EFI yu efuso wan sama di i lobi abi wan siki di e kii sama, a sani ya sa meke yu e booko yu ede. Boiti a siki di e fooseli i, son leisi yu e feele wanboowanboo efuso yu ati e boon te yu e pakisei son sani. Son leisi a go di i mu e go a dataa ala yuu e meke i weli. Den deesi e dii tu. Den sani di den dataa e taigi i fu du anga den sani di den deesi e du anga i, e fooseli i. Kande son fasi fa dataa mu yeepi yu á makiliki. Te i pakisei ala den sani ya, ai meke i fii booko-saka.

Pe i sa fende toosutu? A omen sama fende toosutu di den begi Gadu fu a yeepi den. Son pisi fu  Beibel e yeepi den tu. Son leisi famii anga mati sa yeepi tu.

Robert abi 58 yali. A taki: „Fitoow Gadu te i siki, da a o yeepi i fi yu á gi abaa. Begi Yehofa. Taigi en fa yu e fii. Begi en fu a gi yu en santa yeye. Begi en fu a yeepi i fu a fasi fa yu e tyai iseefi sa gi i famii taanga-sikin. Begi en tu fu a yeepi i fi yu á buuya.”

„A abi wini tuutuu te i famii e holibaka gi i. Ala dei wan fu den e telefon akisi mi taki: ’Fa ai go anga i?’ Wantu mati fu mi e gi mi taanga-sikin tu. Den e yeepi mi fu fii lekiti pikinso. A sani de e yeepi mi fu mi á gi abaa.”

Efi i go luku wan mati fi i di siki, holi san Linda taki a pakisei. A taki: „A sama di siki nai wani poti pakisei na a siki ala yuu. A ná ala yuu ai wani taki fu a siki fi en, neen meke te i go luku en meke moiti fu gi toli anga en enke fa i be gwenti.”

Gadu o gi i kaakiti fu holidoo. Boiti dati, a Wowtu fi en o toosutu i. Famii anga mati o holibaka gi i tu. Den sani ya e soi kiin taki i poi fende taanga-sikin fu holidoo, winsi fa i siki.