Be Ni Ooye Hela Ko Ni Naa Wa Waa
KƐ́ DATRƐFONYO ko ekɛɛ bo pɛŋ akɛ oná hela ko ni baanyɛ agbe bo lɛ, no lɛ, ole bɔ ni ehaoɔ mɔ waa ehãa. Shihilɛ nɛɛ baanyɛ ahã bo loo mɛi ni kwɛɔ bo lɛ amli afu oyayaayai, ní agbɛnɛ hu, nyɛye nyɛtsui. Ekolɛ helatsamɔhe lɛ ni obaaya yɛ be kɛ beiaŋ, bɔ ni ebaatɔ bo, ni obaafite shika dani abaakwɛ bo, kɛ naagbai ni baanyɛ ajɛ tsofai ni abaahã bo lɛ mli kɛba lɛ baahã oshe gbeyei waa, ni oye otsui fe nine. Bɔ ni hela ni naa wa suɔ mɔ tsui lɛ jeɔ mɔ nijiaŋ wui waa.
Mɛni baanyɛ aye abua bo? Mɛi babaoo ena akɛ, kɛ́ amɛsɔle amɛhã Nyɔŋmɔ, ni amɛkane Biblia mli
saji ni shɛjeɔ mɔ mii lɛ, ehãa amɛtsui nyɔɔ amɛmli waa diɛŋtsɛ. Wɔwekumɛi kɛ wɔnanemɛi ni sumɔɔ wɔ lɛ hu baanyɛ aye abua wɔ waa.NƆ NI EYE EBUA MƐI KOMƐI
Robert, ni eye afii 58 lɛ wie akɛ: “Ná hemɔkɛyeli yɛ Nyɔŋmɔ mli, ni ebaaye ebua bo ni okpee ohela lɛ naa. Sɔlemɔ ohã Yehowa ni eye ebua bo. Kɛɛmɔ lɛ bɔ ni onuɔ he ohãa. Bi lɛ ni ehã bo mumɔ krɔŋkrɔŋ lɛ. Bi lɛ ni ewa bo ni oná jwɛŋmɔ ni ja yɛ ohela lɛ he, owo owekumɛi lɛ hewalɛ, ni oto otsui shi kɛkpee hela lɛ naa.”
Robert tsa nɔ akɛ: “Kɛ́ oweku lɛ ná dekã amɛhã bo, ni amɛye amɛbua bo yɛ henumɔŋ lɛ, ehi waa. Daa gbi lɛ, mɔ kome loo mɛi enyɔ tswaa mi ni amɛbiɔ mi akɛ, ‘Te oyɔɔ tɛŋŋ?’ Minanemɛi ni yɔɔ hei srɔtoi woɔ mi hewalɛ. Amɛhãa mitsui nyɔɔ mimli, ni no yeɔ ebuaa mi koni minijiaŋ akaje wui.”
Kɛ́ oyɛ naanyo ko ni bɛ hewalɛ ni oyaasara lɛ lɛ, kadimɔ nɔ ni Linda wie nɛɛ: “Eji anɔkwale akɛ, mɔ ni bɛ hewalɛ lɛ baasumɔ ni ehi shi tamɔ nɔ ni eyɛ hewalɛ, ni ekolɛ esumɔŋ ni be fɛɛ be lɛ ewie ehela lɛ he. No hewɔ lɛ, okɛ lɛ awie nibii ni nyɛfɔɔ he wiemɔ lɛ ahe.”
Kɛ́ wɔkɛ wɔhiɛ fɔ̃ Nyɔŋmɔ nɔ, ni wɔhã Ŋmalɛ lɛ shɛje wɔmii, ni wɔwekumɛi kɛ wɔnanemɛi ni sumɔɔ wɔ lɛ hu ye amɛbua wɔ lɛ, wɔnuŋ he kɔkɔɔkɔ akɛ jeŋ shihilɛ eje wɔtsine, kɛ́ wɔmiiye hela ko ni naa wa waa po.