Nga Muli na Vuvezi vua ku Kaluua Cikuma
“Mu va nji lekele nguavo nji li na cancer ya ku mampunga na mu mila, nja vuile ngue va na nji leka nguavo vuovuno u tsa. Vunoni mu nja ile ku ndzivo, nja lihiluile naua nguange “Vutuhu kati vikevio vi nja lavelele, nji na pande ku uana njila ya ku pinda navio, mueka muahi.”—vaLinda, va miaka 71.
“Nja kala na vuvezi vua ku vavala cikuma vue ku tsiha ndzili ya misisa (mizi) ya ku cihanga cange. Vintsimbu vimo ku vavala caco ce ku nji kokela litima. Kaha Vintsimbu via vingi nja kele na ku livua vulika kaha nja singaniekele ha ku litsiha.”—vaElise, va miaka 49.
NGA yenu mpundu ni kavusoko kenu va na mu uana na vuvezi ka vue ku kanguka, mua vusunga mu tantekeya kayando ka kala ha ku pinda navuo. Mu ku vueza ku vuvezi, kua kala naua ku pinda na cifua ci ve ku livuilamo vantu ku mitima ku tuala ha vuvezi vuaco. Liova na ku lisosomua vie ku livuezelela omo lia ku ndundangela muaya visipitali, ku kaluua ca ku uana ndotolo ua cili , na fuakala-fuakala i vie ku koka vihemba nga vili na ku panga mu muvila. Kaha ku lana ca visinganieka omo lia vuvezi naco ci hasa ku tu zeyesa.
Kuli iya honi tu hasa ku tuntila mu vintsimbu evi? Vavengi nguavo vukuasi vua kama ve ku vu uana mu ku vundila kuli Njambi na ku tanda vinimbu via ku lembezieka mu Mbimbiliya. Kaha vavusamba na vavusoko navo ve ku kuasa na ku muesa cilemo ca kama.
VATI VAMO VE KU PINDA NA CITANGA CACO
Robert, umo mukuluntu ua miaka 58 ngueni: “Luisenu vuvezi vuenu na lutsilielo muli Njambi. Kaha ikeye ka mi kuasa. Puenu na ku vundila kuli Yehova na ku mu leka vati muli na ku livua. Mu vundilenu sipilitu santu. Mu vundilenu a mi kuase ku kaniama linga vavusoko vuenu va simpileho, na ku mi kolesa linga mu pinde na vuvezi vuenu na mutima ua ku vata.”
Mukuluntu Robert naua ngueni: “Ku kaniamesa ca vavusoko ce ku kuasa mua kama. Nga ntsimbu yose va na lisosomua nove. Matangua ose, umo lika ni vavali ve ku nji sana ku telefone na ku nji hinduisa nguavo: ‘Vatico lelo?’ Vavusamba vuange vose ve ku nji kaniamesa. Cili vene va pua ngue mpango ha nje ku likuatelela.”
Nga mu tonda ku ka meneka umo kavusamba kenu ali na ku vavala, halakanenu cilungula ca mukuluntu Linda, ngueni: “Muvezi neni ue ku tonda ku ci suvako vuvezi vueni na ku yoya ngue mbunga yose, ngeci mukemuo ke ku tonda ku handeka via vuvezi vueni ntsimbu yose. Nga muli neni, ca cili ku simutuila vimpande vieka vi mua lema ku handeka neni, kati lika via vuvezi vueni.”
Na vukuasi vue ku tu hana Njambi, ku lembezieka ca mu Visoneka via ku Lela, hamo lika na vukuasi vua vavusamba na vavusoko, tu hasa ku kala na vusunga ngecize ci li ku lutue ku tualelelaho ku yoya, cipue nga tuli na ku pinda na vuvezi vua vukalu cikuma.
Halumo mu Hasa ku Lema Naua Evi
VIHULA VIA MBIMBILIYA VI VA KUMBULULA
Vuno Mbimbiliya i Hasa ku Kuasa Vakua ku Pinda na Mavezi ka eku Kanguka Ni?
Eyo! Tantekeyenu vinanga vitatu vi hasa ku mi kuasa nga mua vavala.
VUTALA VUA KANIUNGI
Nga Kavusoko Ketu na Lisupu na Ntsimbu ya Indende ya Muono Omo lia Vuvezi
Vati vusoko vu hasa ku lembezieka kavusoko kavo nga na lisupu na ntsimbu ya indende a lingile ku tsa? Vati vakua ku va niunga va hasa ku linga omo lia viuma vi kezamo mu ku mu saka? Vati mukua ku mu niunga a hasa ku lua na visoti vie ku soloka omo a niunga muntu uaco?
