NU NAMMUAMMU nga egga i kappatay nga taki mu onu na iddeddukammu, ammum i kariga natun. Fuera paga ta taki mismu, sensitibo paga i emosion. Kappaganassing anna kavvuru-vurung i pappadoktor, problema ta papporu onu pappaga ta pappadoktor, onu i marake nga efekto na medisina. Megafu ta grabe nga taki, magulu-guluan i nono anna mariga-riga yatun.

Pappoffunattam? Nammuan na aru nga i paddasal ta Dios anna i pabbibbig tu makapabannay nga teksto ta Biblia i talaga namanna-bannay nira. I aya anna suporta na familia anna kokkofun i tadday paga nga makoffun.

Kinagi na 58 anios nga si Robert: “Mangurug ka ta Dios anna uffunan naka nga maattamman i taki mu. Makimallo kani Jehova. Kagiammu nisa i  mataga-tageno mu. Kiddawan nisa i masanto nga espiritu. Kiddawan nisa nga pasikannan naka para ta familiam anna tapenu mabbalikka tu kalmadu ta pagattattammu ta taki mu.

“Importante i emosional nga suporta na familia. Tadday onu dua i tumawag niakan kadaggaw tapenu mangumusta. Pagarammannà na kokkofukku ira ta nadduruma nga lugar. Ira i mamasikan nio, anna yatun i nakoffun tapenu ari ngà sumuku.”

Nu pasiarammu i mataki nga kofummu, yaw i kagian ni Linda: “Siguradu nga kayà na mataki i normal nga pattolay adde ta posible anna manakina nga kanayun nga mapabbidan i takina. Pagistoriannu gafu i gagangay ira nga paggiristoriannu.”

Gukaban na pamasikan na Dios, pamanna-bannay na Biblia, anna suporta na meddu nga familia anna kokkofun, makapakkomfiansa ittam nga egga i serbi na pattolay, maski nu egga attattammattam nga grabe nga taki.