ‘Ye ô ne mvo’é?’ Bemvôé bam fe ba su’u ma. Ba ve ma ngule nyul, a nalé a volô ma na me bo te sili mo si.”
Nge ô wô’ô ke jome nyo mvôé a kon, ba’ale’e bifia bi Linda bi: “Teke bisô, môt a kon a kômbô nyiñ ane bôte bevo’o bese; a ne bo te kômbô kobô ajô y’ôkone wé. Nde ñhe, jeñe’e na mia nye mi laan ane ô wô’ô zu wo laan a nye.”
A ngule ja so be Zambe, mvolane wo so Bible été, ô beté fe nye’ane nda bôte jangan a bemvôé bangan ba liti, bi ne tabe ndi na bi ne k’ôsu a bu’uban ényiñ to’o bia juan a ngul ôkon.