YETE̱NA wa to̱ moto ńena o to̱ndino̱ a be̱n diboa le ná di bwa mo̱, o bi ná nik’e mabwesane̱ ndutu bwambi. O sumo te̱ diboa mo̱me̱ne̱, o be̱n pe̱ besengedi ba ndutu nika e mawanano̱. Yenga la do̱kita, si we̱le̱ la so̱ mbad’a bo̱lise̱ wa to̱ mo̱ni o sawa mo̱, to̱ mitakisan myanga mi mawanano̱, be ná ba bata kolise̱ bo̱ngo̱ na mutaka o masengano̱. Ndut’a mulema e lati te̱ na diboa la ngińa, nika ńe ná e be̱ bodilo o bambe̱.

Owe̱ni so̱ jeno̱ ná di kusa jongwane̱ e? Jita ba so̱i ná ba makusa nde jongwane̱ di buki me̱se̱ tongwea na kane̱ la Loba na langa la bepasi ba Bibe̱l be  malo̱ke̱. Lo̱ko̱mea le pe̱ ná di wa na ndolo na jongwane̱ mbia na mako̱m beno̱ ná ba wana.

Robert nu be̱n 58 mbu a boli malea ná: “Lakisane̱ Loba nde a me̱nde̱ jongwane̱ wa o we̱lisane̱ diboa lo̱ngo̱. Kane̱ Yehova. Langwea mo̱ ne̱ni o masengano̱. Baise̱ mo̱ ná ongwane̱ wa ná o be̱ ngińa, wembe̱ pe̱ mbia mo̱ngo̱, na ná o we̱lisane̱ diboa lo̱ngo̱ na musango.

“Ye mweńa jita ná mbia mo̱ngo̱ mu sue̱le̱ wa, mu be̱ pe̱ na wa. Buńa te̱, mō̱ to̱ baba babu ba mabele̱ mba o baise̱ mba ná ‘E mala nde ne̱ni?’ Mako̱m mam ma maje̱ o ńai na ńai a bepolo ma membe̱ mba. Ba mabola mba ngińa, nik’e mongwane̱ mba ná na si bo̱bo̱.”

Yete̱na we nde wala pe̱pe̱le̱ diko̱m di maboe̱, maka nje Linda a kwalino̱: “Muboedi a be̱n ńo̱ngi ná mambo ma be̱ nde ka ko̱lo̱ngo̱ne̱, a si be̱n so̱ yen ebe ńo̱ng’a kwalea ońola diboa lao. Ońola nika, kwalea nde mambo lo yo̱kino̱ kwalea.”

Tongwea na ngińa ni mawe̱ na Loba na lo̱ko̱mea la Betiledi, nikame̱ne̱ pe̱ na jongwane̱ la mbia na mako̱m bena be ndolo, je ná di be̱ mbaki ná ye njo̱m o be̱ longe̱, to̱ ponda jeno̱ lembe̱ diboa la ngińa.