QA O tzaj qʼamaʼn qa at jun yabʼil tiʼja aju jaku kyima tuʼn ex qa tiʼj jun xjal kʼujlaʼn tuʼna, tuʼn jlu jaku tzaj bʼaj tkʼuʼja. Nya oʼkx tuʼn yabʼil, sino ax ikx jaku kubʼ tnaʼna nya bʼaʼn. Jaku tzaj xobʼa ex jaku tzaj bʼaj tkʼuʼja tuʼnju il tiʼj tuʼn t-xiʼya nim maj kyukʼil aj qʼanil, tuʼn tkanet tqʼanbʼila ex tuʼn tchjet, ex aju nya bʼaʼn jaku tzaj tiʼja kyuʼn qʼanbʼil. Jaku tzaj bʼaj tkʼuʼja qa ma ximana tiʼj nim tiʼchaq jaku tzaj tuʼn yabʼil.

¿Tiʼ jaku tzʼonin tiʼja? O tzʼonin naʼj Dios kyiʼj nim xjal ex aju tuʼn tjaw kyuʼjin junjun taqikʼ Tyol Dios aʼyeju in tzaj kyqʼuqbʼaʼn kykʼuʼj. Juntl  tiʼ in nonin kyiʼj, aju kʼujlabʼil ex onbʼil in tzaj kyqʼoʼn toj kyja ex kyamiw.

In tzaj tqʼamaʼn Robert, jun xinaq te 58 abʼqʼi jlu: «Tuʼn tikʼx yabʼil tuʼna, qeʼk tkʼuʼja tiʼj Dios ex kʼonil tiʼja tuʼn texa twitz. Naʼna Dios te Jehová ex qʼamanxa te tiʼ in tnaʼna. Qaninxa xewbʼaj xjan te ex tuʼn ttzaj tqʼoʼn tipuna tuʼn tonina kyiʼj toj tjaya ex tuʼn miʼn ttzaj bʼaj tkʼuʼja tuʼn yabʼil».

In tzaj tqʼamaʼntl Robert jlu: «Nim toklen tuʼn kyonin toj tjaya tiʼja ex tuʼn kyten tukʼila. Tkyaqil qʼij in tzaj llamarin jun toj njaye wiʼje tuʼn ttzaj kyqanin tzeʼn atine. Ax ikx in tzaj qʼuqbʼaʼn nkʼuʼje kyuʼn wamiwe te junxitl lugar. In kubʼ nnaʼne bʼaʼn tuʼn jlu ex in nonin tuʼn miʼn ttzaj bʼaj nkʼuʼje».

¿Atpe jun tamiwa yabʼ taʼ ex taja tuʼn t-xiʼya visitaril te? Ximana tiʼjju in tzaj tqʼamaʼn Linda: «Aju xjal yabʼ, taj tuʼn tanqʼin toj tbʼanel ex nyalo taj tuʼn tyolin tiʼj yabʼil tkyaqil maj, tuʼntzunju che yoline kyiʼj junxitl tiʼchaq».

Aju tipumala in tzaj tqʼoʼn Dios, aju qʼuqbʼil tkʼuʼja in tzaj qʼoʼn toj Xjan Uʼj ex aju kykʼujlabʼil toj tjaya ex tamiwa jaku che onin tiʼja tuʼn tel tnikʼa tiʼj qa at nim tiquʼn tuʼn tanqʼina maske at jun yabʼil tiʼja.