NANGMAH emaw, i hmangaih tak emawin nun tiderthawng thei natna khirh tak nei nia i hriat hunah rilru a hah thei hle tih i hria a. I natna bâkah, rilru lam beidawnna pawh i hmachhawn a ngai a ni. Hlauhthâwn awm tak damdawi inenkawl tûra appointment neih te, inenkawlna man harsatna te, leh damdawi side effect ṭha lote chuan hlauhna leh lungkhamnate chu a tizual ṭhîn a. Natna khirh tak avânga rilru hahna chu tawrh zawh loh khawpin a hrehawm thei a ni.

Khawiah nge ṭanpuina kan hmuh theih? Mi tam tak chuan ṭawngṭaia Pathiana innghah leh min thlamuan thei tak Bible chângte chhiarin thlamuanna nasa tak an hmu a ni. Chhûngte leh ṭhiante’n kan chungah hmangaihna lantîr a, min ṭanpui hian thlamuanna kan nei bawk.

Kum 58 mi Robert-a chuan: “I natna chu Pathian rinchhan chungin hmachhawn la, tichuan, a ṭanpui ang che. Ṭawngṭaiin Jehova chu pan rawh. I rilru awm dân chu hriattîr la. A thlarau thianghlim chu dîl ang che. A êng zâwnga thlîr tûr te, i chhûngte tichak thei tûr te, leh i natna chu rilru dam taka tuar thei tûrtein a ṭanpuina dîl ang che.

“I chhûngte’n rilru lamah an ṭanpui theih che chuan, chu chuan nasa takin a ṭanpui ang che. Nî tin hian ‘eng nge i an?’ tia phone-a min zâwttu pahnih, khat hi an awm reng a. Hmun hrang hranga ka ṭhiante hnên aṭangin fuihnate ka dawng a. Anni chuan ka rilru an tihahdam a, chu chuan chel taka tuar tûrin min ṭanpui a ni,” tiin a sawi.

I ṭhian dam lo tuemaw i va kan a nih chuan, Linda-i sawi hi hre reng ang che: “Dam lo chuan nun pângngaia awm leh chu a duh hle a, natna chungchâng ringawt sawi chu a duh lo. Chuvângin, thil dang in sawi ṭhinte chu sawipui rawh,” tiin.

Pathian hnên aṭanga chakna te, Bible aṭanga thlamuanna te, leh hmangaih taka chhûngte leh ṭhiante ṭanpuina chuan, natna khirh tak kan tuar chung pawhin nungdama awm hi manhla tak a ni tih min hriatchiantîr a ni.