Neyi Munakuyekela naYikatu Yamaneni
CHANEÑESHAÑA nankashi neyi ayiwana enu hela ntaña yenu nachikatu chafwana. Kubombela hachikatu chacheni, munateli cheñi kutachika kwakama. Munateli kusweja kutiya woma nikwakama hanjila jakuyuukilamu, chimunateli kwila hakwila mwikali nayitumbu hela wubanji wunateli kufuma muyitumbu yikuyinkawu. Muntu wunakuyekela nayikatu wakamaña nankashi.
Kudihi kutunateli kuwana wukwashu? Amavulu awana nawu kulomba kudi Nzambi nikutaña mazu akukundeja ekala muBayibolu, diyuma yayikundejaña.
Cheñi kukeña kwatumwekeshelaña amabwambu niantaña jetu kwatukwashaña.YUMA YINAKWASHI ANTU AMAKWAWU KUUMIKA
A Robert adi nayaaka 58 ahosheli nawu: “Mukuhwelelenu Nzambi neyi munakukata nawa wukuyikwasha kuumika. Mulombenu Yehova. Mulejenu chimunakutiya. Mulombenu yayinki spiritu yajila. Mulombenu yakoleshi chisaka chenu nawa yayikwashi kutwalekahu kwikala ashinshika hampinji yimunakukata.
“Wukutiya kuwaha neyi chisaka cheyi chikukwasha nikukwakamena. Mafuku ejima antuminaña foni kudi muntu wumu hela ayedi nakuñihula nawu, ‘Munatiyiku ñahi?’ Ankoleshaña kudi amabwambu jami ashakamaña kumaluña ashiyashana. Ankundejaña nawa chankwashaña kubula kuzeya.”
Neyi munakuya nakutala ibwambu denu wakata, talenu mazu ahosheli aLinda: “Muntu wakata wakeñaña kwikala wakola kumujimba nawa hanateli kukeña kuhosha hayikatu mpinji yejimaku. Dichi hoshenu hayuma yimwahanjekaña mpinji yejima.”
Nañovu yaNzambi nikukundeja kwamuNsona, kushilahu niwukwashu wafumaña kudi antaña niamabwambu, tunateli kukuhwelela netu chachiwahi kutwalekahu kuhanda hela chakwila tunakuhita muyikatu yafwana.