IWE kutse ow’okw’iwe, amalhwalha obulhwere obukalire kutsibu, kyangan’itha obulighe bunene. Eryongera okwa bulhwere, hakabya n’erihanga-hangya. Obuba n’erihanga-hangya byangan’ongera busana n’eribirikirwa eriyabana abathambiri okwa bulhwere obukalire, eribya ikikalire eribana kutse erithuha emithambirire eyitholere, kutse ebitsibu ebyangalhwiririra omwa mithambirire mirebe. Amaghaniryo busana n’obulhwere angana thulengya amani.

Ni hayi aho thwangabana obuwathikya? Abangyi babirilhangira ngoku ekikabahumulikanaya kutsibu ly’eriyikethera Nyamuhanga erilhabira omwa musabe n’erisoma emyatsi eyikahumulikanaya eyiri omwa Biblia. Olhwanzo n’erisighika eby’abahughu n’abanywani bethu nabyo byangana wathikya.

Robert ow’emyaka 58, akahabulha athi: “Omwa bulhwere, ibya n’erikirirya omu Nyamuhanga kandi akendi kuwathikya eribughumira. Saba Yehova. Mubwire eriyowa lyawu. Musabe omulimu abuyirire. Musabe akuwathikaye eribya n’amalengekania awuwene n’erihumulikania eka yawu n’eribya iwunathekene wukaghumira obulhwere bwawu.

“Kikawathikaya kutsibu ab’eka yawu bamakusighika omw’iyowa lyawu, ibabya ibanayitheghekire erikuwathikya. Obuli kiro mundu mughuma kutse babiri bakanyitherera esimu eribulya bathi, ‘Wune wuthi?’ Abanywani abali omwa myanya muthina-muthina bakanyihimba. Bakaleka ingayowa ndeke, kandi ekyo kikaleka ingathabikyako.”

Wamabya iwuli munywani iwukabungira omulhwere, lebaya ekya Linda akabugha: “Ahathe erithika-thika, omulhwere akanza iniabya n’engebe eyine ng’ey’abandi ngoku kyangathokekana kandi sibugha indi akendianza erikania okwa bulhwere busa-busa. Neryo mukanaye okwa bindu ebya mukana kanayako.”

Omwa kaghalha akakalhua oku Nyamuhanga n’erihumulikana erilhua omwa Masako, haghuma n’erisighikwa n’eka n’abanywani abawithe olhwanzo, ithwanganabya ithunasikire ngoku engebe yikine y’omughaso, nibya n’omughulhu thunemughumira obulhwere obukalire.